သျှမ်းပြည် လွိုင်လင်ခရိုင် ကျေးသီးမြို့နယ် SSPP ဌာနချုပ် ဝမ်ဟိုင်းဒေသအနီး မြို့/မြို့နယ်များရှိ အခြေစိုက် တပ်များ ရှိရာသို့ စစ်ကောင်စီတပ်ဖွဲ့မှ စစ်အင်အား ဖြည့်တင်းနေကြောင်း သတင်းသိရသည်။
ယမန်နေ့ (ဇန်နဝါရီ ၂၆) ရက်တွင် လားရှိုးမြို့ အခြေစိုက် အရှေ့ပိုင်းတိုင်း စစ်ဌာနချုပ် (ရပခ) မှ စစ်အင်အား ကား အစီး ၂၀ သည် မိုင်းရယ်မြို့ ရှိ ခမရ ၃၂၅ တပ်သို့ ဝင်ရောက်လာပြီး မွန်းလွဲပိုင်း၌ မိုင်းရယ်မြို့မှ တစ်ဆင့် ကျေးသီးဘက်သို့ စစ်ကားအစီး ၃၀ ဆက်လက် ထွက်ခွာသွားကြောင်း မြင်တွေ့ရသည့် ဒေသခံများက သျှမ်းသံတော်ဆင့်ကို ပြောသည်။
မိုင်းရယ်မြို့မှ ထွက်ခွာသွားသည့် စစ်ကား အစီး ၃၀ သည် ကျေးသီးမရောက်ခင် မိုင်းရယ်မြို့ တောင်ဘက်ရှိ မန်ဖျက်ကျေးရွာမှ စစ်ကောင်စီတပ် ခြေမြန်တပ်ရင်း (ခမရ – ၂၂ ) သို့ အစီး ၁၀ နီးပါး ဝင်သွားကြောင်း အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မိုင်းရယ်ကနေ ကျေးသီးဘက်ကို ဦးတည် ထွက်သွားတဲ့ စစ်ကား ၃၀ ထဲက ၁၀ စီးက မန်ဖျက်တပ် ခမရ ၂၂ မှာ ဝင်တယ်၊ ကျန်တာကတော့ ကျေးသီးဘက် ဆက်သွားတယ်၊ အခု စစ်ကောင်စီတပ်ဖွဲ့ လှုပ်ရှားမှု ရှိနေတဲ့ မြို့တွေ က ဝမ်ဟိုင်းဌာနချုပ်နဲ့ နီးတဲ့ စစ်ကောင်စီ အခြေစိုက်ရှိတဲ့ မြို့တွေပဲဖြစ်တယ် ” ဟု အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် ယနေ့ (ဇန်နဝါရီ ၂၇) ရက် နံနက်ပိုင်း ၉ နာရီဝန်းကျင်တွင်လည်း မိုင်းရယ်မြို့ အမြောက်တပ် နှင့် ခမရ ၃၂၅ တပ်တို့မှ စစ်ကောင်စီ တပ်အင်အား နောက်ထပ် ၂၄ စီး ကျေးသီးဘက်သို့ ဦးတည်ထွက်ခွာသွားကြောင်း မျက်မြင်တွေ့ရသူများက သျှမ်းသံတော်ဆင့်ကို ပြောသည်။
ထို့နည်းတူ ယမန်နေ့ (ဇန်နဝါရီ ၂၆) ရက်တွင် သျှမ်းပြည် အရှေ့အလယ်ပိုင်းတိုင်းစစ်ဌာနချုပ် ရလခ တပ်မှ စစ်အင်အား အပြည့်ပါသည့် စစ်ကား ၁၀ စီးသည် မိုင်းနောင်မြို့ရှိ အမှတ် (၂) စစ်ဆင်ရေးကွပ်ကဲမှုဌာနချုပ် (စကခ ၂) ထဲသို့ ဝင်ရောက်ခဲ့ကြောင်းလည်း သတင်း သိရသည်။
“ခိုလမ်ကနေ စစ်ကား ၁၀ စီးက မိုင်းနောင်မြို့က စကခ ၂ ဆီကို ဝင်လာတယ်၊ အခု မိုင်းနောင်နဲ့ ဝမ်ဟိုင်းဌာနချုပ် နဲ့ မိုင် ၂၀ ကျော်လောက်ပဲ ဝေးတယ်၊ ကျေးသီးဘက်ကိုလည်း စစ်အင်အား ဖြည့်လာတယ်လို့ သတင်း သိရတယ်၊ ဒီပုံအရဆိုရင် ဝမ်ဟိုင်း နဲ့ နီးသမျှ သူတို့ စစ်အင်အား ဖြည့်နေတဲ့ ပုံပဲ” ဟု မိုင်းနောင်မှ အမည်မဖော်လိုသူ အသက် ၃၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိ စစ်ကောင်စီ တပ်ဖွဲ့ အင်အား လှုပ်ရှားမှုများရှိရာ မိုင်းရယ်မြို့၊ ကျေးသီးမြို့နှင့် မိုင်းနောင်မြို့တို့သည် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် SSPP/SSA ဌာနချုပ်ရှိရာ ဝမ်ဟိုင်းဒေသနှင့် နီးစပ်လျက် နေရာများဖြစ်ကြကြောင်း သိရသည်။
ဇန်နဝါရီလ ၂၄ ရက်နေ့ နံနက် ၁၁ နာရီ ၅၀ မိနစ်ဝန်းကျင်တွင် Yak -130 အမျိုးအစား စစ်ကောင်စီ ဂျက်ဖိုက်တာ သည် အမြင့်ပေ ၃၀၀ ကျော်ဖြင့် ဝမ်ဟိုင်းဌာနချုပ်ပေါ်၌ လာရောက် ပျံဝဲခဲ့သည်။
ပြီးခဲ့သည့် ၂၀၁၅ ခုနှစ်မှာလည်း SSPP/SSA ၏ ဌာနချုပ်ရှိရာ ဝမ်ဟိုင်းဒေသတွင် တိုက်ပွဲဖြစ်ပွားခဲ့ပြီး စစ်ကောင်စီ တပ်ဖွဲ့မှ လေကြောင်း တိုက်ခိုက်မှု အပါအဝင် စစ်အင်အား အများအပြားဖြင့် ထိုးစစ်ဆင် တိုက်ခိုက်မှု ရှိခဲ့ဖူးသည်။
