သျှမ်းပြည် တောင်ကြီးခရိုင် ပင်းတယမြို့နယ်ရှိ စစ်ကောင်စီတပ်ဖွဲ့တို့က ပျူစောထီးများကို စစ်သင်တန်း ပေးနေကြောင်း သတင်းသိရသည်။

ပင်းတယမြို့ အောယောရပ်ကွက်တွင် စစ်သင်တန်းပေးနေခြင်း ဖြစ်ပြီး အာဏာသိမ်း စစ်ကောင်စီတပ်သားများ က ၎င်းတို့ လက်အောက်ခံ အုပ်ချုပ်ရေးမှူးများ နှင့် ပျူစောထီးအဖွဲ့ဝင်များကို စစ်သင်တန်းပေးနေခြင်း ဖြစ်ကြောင်း ဒေသခံများက သျှမ်းသံတော်ဆင့်ကိုပြောသည်။

“မနက်အစောကြီး ၅ နာရီလောက်ကစပြီး ဘယ်ညာအော်သံတွေ ကြားရတယ်၊ ညဘက်ဆိုလည်း သေနတ်တွေ ဖောက်ပစ်တာ ရှိတယ်၊ တက်တဲ့သူလည်း မိနစ် ၂၀ လောက်ရှိနေတယ်” ဟု အောယောရပ်ကွက်တွင် နေထိုင်သည့် အမည်မဖော်လိုသူ ဒေသခံ အမျိုးသမီးတစ်ဦး က သျှမ်းသံတော်ဆင့်ကို ပြောသည်။

အဆိုပါ စစ်သင်တန်းသည် ပြီးခဲ့သည့် ဇန်နဝါရီလ ၂၂ ရက် ကတည်းက စတင်ခဲ့ခြင်းဖြစ်ပြီး စစ်သားများ၏ ဝင်ထွက်သွားလာမှုကြောင့် ဒေသခံပြည်သူများအတွက် အနှောင့်အယှက်ဖြစ်သလို စိုးရိမ်စိတ်လည်း ဖြစ်စေ ကြောင်းလည်း အထက်ပါ အမျိုးသမီးက ဆက်ပြောသည်။

စစ်သင်တန်းတက်သူများတွင် ရပ်ကွက်အုပ်ချုပ်ရေးမှူးများ၊ ပျူစောထီးတပ်ဖွဲ့ဝင်များ နှင့် စစ်ကောင်စီ လက်အောက်ခံ သတင်းပေးများပါဝင်တက်ရောက်နေပြီး သင်တန်းဆင်းများကို စစ်ဆေးရေးဂိတ်များ၌ စောင့်ခိုင်းမည်ဟုလည်း ဒေသခံများက ပြောသည်။

“အခုသတင်းသိရတာကတော့ အဲ့သင်တန်းဆင်းတွေကို စစ်ဆေးရေးဂိတ်တွေမှာ စောင့်ခိုင်းမယ်တဲ့၊ သေနတ်လည်း အပ်မယ်လို့ ပြောတယ်၊ ဒီသင်တန်းက လကုန်အထိ ဖြစ်မယ်လို့ သိရတယ်” ဟု ဒေသခံ အမျိုးသားက သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၂ ခုနှစ် စက်တင်ဘာလ အတွင်းမှာလည်း ရွာငံမြို့နယ်အတွင်း စစ်သင်တန်းပေးမှု ရှိခဲ့ကြောင်း လည်း သိရသည်။

အာဏာသိမ်း စစ်ကောင်စီမှ ပျူစောထီးများမွေးထုတ်ပြီး လက်နက်တပ်ဆင်ပေးခြင်းသည် ဒေသခံ ပြည်သူ့ကာကွယ်ရေး တပ်ဖွဲ့နှင့် ဒေသခံအချင်းချင်း ရန်တိုက်ပြီး သပ်လျိုသွေးခွဲသလို ဖြစ်နေသည့်အတွက် စိုးရိမ်ရကြောင်းလည်း ဒေသခံများကပြောဆိုနေကြသည်။