Wednesday, July 24, 2024

နေရာအသစ် ထပ်မံရွှေ့ပြောင်းရသည့် စစ်ရှောင်ဦးရေ ၄၀၀ ကျော် အရေးပေါ် အကူညီလိုအပ်

Must read

သျှမ်းပြည် တောင်ကြီးခရိုင် ဆီဆိုင်မြို့နယ် ဆီဆိုင် – ကရင်နီ (ကယား) ပြည် နယ်စပ်ဒေသရှိ စစ်ရှောင်များသည် နေရာအသစ် ထပ်မံရွှေ့ပြောင်းရသည့်အတွက် အရေးပေါ်အခြေအနေ အကူညီလိုအပ်နေကြောင်း သိရှိရသည်။

စစ်ရှောင်စခန်း

တိုက်ပွဲကြောင့် ပြီးခဲ့သည့် ၂၀၂၂ ခုနှစ် အောက်တိုဘာလတွင်းက ဆီဆိုင်မြို့နယ်အတွင်းသို့ ထပ်မံရောက်ရှိ လာသည့် စစ်ရှောင်ဦးရေ ၄၀၀ ကျော်သည် လက်ရှိတွင် နေရာအတည်တကျ မရှိခြင်းကြောင့် နေရာအသစ် ထပ်မံရွှေ့ပြောင်းနေထိုင်ရကာ အမိုးအကာ၊ အိမ်သာ နှင့် သောက်သုံးရေများ အရေးပေါ် အကူညီလိုအပ် နေကြောင်း စစ်ရှောင်ကူညီသူ ဒေသခံတစ်ဦး ကပြောသည်။

“ဘုန်းကြီးကျောင်းမှာ လူအများနဲ့နေရတာ အဆင်မပြေတော့ အခု စစ်ရှောင်တွေ ထပ်ပြီးရွှေ့နေရတယ်။ အရင်နေရာ နဲ့ ၅ မိုင်လောက်ဝေးတယ်။ ဆီဆိုင်မြို့နဲ့ဆိုရင် ၁၆ မိုင်လောက်ဝေးတယ်။ အဲ့မှာ အိမ်သာတွေလည်း မရှိသေးဘူး၊ သူတို့ ယူလာတဲ့ အမိုးအကာ နဲ့ ပြန်ပြီး အမိုးလုပ်တယ်။ သူတို့နေတဲ့ နေရာနဲ့ ရေရှိတဲ့နေရာကလည်း ဝေးသေးတယ် “ ဟု ၎င်းက ပြောသည်။

စစ်ရှောင်စခန်း

အဆိုပါ စစ်ရှောင် ဦးရေ ၄၀၀ ဝန်းကျင်ထဲတွင် အိမ်ထောင်စု ၁၃၈ စု ရှိပြီး၊ အမျိုးသမီး ၂၅၉ ဦး နှင့် အမျိုးသား ၁၉၀ ဦးရှိကြောင်းလည်း သိရသည်။

ထို့အပြင် စားနပ်ရိက္ခာ နှင့် ပတ်သက်ပြီး စစ်ကောင်စီက “ဆန်ဝယ်ယူလျှင် ရပ်ကွက်ထောက်ခံစာဖြင့် တစ်မိသားစု တစ်စုကို ဆန် ၂ အိတ်အောက်သာ ဝယ်ယူရမည်” ဟု ညွှန်ကြားခဲ့ပြီးနောက် စစ်ရှောင်များသည် စားသုံးရန် မလုံမလောက် ဖြစ်လာကြောင်း သိရသည်။

စစ်ရှောင်စခန်း

“ အခု နောက်ပိုင်း ဆန်တွေဝယ်ရင် ထောက်ခံစာတွေ ယူရတယ်။ ထောက်ခံစာထဲမှာ ဆန် ၂ အိတ်ဘဲ ဝယ်ရမယ်ဆိုရင် အဲ့ချိန်ကျရင် ဆန် ၂ အိတ်ဘဲ ဝယ်ရတယ်ဗျ။ စစ်ကောင်စီ စစ်ဆေးရေးဂိတ်မှာ သူတို့စစ်တယ်၊ မေးတယ်။ ထောက်ခံစာထဲက သတ်မှတ်ထားသာထက် ဆန်တွေ ပိုဝယ်လာရင် အရေးယူခံရမယ်။ ဖမ်းခံရမယ်နဲ့ ဆန်သယ်တဲ့ သူတွေလည်း မသယ်ရဲတော့ဘူး။ စစ်ရှောင်တွေ စားဖို့သောက်ဖို့လည်း မလုံလောက်တော့ဘူး “ ဟု သျှမ်းတောင် စစ်ရှောင်ကူညီသူ အသက် ၃၀ နှစ် အမျိုးသားတစ်ဦးက ပြောသည်။

စားနပ်ရိက္ခာနှင့် ပတ်သက်၍ ဆန်တင်ပို့ရောင်းချသူ အသက် ၅၀ နှစ် ဦးစိန်မောင်ညွှန့် နှင့် စားသောက်ဆိုင် ဖွင့်လှစ်ထားသူ အသက် ၄၀ နှစ် ခွန်စိုးဖြူကို ပြည်သူ့ကာကွယ်တပ်ဖွဲ့ PDF ကိုထောက်ပံ့သည်ဟု စွပ်စွဲကာ စစ်ကောင်စီက ဖမ်းဆီးခဲ့ရာမှာ ယနေ့ အချိန်ထိ ပြန်လွှတ်မြောက်ခြင်း မရှိသေးကြောင်း သိရသည်။

စစ်တပ်က အာဏာသိမ်းပြီးနောက်ပိုင်း တိုက်ပွဲကြောင့် ဆီဆိုင်မြို့နယ်အတွင်းသို့ ထွက်ပြေးတိမ်းရှောင် ခိုလှုံနေသူ စစ်ရှောင် ဦးရေမှာ ( ၇,၀၀၀) ဝန်းကျင် ရှိနေကြောင်း သိရသည်။

Leave a Comments

- Advertisement -spot_img

Latest article