သျှမ်းပြည်အတွင်းရှိ စက်သုံးဆီ အရောင်းဆိုင်များတွင် အကန့်အသတ်ဖြင့်သာ ဆီတင်သွင်းခွင့် ရရှိနိုင်မှုကြောင့် တချို့ ပန့်ဆီဆိုင်များက ပိတ်ထားရကြောင်း သတင်းသိရသည်။
ယခု ဇန်နဝါရီလ တတိယပတ်အတွင်းတွင် သျှမ်းပြည် လားရှိုးခရိုင် လားရှိုးမြို့ နှင့် တန့်ယန်းမြို့၊ ကျောက်မဲခရိုင် ကျောက်မဲမြို့ နှင့် သီပေါမြို့တို့တွင် စက်သုံးဆီ အကန့်အသတ်ဖြင့်သာ ရရှိသည့်အတွက် ဈေးနှုန်းတက်လာသည့်အပြင် တချို့ပန့်ဆီဆိုင်များလည်း ပိတ်ထားရကြောင်း သီပေါမြို့မှ ပန့်ဆီဆိုင်ပိုင်ရှင်တစ်ဦးက သျှမ်းသံတော်ဆင့် ကို ပြောသည်။
“ဆီကုမ္ပဏီက ဆီတွေကို ပန့်ဆီဆိုင်အလိုက် အကန့်အသတ်နဲ့ပဲ ပို့ပေးနေတော့ လိုသလောက် ရောင်းလို့ မရဘူး။ စစ်ကောင်စီရဲ့ မြို့အုပ်ချုပ်ရေးကလည်း တစ်နေ့ကို ဆီဘယ်လောက်ရောင်းရလဲ ဆိုတာတွေကို လိုက်မေးတာရှိတယ်။ အခုဆို ဆီဈေးလည်း တက်နေတာ့ အချို့ ပန့်ဆီဆိုင်တွေက ပိတ်ထားရတယ်၊ ၆ လ ခွင့်တင်ပြီး ပိတ်တာက သီပေါမှာ ၆ ဆိုင်လောက်ရှိတယ်” ဟု ပန့်ဆီဆိုင် ပိတ်ထားသည့် သီပေါမှ ပန့်ဆီဆိုင် ပိုင်ရှင် တစ်ဦးက သျှမ်းသံတော်ဆင့်ကို ပြောသည်။
ထို့အပြင် ပန့်ဆီဆိုင်များ စက်သုံးဆီ ဝယ်ယူရရှိနိုင်ရေးအတွက် အော်ဒါတခါကို ၁၀ ရက် နီးပါး စောင့်ရပြီး လိုသလောက် ပမာဏလည်း မရသည့်အတွက် စက်သုံးဆီ ပန့်ဆီဆိုင်များက ပိတ်ထားရကြောင်း ၎င်းက ဆက်ပြောသည်။
စက်သုံးဆီ ဈေးနှုန်းများသည် ၉၂ တစ်လီတာကို (၂၂၄၀) ကျပ်၊ 95 တစ်လီတာကို (၂၃၀၀) မှ လက်ရှိတွင် ၉၂ တစ်လီတာကို (၂၅၀၀) ကျပ် ၊ 95 တစ်လီတာကို (၂၆၀၀) ဝန်းကျင်အထိ ရှိနေကြောင်းလည်း လားရှိုးမြို့မှ ပန့်ဆီဆိုင် အရောင်းဝန်ထမ်းတစ်ဦးက သျှမ်းသံတော်ဆင့်ကို ပြောသည်။
“ဒီဇယ်တစ်လီတာဆိုရင် ၂၇၀၀ ကျပ် နီးနီးရှိတယ်၊ တခြား စက်သုံးဆီ ဈေးနှုန်းတွေကလည်း တက်လာတယ်၊ စက်သုံးဆီ ကုမ္ပဏီဘက်ကလည်း ပန့်ဆီဆိုင်ကို ကြည့်ပြီး အကန့်အသတ်လောက်ပဲ ရောင်းချပေးနေတော့၊ တစ်နေ့ကို ဘယ်လောက်ပဲ ရောင်းရတယ် ဆိုတာမျိုးတွေ ဖြစ်လာတာပေါ့၊ အဲ့ကြောင့်လည်း တချို့ဆိုင်က ပိတ်လိုက်တာ” ဟု လားရှိုး ပန့်ဆီဆိုင်က ဝန်ထမ်းတစ်ဦးက သျှမ်းသံတော်ဆင့်ကို ပြောသည်။
လက်ရှိ အချိန်သည် မြန်မာငွေကျပ်တန်ဖိုးများ တည်ငြိမ်မှု မရှိသည့်အပြင် တရုတ်နှစ်သစ်ကူးကာလလည်း ဖြစ်နေသည့် တွက် စက်သုံးဆီ ဈေးနှုန်းများလည်း မြင့်တက်လာခြင်း ဖြစ်နိုင်ကြောင်း စက်သုံးဆီ ရောင်းဝယ်ရေး လေ့လာနေသူ လူငယ်တစ်ဦးကလည်း သျှမ်းသံတော်ဆင့်ကို ပြောသည်။
စစ်အာဏာသိမ်းပြီးနောက်ပိုင်း ၂၀၂၂ ခုနှစ် သြဂုတ်လ အတွင်းတွင် မြန်မာတစ်နိုင်ငံလုံး လောင်စာဆီပြတ်လတ်မှု ကြုံခဲ့ရပြီး စက်သုံးဆီ ဈေးနှုန်းများက အဆမတန် စျေးမြင့်တက်လာခဲ့သည်။
ဇူလိုင်လဆန်းပိုင်းမှ စပြီး စက်သုံးဆီဈေးနှုန်းများသည် ၁၆၅၀ ကျပ်အထိ ကျဆင်းလာခဲ့ပြီး ယခုတစ်ဖန်တွင် ကျပ် ၃၀၀၀ နီးနီး ပြန်လည်မြင့်တက်လာခြင်းဖြစ်သည်။
Leave a Comments