သျှမ်းပြည် တောင်ကြီးခရိုင် တောင်ကြီးမြို့နယ် နှင့် ရပ်စောက်မြို့နယ်အတွင်းတွင် ညအချိန်အပြင် နေ့ခင်းပိုင်းမှာလည်း ဓားပြအုပ်စုများ သောင်းကျန်းနေသည့်အတွက် ဒေသခံပြည်သူများက လုံခြုံမှု မရှိဖြစ်နေကြောင်း သတင်း သိရသည်။
ရပ်စောက်မြို့နယ် ယမ်းတွင်းငါးကြောင်ကျေးရွာအုပ်စုအတွင်း ဓားပြအုပ်စု သောင်းကျန်းပြီး ဒေသခံပြည်သူများကို ဓားပြတိုက်ယူနေကြောင်း အမည်မဖော်လိုသူ ရွာသားတစ်ဦးက သျှမ်းသံတော်ဆင့်ကို ပြောသည်။
“ကျနော်တို့ သိရသလောက် ဓားပြအုပ်စုထဲမှာ တောင်ချွန်ရွာက တစ်ယောက်၊ အရှေ့မြို့ရိုးရွာက တစ်ယောက်နဲ့ တခြားရွာက လူတွေပေါင်းပြီး အုပ်စုဖွဲ့ ဓားပြတိုက်နေတယ်။ သူတို့ ကိုင်တဲ့ သေနတ်ကိုလည်း PNO က ထုတ်ပေး ထားတယ်လို့ သိရတယ်၊ နေ့ခင်းလည်း ဓားပြဝင်တာရှိတယ်၊ အခု ဒီကျေးရွာအုပ်စု အတွင်းနဲ့ အနီးနားက ရွာတွေ ဓားပြတိုက်ခံရတာ ၅/၆ ကြိမ်လောက်ရှိပြီ” ဟု ယမ်းတွင်းငါးကြောင်ကျေးရွာအုပ်စုမှ ရွာသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဓားပြအဖွဲ့သည် လူဦးရေ ၁၀ ဦး ဝန်းကျင်ရှိနေပြီး သေနတ်အတို အရှည်ကိုင်ဆောင်ထားကြောင်း နှင့် ၎င်းတို့ ဓားပြတိုက်မှုကို ခံရသည့် ဒေသခံရွာသား နေအိမ်ပေါင်း ၆ အိမ် ဝန်းကျင်ရှိကြောင်းလည်း သိရသည်။
ပြီးခဲ့သည့် ဇန်နဝါရီလ ၁၉ ရက် မွန်းလွဲပိုင်း ၂ နာရီဝန်းကျင် ထီးစံကုန်းရွာမှ နေအိမ်တစ်လုံးတွင် အသက် ၆၀ ကျော် အမျိုးသားတစ်ဦးတည်း အိမ်မှာရှိနေချိန်၌ ဓားပြအုပ်စုမှ ရောက်လာပြီး လက်ထိပ်ခတ် ဓားပြတိုက်ယူ သွားသည့်အတွက် ငွေကျပ်သိန်း ၃၀ နီးပါး ဆုံးရှုံးသွားကြောင်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
“ထီးစံကုန်းရွာမှာ အိမ်စောင့်အဖိုး တစ်ယောက်တည်း ရှိနေချိန် ဓားပြအုပ်စုက လာပြီး အဖိုးကို လက်ထိပ်ခတ်တယ်၊ သေနတ်တချက် ပစ်ဖောက်ပြီး အိမ်တွင်းပစ္စည်းတွေအကုန် ဓားပြတိုက်ယူသွားတယ်၊ သိန်း ၃၀ လောက် ဆုံးသွားတယ်၊ ထီးစံကုန်းရွာ ကဆိုရင် ၃ အိမ် တောင်ရှိပြီ၊ လက်နက်နဲ့ဆိုတော့ ရွာသားတွေ ဘာမှမတတ်နိုင်ကြဘူး၊ ခုတခေါက်နဲ့ဆိုရင် ထီးစံကုန်းရွာမှာ ဓားပြတိုက်ခံရတာ ၃ အိမ်ရှိပြီ” ဟု ၎င်းက ပြောသည်။
ရပ်စောက်မြို့နယ်အတွင်းမှ သမိုင်းကုန်းရွာ၊ လှဲတိုးရွာ၊ အောင်ချမ်းသာရွာ နှင့် ထီးစံကုန်းရွာတို့မှ ပြည်သူများ ဓားပြတိုက်ခံနေရပြီး သက်ဆိုင်ရာ တာဝန်ရှိသူများက မည်သည့် နှိမ်နှင်းမှုမှ မရှိသည့်အတွက် လုံခြုံမှု ကင်းမဲ့နေကြောင်း ဒေသခံများက ပြောဆိုနေကြသည်။
ထို့အပြင် ဇန်နဝါရီလ ၂၂ ရက်နေ့ ညနေပိုင်းအချိန် တောင်ကြီးမြို့ရှိ တောင်ချွန်းတောင်တက် လမ်းတွင်လည်း တောင်တက် လမ်းလျှောက်ထွက်သည့် အမျိုးသမီးငယ် အုပ်စုကို အမည်မသိ အမျိုးသား နှစ်ဦးမှ ဓားထောက်ပြီး လုယက်သည့် ဖြစ်စဥ်လည်း ဖြစ်ပွားခဲ့ကြောင်း သိရသည်။
အဆိုပါ တောင်ချွန်းတောင်တက်လမ်းသည် မနက်ပိုင်း နှင့် ညနေခင်းအချိန်များတွင် အများပြည်သူများ ကျန်းမာရေးအတွက် တောင်တက်လမ်းလျှောက်ရာ နေရာဖြစ်ခဲ့ပြီး ယခု စစ်အာဏာသိမ်းပြီးနောက်ပိုင်း၌ ခိုးဆိုး လုယက်သူများ ပေါများလာပြီး တောင်တက်သူများအတွက် လုံခြုံမှုမရှိကြောင်း အထက်ပါအမျိုးသမီးငယ်က ဆက်ပြောသည်။
“ပြောချင်တာ က ဖြစ်နိုင်ရင် တောင်ချွန်းဘက် မသွား ကြပါနဲ့ safe လည်း မဖြစ်သလို တခုခု ဖြစ်သွားရင် ဘာမှလည်း လုပ်လို့ မရတော့တဲ့ အခြေနေပါ ညီမ တို့လည်း မသိတော့ သွားမိသွားတယ်၊ သင်ခန်းစာလည်း တော်တော်ရလိုက်ပါတယ် ပစ္စည်းဆုံးပေမဲ့ လူဘာမှ မဖြစ်သွားတာပဲ ကံကောင်းတယ် ပြောရမယ်” ဟု အထက်ပါ အမျိုးသမီးက ဆက်ပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်မြို့တော် တောင်ကြီး အပါအဝင် မြို့ကြီးများဖြစ်သည့် လားရှိုးမြို့ ၊ ကျိုင်းတုံမြို့အပြင် နယ်မြို့များလည်း လောင်းကစားဝိုင်းများ နေ့စဉ်ရက်ဆက် တိုးများလာနေပြီး ခိုးဆိုးလုယက်မှုများလည်း တိုးလာကြောင်း ဒေသခံများက ပြောဆိုနေကြသည်။
ယင်းကဲ့သို့ လောင်းကစားဝိုင်း နှင့် ခိုးဆိုးလုယက်မှုများ များပြားလာသော်လည်း တာဝန်ရှိသည့် ရဲ နှင့် လုံခြုံရေးပိုင်းဆိုင်ရာ ဝာာဝန်ရှိသူများက အဆိုပါ ခိုးဆိုးလုယက် ကျူးလွန်သူများကို အရေးယူဆောင်ရွက်နိုင်ခြင်း မရှိသည့်အတွက် လုံခြုံရေး ကင်းမဲ့နေကြောင်းလည်း သိရသည်။
