သျှမ်းပြည် မူဆယ်ခရိုင် မူဆယ်မြို့နယ် ပန်ခမ်းရှိ ပန်းဆေးပြည်သူ့စစ် တပ်သားများ နားနေဆောင် နှင့် အိပ်ဆောင် မီးလောင်မှု ဖြစ်ပွားခဲ့ပြီး ပျက်စီးမှုများရှိကြောင်း သတင်းသိရသည်။
အဆိုပါ မီးလောင်မှုသည် ယနေ့ (ဇန်နဝါရီလ ၂၀) ရက် မွန်းလွဲပိုင်း ၂ နာရီဝန်းကျင်တွင် လျှပ်စစ်ဝါယာ ရှော့ခ်ကြောင့် မီးလောင်မှုဖြစ်ရကြောင်း ပန်ခမ်းဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“မီးလောင်မှု ဖြစ်ခဲ့တာ တကယ်ဟုတ်ပါတယ်၊ လျှပ်စစ်ဝါယောရှော့ခ်ကြောင့် မီးလောင်မှုဖြစ်တယ်လို့ သိရတယ်၊ ပျက်စီးဆုံးရှုံးမှုတွေ ရှိပေမဲ့ အသေးစိတ်တော့ မသိရသေးဘူး၊ သေဆုံးမှု ရှိမရှိတော့ မသိရဘူး၊ ၂ နာရီခွဲကျော်မှ မီးကို ငြိမ်းသွားတယ်” ဟု ပန်ခမ်းဒေသခံတစ်ဦးက သျှမ်းသံတော်ဆင့်ကို ပြောသည်။
ပန်းဆေးပြည်သူ့စစ် တပ်သား နားနေဆောင်နှင့် အိပ်ဆောင် မီးလောင်မှုကို ရပ်ကွက်နေ ပြည်သူများနှင့် မီးသတ်ကား ပူးပေါင်းပြီး နာရီဝက်ခန့်ကြာအောင် မီးငြိမ်းသတ်ခဲ့ရကြောင်း အထက်ပါ ပုဂ္ဂိုလ်ကဆက်ပြောသည်။
ပြီးခဲ့သည့် ဇန်နဝါရီလ ၁၄ ရက်နေ့တွင်လည်း ပန်ခမ်းမှ ပျက်စီးဆုံးရှုံးမှု များပြားသည့် ပြည်သူ့နေအိမ် တစ်လုံး မီးလောင်ပျက်စီးမှု တစ်ခု ဖြစ်ပွားခဲ့သည်။
ယင်းကဲ့သို့ မီးလောင်မှု ဖြစ်ပွားခြင်း နှင့် ပတ်သက်ပြီး ပန်ခမ်းကျေးရွာမှ ဒေသခံ အမျိုးသားတစ်ဦးက လျှပ်စစ်မီးများကို ဂရုတစိုက် အသုံးပြုစေလိုကြောင်း သျှမ်းသံတော်ဆင့်ကို ပြောသည်။
“အခုအချိန်က လျှပ်စစ်မီးဆိုလည်း လာလိုက်ပျက်လိုက်နဲ့ ခဏခဏဖြစ်တော့ ဝါယာတွေ မီးထိန်းတွေ လည်း မနိုင်လောက်ဘူး၊ တခါလေဆို လျှပ်စစ်မီးပျက်ရာကနေ မီးအား ၂၀၀ ချက်ချင်းလာပြီး ပြန်ဖျက် သွားတာရှိတယ်၊ ဒါကြောင့် အိပ်ခါနီး လျှပ်စစ်မီး ပလပ်ပေါက်ဖွင့်ထားတာတို့၊ အားသွင်းထားတာတို့က မလုပ်စေချင်ဘူး၊ အန္တရာယ်များတယ်” ဟု အထက်ပါ ပုဂ္ဂိုလ်က ပြောသည်။
စစ်တပ်မှ နိုင်ငံတော် အာဏာ ထိန်းယူပြီးသည့် အချိန်မှ စတင်ပြီး သျှမ်းပြည် အပါအဝင် တစ်နိုင်ငံလုံး အတိုင်းအတာဖြင့် လျှပ်စစ်မီး ပုံမှန်ရရှိမှု မရှိပဲ မကြာခဏ လျှပ်စစ်မီးဖြတ်တောက်ခံနေရသည့် အတွက် ပြည်သူများက အခက်အခဲ ကြုံတွေ့နေရကြောင်းလည်း သိရသည်။
လက်ရှိတွင် လျှပ်စစ်မီးကို တစ်နေ့တာ ၃ နာရီဖြင့် အလှည့်ကျ ပေးနေပြီး တစ်ခါတရံ မီးလုံးဝ မရသည့် နေ့ရက်များလည်း ရှိကြောင်း ဒေသခံများကပြောဆိုသည်။
Leave a Comments