မြန်မာ – တရုတ်နယ်စပ် ထုန့်မောဝ် (ရွှေလီမြစ်ဝှမ်း) စိုက်ပျိုးရေးသမားများ တပိုင်တနိုင်တင်ပို့နေသည့် နယ်စပ်ဂိတ်များ ပြန်လည်ဖွင့်လှစ်နိုင်ခြင်း မရှိသေးသည့်အတွက် ကြံစိုက်ပျိုးသူများ ခက်ခဲနေဆဲဖြစ်ကြောင်း စုံစမ်း သိရှိရသည်။

ကိုဗစ် – ၁၉ ရောဂါဖြစ်ပွားချိန်မှ စပြီး ယနေ့ထိ ၃ နှစ်ခန့်ကြာ ပိတ်ထားသည့် ရွှေလီမြစ်ဝှမ်းဒေသရှိ တပိုင်တနိုင်တောင်သူများ အသုံးပြုရာ ဒေသလမ်းကြောင်း နယ်စပ်ဂိတ်များကို လက်ရှိ အချိန်ထိ ပြန်လည်ဖွင့်လှစ်ခြင်း မရှိသေးကြောင်း သိရသည်။

ထို့ကြောင့် ရွှေလီမြစ်ဝှမ်းဒေသရှိ တပိုင်တနိုင် တောင်သူများသည် ကြံများတင်ပို့ရောင်းချရန် ခက်ခဲနေကြောင်း၊ တရုတ် – မြန်မာသို့ ပစ္စည်းတင်ပို့ပါက ဂရိန်းစက်ဖြင့် တင်ပို့ရောင်းချနေရသေးကြောင်း နမ့်ခမ်းဒေသခံ တောင်သူ အမျိုးသားတစ်ဦးက သျှမ်းသံတော်ဆင့် ကိုပြောသည်။

“ကျနော်တို့ဖက်က ဘယ်ဂိတ်မှ မဖွင့်သေးဘူး။ အရင်အတိုင်း ဂရိန်းစက်နဲ့ပဲ သယ်ပို့နေရသေးတယ်။ ကျနော်တို့ တောင်သူတွေက ကြံကလွှဲပြီး ဘာမှတင်ပို့လို့ မရဘူး။ တခြားဟာတင်ပို့ချင်ရင် ကျင်စန်းကျော့ဂိတ်ကို သွားပြီး ပို့ရတယ် “ ဟု ၎င်း အမျိုးသားတစ်ဦးက ပြောသည်။

တရုတ်နိုင်ငံတွင် ကိုဗစ် – ၁၉ ရောဂါ အဆမတန် မြှင့်တက်နေသေးသည့်အတွက် နယ်စပ်ဂိတ်များ ဖွင့်လှစ်ခြင်းအပေါ် စိုးရိမ်ချက်များ ရှိနေသော်လည်း တပိုင်တနိုင် စိုက်ပျိုးသူများ အသုံးပြုနေသည့် နယ်စပ်ဂိတ်များ ဖွင့်ပေးပါက တင်ပို့ရောင်းချရာမှာ ပြေလည်လာနိုင်ကြောင်း တောင်သူများက ဆိုသည်။

“နယ်စပ်ဂိတ်တွေ များများဖွင့်လာနိုင်ရင်တော့ ကျနော်တို့ တောင်သူတွေအတွက် ကောင်းတာပေါ့။ နယ်စပ်ဒေသ တလျောက်မှာ ခြံစည်းရိုးတွေ ကာထားတော့ ဘယ်လိုမှ တင်ပို့လို့မရဘူး။ ဂိတ်တွေ ပြန်ဖွင့်လာနိုင်မှ ဘယ်ဟာဘဲဖြစ်ဖြစ် တင်ပို့လို့ အဆင်ပြေသွားမယ်။ ဂိတ်တွေ တကယ်ပြန်ဖွင့်လာရင်တော့ အရင်အခြေနေလိုမျိုး ပြန်ဖြစ်လာမလားဆိုတာကလည်း တချက်တော့ ပြန်ကြည့်ရတာပေါ့ “ ဟု ၎င်း အမျိုးသားက ပြောသည်။

ထို့အပြင် ပြီးခဲ့သည့် ဇန်နဝါရီ ၈ ရက် နံနက်ပိုင်းတွင် တရုတ်နိုင်ငံဘက်ခြမ်းရှိ ကျယ်ဂေါင်ဂိတ်အပါအဝင် ရွှေနန်းတော်ဂိတ်၊ ဆင်ဖြူဂိတ် နှင့် မန့်ဝိန်းဂိတ်၊ ကြူကုတ်(ပန်ဆိုင်း) ဘက်ရှိ နယ်စပ်ဂိတ် နှင့် ချင်းရွှေဟော်ဘက်ရှိ နယ်စပ်ဂိတ်များကို တရုတ်ဘက်က ဖွင့်လှစ်ခဲ့ပြီး မြန်မာဘက်မှာ ပြန်လည်ဖွင့်လှစ်နိုင်ခြင်း မရှိသေးကြောင်း သိရသည်။