သျှမ်းပြည်မြောက်ပိုင်း နမ့်ဆန်မြို့နယ်မှာ စစ်ကောင်စီ နှင့် TNLA တို့ တိုက်ပွဲငြိမ်သက်နေသော်လည်း ဇယန်းကြီး ဘုန်းကြီးကျောင်းတွင် စစ်ရှောင် (၁၀၀၀) နီးပါး ကျန်ရှိနေသေးကြောင်း စုံစမ်းသိရှိရသည်။

ပြီးခဲ့သည့် ဒီဇင်ဘာ (၇) ရက်က စစ်ကောင်စီ နှင့် တအာင်း ( ပလောင်) အမျိုးသားလွတ်မြောက်ရေးတပ်မတော် (TNLA) တို့ နမ့်ဆန်မြို့နယ် ကုန်းသာကျေးရွာအနီး တိုက်ပွဲဖြစ်ပွားမှုကြောင့် ဒေသခံများ တစ်ထောင်ကျော် ထွက်ပြေးတိမ်းရှောင်ခဲ့ရသည်။

“ကျနော်တို့ (၂၀) ရက်နေ့က ဇယန်းကြီးဘုန်းကြီးကျောင်းမှာ သွားရောက်ကူညီတာ စစ်ရှောင် (၁) ထောင် နီးပါးလောက် ကျန်သေးတယ်။ သူတို့တွေက ပြန်လည်ထူထောင်ရေး လုပ်ဖို့အတွက် လိုအပ်တယ်။ သူတို့ အိမ်တွေလည်း ပျက်စီးကုန်သွားပြီလေ” ဟု စစ်ရှောင်များကို သွားရောက်ကူညီပေးနေသည့် အမျိုးသား တစ်ဦးက သျှမ်းသံတော်ဆင့် ကိုပြောသည်။

လက်ရှိ နမ့်ဆန်မြို့နယ်အတွင်း တိုက်ပွဲများ ငြိမ်သက်သွားသော်လည်း တိုက်ပွဲအတွင်း စစ်ကောင်စီဘက်မှ လေကြောင်းလိုင်းဖြင့် တိုက်ခိုက်သဖြင့် ကုန်းသာကျေးရွာရှိ ဒေသခံ ပြည်သူနေအိမ်အပါအဝင် ဘုန်းကြီးကျောင်းများလည်း ပျက်စီးဆုံးရှုံးခဲ့သည်။

“သူတို့တွေ (၂) ပတ်ကျော်လောက် ရောက်ရှိနေပြီ။ စားဝတ်နေရေးအတွက်တော့ ခုထက်ထိတော့ အဆင်ပြေနေသေးတယ် ပြန်လည်ထူထောင်ဖို့အတွက်ပဲ ကျန်တယ်။ လာကူညီတဲ့အဖွဲ့တွေလည်း ခုဖြစ်တဲ့ ပြဿနာပဲ လာရောက်ကူညီပေးနေတယ်။ ရေရှည်အတွက်တော့ မရှိသေးဘူး” ဟု ၎င်းက ထပ်လောင်းပြောသည်။

ပြီးခဲ့သည့် ဒီဇင်ဘာ (၁၆) ရက်တွင် နမ့်ဆန်မြို့ပေါ်သို့ ရောက်ရှိနေသော စစ်ရှောင်တချို့ နေရပ်သို့ ပြန်သွားခဲ့ကြောင်း သိရသည်။

ဒီဇင်ဘာ (၇) ရက်မှ (၁၃) ရက်ထိ စစ်ကောင်စီတပ် နှင် TNLA တပ်ဖွဲ့တို့ အကြား ပြင်းထန်ခဲ့သည့် တိုက်ပွဲကြောင့် ကုန်းသာကျေးရွာက နေအိမ် (၄၄) အိမ်က လက်နက်ကြီး လက်နက်ငယ် ထိမှန်ပျက်စီးပြီး စစ်ရှောင် ထွက်ပြေးရသည့် ကျေးရွာမှ အိမ်များသည် စစ်ကောင်စီ တပ်သားတို့၏ ဖောက်ထွင်းမွေနှောက်ခြင်း လည်း ခံရကြောင်း သိရှိရဿည်။

နမ့်ဆန်မြို့နယ်မှ အာဏာသိမ်း စစ်တပ် နှင့် TNLA တပ်တို့၏ တိုက်ပွဲအတွင်း ဟူးမန်းကျေးရွာသား ၂ ဦး သေဆုံးပြီး ၂ ဦး ထိခိုက်ဒဏ်ရာရရှိနေကြောင်းလည်း သတင်းသိရသည်။