တရုတ်နိုင်ငံဘက်သို့ တင်ပို့ရောင်းချနေသည့် မြန်မာဖရဲသီးများ ပွဲစား မှ တစ်ဆင့်ရောင်းရပြီး ယခုနှစ်ဖရဲသီး ခြံပိုင်ရှင်များ အရှုံးပေါ်နေကြောင်း စုံစမ်း သိရှိရသည်။
အဆိုပါ ဖရဲသီးများ ဈေးမကောင်းသည့်အပြင် တရုတ်ဘက်သို့ တင်ပို့ရန်အတွက် လမ်းတစ်ဝက်တွင် အခွန်များ ပေးဆောင်ရသည့် အတွက်ကြောင့် အမြတ်မကျန်ဘဲ အရှုံးပေါ်နေကြောင်း သိရသည်။
“တရုတ်ဘက်ကို တင်ရောင်းမယ်ဆိုရင် ကိုယ်တိုင်မရောင်းရဘူး။ ပွဲစားတွေနဲ့ပဲ ရောင်းခိုင်းရတယ်။ ကျနော်တို့ ဘက်ကနေ ဈေးနှုန်းတွေလည်း သေချာမသိရဘူး။ အသွားလမ်းတွေမှာ အခွန်ပေးရတာရှိတယ်လေ။ ကားကြီးဆိုတော့ သိန်းကျော်တွေပေးရတယ်။ ဒီနှစ်တော့ ဖရဲသီးတွေကရှုံးတယ်” ဟု ဖရဲသီး ခြံပိုင်ရှင်က ပြောသည်။
ယခု ဒီဇင်ဘာလမှ စပြီး တရုတ်နယ်စပ် ကုန်သွယ်ရေးဂိတ်များကို ပြန်ဖွင့်ပေးခဲ့သော်ကြောင့် ဖရဲသီးများက ပုတ်သိုးမှုများလည်းရှိကြောင်း၊ အမှည့်လွန်မှုလည်း ရှိသောကြောင့် ဈေးကောင်းမရရှိကြကြောင်း မူဆယ်မြို့ ဖရဲပွဲရုံထံမှ သိရသည်။
ထိုအပြင် တရုတ်နိုင်ငံဘက်တွင် ကိုဗစ် တစ်ဖန် ပြန်မြင့်တက်လာသည့် အခြေနေရှိသည့်အတွက်ကြောင့် ဝယ်ယူသူများလည်း နည်းနေကြောင်း သိရသည်။
“ တရုတ်ဘက်လည်း ကိုဗစ် ပြန်ဖြစ်တယ်လေ။ ဝယ်သူတွေလည်း နည်းတယ်။ ပြီးတော့ ဖရဲသီးက လမ်းမှာ ကြာတာရှိတဲ့အတွက်ကြောင့် တရုတ်ဘက်ရောက်တဲ့ချိန်မှာ အမြည့်လွန်တာလည်းရှိတာကြောင့် ဈေးကောင်း သိပ်မရကြတာ။ ဒီနှစ်က ဖရဲသီး အရှုံးပေါ်တယ်” ဟု မူဆယ်မြို့ ဒေသခံတစ်ဦးက ပြောသည်။
ယခင်နှစ်များတွင် ဖရဲသီး တစ်ကီလိုကို ၁၀၀၀ ကျပ် မှ ၁၅၀၀ ကျပ် ဝန်းကျင်ရှိပြီး ယခုနှစ်တွင် တစ်ကီလိုကို ၅၀၀ ကျပ် ဝန်းကျင်သာ ရရှိကြောင်း သိရသည်။
ထိုသို့ တရုတ်ဘက်သို့ တင်သွင်းရာတွင် ဈေးကောင်းမရရှိသည့်အတွက်ကြောင့် ဖရဲခြံပိုင်ရှင်များက ပြည်တွင်း မန္တလေးဘက်သို့ ပြန်ရောင်းသော်လည်း ဈေးကောင်းမရရှိကြောင်း သီပေါမြို့ ဖရဲသီးခြံပိုင်ရှင်တစ်ဦးက ပြောသည်။
“ တရုတ်ဘက်လည်း ဈေးမကောင်းဘူး။ ကျနော်တော့ ပြည်တွင်းထဲပဲ ပြန်ရောင်းတယ်။ မန္တလေးသို့ပဲ ပြန်ပို့ပေးတယ်။ ဒါမဲ့လည်း သူက ဈေးကောင်း မရကြပါဘူး။ ပြီးတော့ လမ်းတွေမှာလည်း အခွန်တွေက ပေးရသေးတော့ အမြတ်မရှိဘူး”ဟု ၎င်းက ပြောသည်။
တရုတ်နိုင်ငံတွင် ပြီးခဲ့သည့် နိုဝင်ဘာ ၂၉ ရက်မှ စပြီး တရုတ်နိုင်ငံ သမ္မတ ရှီကျင့်ဖျင် ၏ ကိုဗစ် သုည မူဝါဒကို ဆန္ဒပြ ကန့်ကွက်ခဲ့ကြပြီး ဒီဇင်ဘာ ၈ ရက်နေ့တွင် Lockdown ဖြေလျှော့ပေးခဲ့ကာ ဒီဇင်ဘာ ၁၅ ရက်နေ့က ကုန်သည်ကားများအတွက် ရှန်တိန် (ကားအစားထိုးမောင်း) စနစ်ကို ဖျက်သိမ်းပေးခဲ့သည်။
Leave a Comments