တရုတ်အစိုးရနှင့် ပတ်သက်သည့်သတင်းများကို စုံစမ်းဖော်ထုတ်ရေးသားခဲ့သည့် တရုတ်သတင်းထောက်တစ်ဦးအား ပြည်နှင်ဒဏ်ပေးပြီး ချက်ချင်းလွှဲပြောင်းပေးရန် တရုတ်အစိုးရက ထိုင်းနိုင်ငံကို ဖိအားပေးတောင်းဆိုလာကြောင်း ဘန်ကောက်ပို့စ်သတင်းတွင် ဖော်ပြသည်။

တရုတ်ကွန်မြူနစ်ပါတီ အရာရှိကြီးများနှင့် ဒေသန္တရအစိုးရ တာဝန်ရှိသူများ ပါဝင်ပတ်သက်နေသည့် အကြီးစားခြစားမှုနှင့် ငွေကြေးလိမ်လည်မှု ကွန်ရက်ကို ဖော်ထုတ်ခဲ့သူ ဂျာနယ်လစ် ပိုင်ကျောက်တုန်း (Bai Zhaodong) အား ချက်ချင်းပြန်ပို့ရန် ပေကျင်းဘက်က ဘန်ကောက်အစိုးရအပေါ် ဖိအားပေးနေကြောင်း နယ်စည်းမခြား သတင်းထောက်များအဖွဲ့ (Reporters Without Borders) နှင့် Safeguard Defenders အဖွဲ့တို့က ဗုဒ္ဓဟူးနေ့တွင် ပူးတွဲထုတ်ပြန်ခဲ့သည်။

၎င်းသည် သတင်းဖော်ထုတ်မှုကြောင့် အာဏာပိုင်များ၏ စောင့်ကြည့်ခြင်း၊ စစ်ဆေးမေးမြန်းခြင်းနှင့် ဖမ်းဆီးခြင်းများ ကြုံတွေ့ခဲ့ရပြီးနောက် ၂၀၂၃ ခုနှစ်တွင် တရုတ်နိုင်ငံမှ ထွက်ပြေးခဲ့သူ ဖြစ်သည်။ ဂျာနယ်လစ် ပိုင် ကို ပြီးခဲ့သည့် ဇန်နဝါရီလကတည်းက ထိုင်းအာဏာပိုင်များမှ ဖမ်းဆီးထိန်းသိမ်းခဲ့ပြီး လက်ရှိတွင် ဘန်ကောက်မြို့ စွမ်းပလူး (Suan Phlu) လူဝင်မှုကြီးကြပ်ရေး ထိန်းသိမ်းရေးစင်တာတွင် ထိန်းသိမ်းထားကြောင်း သိရသည်။

တရုတ်နိုင်ငံခြားရေးဝန်ကြီးဌာနက ရိုက်တာသတင်းဌာနသို့ စာဖြင့်ပြန်လည်ဖြေကြားရာတွင် ‘ပိုင်’ သည် အစိုးရဝန်ထမ်းမဟုတ်သူတစ်ဦးထံမှ ငွေညှစ်ခြင်းနှင့် လာဘ်ပေးလာဘ်ယူမှုများ ပြုလုပ်ခဲ့သည်ဟု သံသယရှိကြောင်း၊ ထို့ကြောင့် ထိုင်းနိုင်ငံသို့ ဝရမ်းတောင်းခံစာ တင်သွင်းထားခြင်းဖြစ်ကြောင်း ပြောသည်။

သို့သော်လည်း Safeguard Defenders အဖွဲ့မှ ဒါရိုက်တာ လော်ရာ ဟာ့တ် က “နိုင်ငံရေးအရ ဖိနှိပ်မှုတွေကြောင့် ရှာဖွေခံနေရသူတွေကို အတင်းအဓမ္မ ပြန်လည်လွှဲပြောင်းပေးဖို့ တရုတ်နိုင်ငံဘက်က ပေးလာတဲ့ ဖိအားတွေကို ထိုင်းအာဏာပိုင်တွေအနေနဲ့ ကြံ့ကြံ့ခံရမှာဖြစ်ပြီး နိုင်ငံတကာနဲ့ ပြည်တွင်း ညှင်းပန်းနှိပ်စက်မှု ပိတ်ပင်တားဆီးရေး ကတိကဝတ်တွေကို လိုက်နာရပါမယ်” ဟု တိုက်တွန်းထားသည်။

သတင်းထောက် ‘ပိုင်’ အပြင် ဟောင်ကောင် ဒီမိုကရေစီအရေး တက်ကြွလှုပ်ရှားသူ ကျန်းရှင်းယန့် (Zhang Xinyan) ကိုလည်း ကနေဒါနိုင်ငံသို့ ဒုက္ခသည်အစီအစဉ်ဖြင့် မထွက်ခွာမီ နာရီပိုင်းအလိုတွင် ဖမ်းဆီးခဲ့ပြီး ထိုထိန်းသိမ်းရေးစင်တာတွင်ပဲ ဖမ်းဆီးထားကြောင်း သိရသည်။

အသက် ၅၅ နှစ်အရွယ်ရှိ မစ္စကျန်းသည် ပေကျင်းက ပြဌာန်းထားသည့် အမျိုးသားလုံခြုံရေးဥပဒေအရ နိုင်ငံတော်ပုန်ကန်မှုဖြင့် ၂၀၂၅ ခုနှစ် ဇူလိုင်လတွင် ဟောင်ကောင်ရဲတပ်ဖွဲ့က ဖမ်းဝရမ်းထုတ်ထားသည့် ပြည်ပအခြေစိုက် တက်ကြွလှုပ်ရှားသူ ၁၉ ဦးအနက် တစ်ဦးဖြစ်သည်။

အလားတူ ပြီးခဲ့သည့် ဇွန်လအတွင်းက မြန်မာ့အရေးသုတေသီနှင့် မြန်မာ့မဟာဗျူဟာနှင့် မူဝါဒလေ့လာရေးအင်စတီကျူ (ISP-Myanmar) ၏ အမှုဆောင်ညွှန်ကြားရေးမှူး ဦးမင်းဇင်ကိုလည်း တရုတ်နိုင်ငံသို့ ဆွေးနွေးပွဲသွားရောက်စဉ် ကူမင်းလေဆိပ်၌ ဖမ်းဆီးခဲ့သည်။

မြန်မာလူမျိုး အမေရိကန်နိုင်ငံသားဖြစ်သူ ဦးမင်းဇင်အား တရုတ်မှ သူလျှိုလုပ်မှုနှင့် နိုင်ငံတော်လုံခြုံရေးကို ထိခိုက်စေမှုတို့ဖြင့် တရားဝင်ဖမ်းဆီးထားကြောင်း တရုတ်နိုင်ငံခြားရေးဝန်ကြီးဌာနမှ သတင်းထုတ်ပြန်ထားသည်။

နယ်စည်းမခြား သတင်းထောက်များအဖွဲ့၏ အာရှပစိဖိတ်ဒေသဆိုင်ရာ မန်နေဂျာ အလက်ဇန္ဒြာ ဘီလာကိုစကာ (Aleksandra Bielakowska) က တရုတ်အစိုးရသည် လက်ရှိတွင် ဂျာနယ်လစ် ၁၂၀ ဦး အထိ ဖမ်းဆီးထားပြီး ကမ္ဘာပေါ်၌ သတင်းထောက်များကို အများဆုံး ဖမ်းဆီး ထောင်ချထားသည့် နိုင်ငံဖြစ်ကြောင်း ပြောကြားထားသည်။

ကိုးကား – Bangkok Post