တရုတ်နိုင်ငံသို့ ရောက်ရှိနေသည့် စစ်ခေါင်းဆောင် မင်းအောင်လှိုင်နှင့် အိန္ဒိယဝန်ကြီးချုပ် မိုဒီ တို့ တွေ့ဆုံခဲ့စဉ် မြေရှားသတ္တုတူးဖော်ရေးကဏ္ဍတွင် ပူးပေါင်းဆောင်ရွက်နိုင်ရေး ဆွေးနွေးခဲ့ကြကြောင်း သတင်းသိရသည်။

ယမန်နေ့ (ဩဂုတ်လ ၃၁ ရက်) တွင် တရုတ်နိုင်ငံ တီယန်ကျင်း၌ ကျင်းပလျက်ရှိသည့် ရှန်ဟိုင်းပူးပေါင်းဆောင်ရွက်ရေးအဖွဲ့ SCO ဆွေးနွေးပွဲမတိုင်မီ စစ်ခေါင်းဆောင် မင်းအောင်လှိုင်နှင့် အိန္ဒိယဝန်ကြီးချုပ် နာရိန်ဒြာမိုဒီ တို့ သီးသန့်တွေ့ဆုံခဲ့သည်။

ထိုသို့ တွေ့ဆုံဆွေးနွေးခဲ့စဉ် မြေရှားသတ္တု တူးဖော်ရေး အပါအဝင် ကုန်သွယ်ရေး၊ စွမ်းအင်နှင့် လုံခြုံရေးကဏ္ဍများတွင် ဆက်ဆံရေး တိုးမြင့်ရန် သဘောတူခဲ့ကြောင်း အိန္ဒိယဝန်ကြီးချုပ်၏ လူမှုကွန်ရက် စာမျက်နှာတွင် ထုတ်ပြန်ခဲ့ပြီး စစ်ကော်မရှင် ကျင်းပမည့် ရွေးကောက်ပွဲသို့ လေ့လာစောင့်ကြည့်ရေးအဖွဲ့များ စေလွှတ်သွားမည်ဟုလည်း ဆိုထားသည်။

လက်ရှိ မြန်မာနိုင်ငံတွင် မြေရှားသတ္တုကို ကချင်ပြည်နယ်အတွင်း ကချင်လွတ်လပ်ရေးတပ် KIA ထိန်းချုပ်ဒေသများ၊ သျှမ်းပြည်အရှေ့ပိုင်းရှိ ‘ဝ’တပ်ဖွဲ့ UWSA နှင့် မိုင်းလားတပ်ဖွဲ့ NDAA ထိန်းချုပ်ဒေသများတွင် အကြီးအကျယ် တူးဖော်နေကြပြီး တရုတ်နိုင်ငံသို့ အဓိက တင်ပို့ရောင်းချလျက် ရှိသော်လည်း စစ်ကော်မရှင်က ၎င်းတို့ကို ထိန်းချုပ်နိုင်ခြင်း မရှိကြောင်း စစ်ရေးလေ့လာသုံးသပ်သူများက ပြောသည်။

ပြီးခဲ့သည့် ဩဂုတ်လ ၃၀ ရက်တွင် စစ်ခေါင်းဆောင်နှင့် တရုတ်သမ္မတ ရှီကျင့်ဖျင်တို့ တွေ့ဆုံခဲ့စဉ်ကလည်း ပိုးလမ်းမစီမံကိန်း OBOR နှင့် တရုတ်-မြန်မာ စီးပွားရေးစင်္ကြံ CMEC ၌ ပါဝင်သည့် စီမံကိန်းများကို အရှိန်အဟုန် မြှင့်တင်ရေး၊ သဘာဝ သယံဇာတနှင့် ကုန်သွယ်မှု ပူးပေါင်းဆောင်ရွက်ရေး၊ နယ်စပ်ဒေသ တည်ငြိမ်အေးချမ်းရေးတို့ကို ဆွေးနွေးခဲ့ကြောင်း သိရသည်။

ထို့အပြင် တရုတ်ထံမှ ဂြိုလ်တုနည်းပညာ ရရှိရေးအတွက်လည်း စစ်ခေါင်းဆောင်နှင့် ဝူဟန်တက္ကသိုလ် ဒုတိယ အဓိပတိ တို့ တွေ့ဆုံချိန်၌ ဆွေးနွေးခဲ့ကြောင်း စစ်ကော်မရှင်ဘက်က သတင်းထုတ်ပြန်ထားပြီး ဆိပ်ကမ်းမြို့သို့ သွားရောက်လေ့လာခြင်းများ ပြုလုပ်ခဲ့ကြောင်း ဆိုထားသည်။

တရုတ်-မြန်မာ စီးပွားရေးလုပ်ငန်းရှင်များနှင့် တွေ့ဆုံစဉ် မူဆယ်မြို့မှ မန္တလေးမြို့သို့ ချိတ်ဆက်ဖောက်လုပ်မည့် မန္တလေး-မူဆယ် မီးရထားလမ်းသည် တရုတ်နိုင်ငံတွင် ဆောက်လုပ်နေသည့် ပေကျင်း-ကူမင်း-ရွှေလီ အမြန်ရထားလမ်းပိုင်းနှင့် ချိတ်ဆက်မည်ဟု စစ်ခေါင်းဆောင်က ပြောဆိုခဲ့သည်။

အလားတူ ယနေ့ (စက်တင်ဘာလ ၁ ရက်) တွင်လည်း စစ်ခေါင်းဆောင်သည် လာအိုသမ္မတနှင့် တရုတ်နိုင်ငံတွင် သီးသန့်တွေ့ဆုံကာ နှစ်နိုင်ငံ ပူးပေါင်းဆောင်ရွက်မှု မြှင့်တင်ရေး ဆွေးနွေးခဲ့ကြောင်း သိရသည်။

စစ်ခေါင်းဆောင်သည် ဩဂုတ်လ ၃၀ ရက်မှ စက်တင်ဘာလ ၃ ရက်အထိ တရုတ်နိုင်ငံတွင် ကျင်းပနေသည့် တရုတ်ပြည်သူများ၏ ဂျပန်ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ် ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားသို့ တက်ရောက်ရန် ရောက်ရှိနေကြခြင်းဖြစ်သည်။