တရုတ်နိုင်ငံပြင်ပရှိ လူပုဂ္ဂိုလ်များနှင့် အဖွဲ့အစည်းများကိုပါ ဥပဒေကြောင်းအရ အရေးယူပိုင်ခွင့်ရှိမည့် တရုတ်နိုင်ငံ၏ “အမျိုးသားစည်းလုံးညီညွတ်ရေး ဥပဒေသစ်” အပေါ် ဝေဖန်မှုများ ထွက်ပေါ်နေသော်လည်း ထိုဥပဒေမှာ တရားဝင်ပြီး လိုအပ်ချက်တစ်ခုဖြစ်ကြောင်း တရုတ်အဆင့်မြင့်အရာရှိတစ်ဦးက ပြောကြားလိုက်သည်။

ပြီးခဲ့သည့် ဇွန်လ ၂၄ ရက် (ဗုဒ္ဓဟူးနေ့) က တရုတ်နိုင်ငံ၊ ပေကျင်းမြို့ရှိ တရုတ်နိုင်ငံတော်ကောင်စီ ပြန်ကြားရေးရုံး (SCIO) တွင် ပြုလုပ်ခဲ့သည့် သတင်းစာရှင်းလင်းပွဲတွင် တရုတ်နိုင်ငံ တရားရေးဝန်ကြီးဌာန ဒုတိယဝန်ကြီး ဟူဝေလီ (Hu Weilie) က အဆိုပါဥပဒေအား ဝေဖန်မှုများအပေါ် ကာကွယ်ပြောဆိုလိုက်ခြင်းဖြစ်သည်။

ထိုဥပဒေကို ပြီးခဲ့သည့် မတ်လက အတည်ပြုခဲ့ခြင်းဖြစ်ပြီး လာမည့် ဇူလိုင်လ ၁ ရက်တွင် စတင်သက်ရောက်တော့မည် ဖြစ်သည်။

ဥပဒေတွင်းပါရှိသော အပိုဒ်ခွဲတစ်ခုအရ တရုတ်နိုင်ငံပြင်ပရှိ မည်သူမဆို “အမျိုးသားစည်းလုံးညီညွတ်ရေးနှင့် တိုးတက်မှု” ကို ထိခိုက်ပျက်ပြားစေရန် လုပ်ဆောင်ခြင်း သို့မဟုတ် လူမျိုးရေးခွဲထွက်ရေးဝါဒကို လှုံ့ဆော်ခြင်းများ ပြုလုပ််လျှင် ဥပဒေကြောင်းအရ ထိရောက်စွာ အရေးယူမည်ဟု ပြဋ္ဌာန်းထားခြင်းကြောင့် ပြည်ပနိုင်ငံများနှင့် လူ့အခွင့်အရေးအဖွဲ့များအကြား ဝေဖန်မှုများ ပြင်းထန်နေချိန်တွင် တရုတ်အာဏာပိုင်များက ယခုကဲ့သို့ တုံ့ပြန်လိုက်ခြင်း ဖြစ်သည်။

သတင်းစာရှင်းလင်းပွဲ၌ ဒုတိယဝန်ကြီးက ပြည်ပရောက်ပုဂ္ဂိုလ်များအပေါ် အရေးယူနိုင်သည့် ပြဋ္ဌာန်းချက်နှင့် ပတ်သက်၍ ဝေဖန်မှုများသည် ဥပဒေကို နားလည်မှုလွဲမှားခြင်းဖြစ်ကြောင်း ပြောဆိုသည်။

“ဒီပြဋ္ဌာန်းချက်ဟာ တရုတ်နိုင်ငံရဲ့ အမျိုးသားရေးအခြေအနေတွေအပေါ် မူတည်ပြီး ရေးဆွဲထားတာဖြစ်ပြီး၊ ဥပဒေရေးရာအခြေခံမူတွေ၊ နိုင်ငံတကာလုပ်ထုံးလုပ်နည်းတွေနဲ့ ကိုက်ညီမှုရှိပါတယ်။ ဒါဟာ တရားဝင်ဖြစ်ပြီး၊ ဥပဒေနဲ့အညီ အမှန်တကယ်လိုအပ်တဲ့ လက်တွေ့လုပ်ဆောင်နိုင်တဲ့ ဥပဒေပြဋ္ဌာန်းချက်တစ်ခု ဖြစ်တယ်” ဟု ဟူဝေလီ က ပြောကြားခဲ့သည်။

၎င်း၏အဆိုအရ ကမ္ဘာတစ်ဝန်းရှိ နိုင်ငံများအနေဖြင့် ပြည်တွင်းဥပဒေပြုမှုများမှတစ်ဆင့် ခွဲထွက်ရေးလှုပ်ရှားမှုများကို တားဆီးရန်နှင့် လူမှုအဖွဲ့အစည်းတည်ငြိမ်အောင် ထိန်းသိမ်းပိုင်ခွင့်ရှိသည်ဟု ဖော်ပြထားသည်။

ယခုဥပဒေသည် တရုတ်နိုင်ငံပြင်ပမှ မြစ်ဖျားခံလာသည့် တရားမဝင်လှုပ်ရှားမှုများကို ကာကွယ်ရန် ဥပဒေကြောင်းအရ အစီအမံများကို အသုံးပြုခြင်းသာဖြစ်ကြောင်း ရှင်းလင်းခဲ့သည်။

ထိုဥပဒေကို ကျင့်သုံးခြင်းဖြင့် တရုတ်နိုင်ငံ၏ အချုပ်အခြာအာဏာ၊ လုံခြုံရေးနှင့် ဖွံ့ဖြိုးတိုးတက်မှု အကျိုးစီးပွားများကို ကာကွယ်စောင့်ရှောက်နိုင်မည့်အပြင်၊ တိုင်းရင်းသားလူမျိုးပေါင်းစုံ၏ ဥပဒေကြောင်းအရ ရရှိပိုင်ခွင့်များကိုပါ အကာအကွယ်ပေးနိုင်မည်ဖြစ်ကြောင်းဖော်ပြထားသည်။

သို့သော်လည်း ယခုဥပဒေသည် တရုတ်နိုင်ငံနှင့် အခြားနိုင်ငံများအကြား ပညာရပ်ဆိုင်ရာ ဆွေးနွေးမှုများ၊ စီးပွားရေး၊ ကုန်သွယ်မှုနှင့် လူထုအခြေပြု ပုံမှန်ကူးလူးဆက်ဆံမှုများကိုမူ ထိခိုက်စေမည်မဟုတ်ကြောင်း ၎င်းက ဖြည့်စွက်ပြောဆိုသွားခဲ့သည်။

ဆက်လက်ပြီး တရုတ်နိုင်ငံက ပြည်ပရောက်ပုဂ္ဂိုလ်များနှင့် အဖွဲ့အစည်းများကိုပါ အချုပ်အခြာအာဏာအကြောင်းပြ၍ ဥပဒေကြောင်းအရ ဖြန့်ကျက်အရေးယူနိုင်မည့် ဥပဒေများ တိုးမြှင့်ပြဋ္ဌာန်းလာခြင်းသည် မြန်မာ့အရေးနှင့် တိုင်းရင်းသားရေးရာများကို လေ့လာစောင့်ကြည့်နေသည့် သုတေသနအဖွဲ့အစည်းများနှင့် တက်ကြွလှုပ်ရှားသူများအပေါ် ဖိအားနှင့် စိုးရိမ်မှုများကို ပိုမိုမြင့်တက်စေခဲ့သည်။

အထူးသဖြင့် ပြီးခဲ့သည့် ဇွန်လဆန်းပိုင်းက မြန်မာလူမျိုး အမေရိကန်နိုင်ငံသား၊ မြန်မာ့မဟာဗျူဟာနှင့် မူဝါဒလေ့လာရေးအင်စတီကျု (ISP-Myanmar) ၏ အမှုဆောင်ဒါရိုက်တာ ဦးမင်းဇင် ဖမ်းဆီးထိန်းသိမ်းခံခဲ့ရသည့် ဖြစ်စဉ်နောက်ပိုင်းတွင် တရုတ်၏ နယ်စပ်ဖြတ်ကျော် လွှမ်းမိုးမှုများနှင့် ပြည်ပအခြေစိုက် သုတေသီများအပေါ် ဖိအားပေးမှု အကြောင်းအရာများသည် ပိုမိုထင်ရှားလာခဲ့သည်။

လေ့လာဆန်းစစ်သူများ၏ သုံးသပ်ချက်အရ ယခုကဲ့သို့သော ဥပဒေပြဋ္ဌာန်းချက်များသည် တရုတ်-မြန်မာနယ်စပ် တည်ငြိမ်ရေးနှင့် တိုင်းရင်းသားလက်နက်ကိုင်အဖွဲ့အစည်းများ (EROs) အပေါ် တရုတ်၏ မူဝါဒများကို လွတ်လပ်စွာ ဝေဖန်ထောက်ပြနေသည့် သုတေသနလုပ်ငန်းများ၊ ပညာရှင်များနှင့် သတင်းမီဒီယာနယ်ပယ်များအပေါ် တရားဝင်အကာအကွယ်ယူ၍ ပိုမိုခြိမ်းခြောက် နှိပ်ကွပ်လာနိုင်ကြောင်း စိုးရိမ်ပူပန်မှုများ ရှိနေကြသည်။

ကိုးကား – China News, Khaosod English