တရုတ်နိုင်ငံ၏ ကြားဝင်စီစဉ်မှုဖြင့် စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ ကူမင်းမြို့၌ ထပ်မံတွေ့ဆုံခဲ့သော်လည်း ဆွေးနွေးပွဲ မအောင်မြင်ဘဲ ပြီးဆုံးခဲ့ရကြောင်း TNLA ဘက်မှ ထုတ်ပြန်လိုက်သည်။

ဧပြီလ ၂၈-၂၉ ရက်တို့တွင် တရုတ်နိုင်ငံ၏ ကြားဝင်စီစဉ်မှုဖြင့် TNLA မှ ဒုတိယဗိုလ်ချုပ်ကြီး တားဂျုတ်ဂျား ဦးဆောင်သည့် ကိုယ်စားလှယ်အဖွဲ့နှင့် စစ်ကောင်စီဘက်မှ ဒုတိယဗိုလ်ချုပ်ကြီး ကိုကိုဦး ဦးဆောင်သည့် အဖွဲ့တို့ ကူမင်းမြို့၌ ထပ်မံတွေ့ဆုံ ဆွေးနွေးခဲ့ကြသည်။

၎င်းဆွေးနွေးပွဲအတွင်း စစ်ကောင်စီကိုယ်စားလှယ်များဘက်မှ TNLA ထိန်းချုပ်ထားသည့် နောင်ချို၊ ကျောက်မဲ၊ သီပေါ၊ မိုးကုတ်နှင့် မိုးမိတ် စသည့် ဒေသများကို လက်လွတ်ပြီး ပလောင်ကိုယ်ပိုင်အုပ်ချုပ်ခွင့်ရဒေသ ဖြစ်သည့် နမ့်ဆန်နှင့် မန်တုံမြို့နယ်အထိ TNLA တပ်ဆုတ်ခွာရန် တောင်းဆိုခဲ့ကြောင်း TNLA ထုတ်ပြန်ချက်တွင် ရေးသားထားသည်။

စစ်ကောင်စီ၏ တောင်းဆိုချက်ကို TNLA ဘက်မှ သဘောမတူနိုင်သဖြင့် နှစ်ဘက်အပြန်အလှန် ဆွေးနွေးမှု ထပ်ဆင့်မတိုးနိုင်ဘဲ အပစ်အခတ်ရပ်စဲနိုင်ရန်အတွက် လာမည့် ဩဂုတ်လတွင် ထပ်မံတွေ့ဆုံမည်ဟု TNLA ဘက်က ပြောဆိုသည်။

တရုတ်-မြန်မာ နယ်စပ်ကုန်သွယ်ရေးလမ်းကြောင်း ပြန်ဖွင့်နိုင်ရန်၊ ဒေသတည်ငြိမ်အေးချမ်းရန်နှင့် ကိုးကန့်တပ်ဖွဲ့ MNDAA ကဲ့သို့ တစ်ဆင့်တိုး အပစ်အခတ် ရပ်စဲရေး ပြုလုပ်နိုင်ရန် တရုတ်အထူးကိုယ်စားလှယ် မစ္စတာ တိန့်ရှီကျွင်းမှ ကမကထပြု၍ စစ်ကောင်စီနှင့် TNLA ကြား နှစ်ဘက်တွေ့ဆုံမှုများ အလျင်အမြန် တိုးမြှင့်လုပ်ဆောင်နေကြောင်း TNLA ထုတ်ပြန်ချက်တွင် ပါရှိသည်။

ညီနောင်မဟာမိတ် ၃ ဖွဲ့သည် အင်အားပြင်း ငလျင်ကြီးနှင့် နောက်ဆက်တွဲ ငလျင်ငယ်များ လှုပ်ခတ်မှုကြောင့် ကယ်ဆယ်ရေးလုပ်ငန်းစဉ်များ ဆက်လက်ဆောင်ရွက်ရန် အချိန်ထပ်မံ လိုအပ်နေခြင်းကြောင့် မေလ (၁) ရက်မှ (၃၁) ရက်နေ့အထိ လူသားချင်း စာနာထောက်ထားမှုဆိုင်ရာ အပစ်ရပ်ကာလ ထပ်မံ၍ နောက်ထပ် (၁) လ ထပ်မံသက်တမ်းတိုးထားသည်။

အခြားတစ်ဘက်တွင် စစ်ကောင်စီဘက်မှ ယာယီအပစ်ရပ်ထားစဉ်အတွင်း TNLA ထိန်းချုပ်ထားသည့် မိုးကုတ်နှင့် နောင်ချိုမြို့နယ်ထဲသို့ လေကြောင်းဗုံးကြဲ တိုက်ခိုက်မှုများ ပြုလုပ်ခဲ့သည့်အပြင် တိုက်ပွဲပြင်းထန်နေသည့် တောင်းခမ်းဒေသတွင် အဆိပ်ငွေ့ဗုံးများလည်း ကြဲချတိုက်ခိုက်ခဲ့ကြောင်း TNLA ဘက်မှ ထုတ်ပြန်သည်။