သျှမ်းပြည်မြောက်ပိုင်း နမ့်ဆန်မြို့ ဇယန်းကြီးဘုန်းကြီးကျောင်းတွင် စစ်ဘေးရှောင် ၇၀၀ နီးပါး နေရပ် မပြန်နိုင်သေးကြောင်း စုံစမ်းသိရှိရသည်။

စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့ တိုက်ပွဲငြိမ်သွားသော်လည်း တစ်ချို့က နေရပ်ပြန်သွားပြီး တစ်ချို့က နေရပ် မပြန်နိုင်သေးကြောင်း စစ်ဘေးရှောင်ကူညီပေးသည့် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ တစ်ချို့တော့ ပြန်သွားကြပြီ။ တစ်ချို့ကတော့ ရှိနေသေးတယ်။ ၇၀၀ နီးပါးလောက်တော့ ရှိနေတယ်။ မပြန်သေးတဲ့ သူက အသက်ကြီးတဲ့သူနဲ့ ကလေးတွေ ဖြစ်တယ်။ တချို့အိမ်တွေ ပျက်စီးသွားတာရှိတယ်။ တချို့က ပြာကျသွားတာရှိတယ်လေ။ အဲ့ကြောင့် မပြန်နိုင်ကြသေးဘူး” ဟု စစ်ဘေးရှောင်ကို ကူညီပေးသည့် အမျိုးသမီးက ပြောသည်။

အဆိုပါ စစ်ကောင်စီ၏ လက်နက်ကြီးကြောင့် နေအိမ် ၅၀ ခန့် ပျက်စီးဆုံးရှုံးသွားပြီး ၅ အိမ်ခန့်မှာ မီးရှို့ဖျက်စီးခံခဲ့ရပြီး ပြာကျသွားကြောင်း သိရသည်။

ထိုသို့ စစ်ဘေးရှောင်များ လက်ရှိအချိန်တွင် နေရပ်သို့ ပြန်သွားပြီး နေအိမ်ပြန်တွေ့ပါက စိတ်ထိခိုက် ဒဏ်ရာရရှိနိုင်သောကြောင့် နေရပ်သို့ မပေးပြန်သေးကြောင်း စစ်ရှောင်များကို ကူညီပေးနေသည့် အမျိုးသမီး ထံမှ သိရသည်။

“လက်နက်ကြီးကြောင့် နေအိမ် ၅၀ လောက် ပျက်စီးသွားတယ်။ သူတို့ မီးရှို့ဖျက်ဆီးပြီး ပြာကျသွားတာတော့ ၅ အိမ်လောက်ရှိမယ်ထင်တယ်။ သူတို့ အခုပြန်သွားပြီး နေအိမ်တွေကို ပြန်သွားတွေ့ရင် စိတ်ထိခိုက် ဒဏ်ရာရမှာလည်း စိုးရိမ်တယ်လေ” ဟု အထက်ပါ ကူညီပေးသူက ပြောသည်။

စစ်ကောင်စီ နှင့် TNLA တို့သည် ဒီဇင်ဘာ ၇ ရက်က စတင် တိုက်ပွဲဖြစ်ပွားခဲ့ပြီး ဒီဇင်ဘာ ၁၃ ရက် နောက်ပိုင်း တိုက်ပွဲငြိမ်ခဲ့ကြောင်း သိရှိရသည်။

တိုက်ပွဲကြောင့် ပြည်သူ ၁,၀၀၀ ခန့် စစ်ဘေးတိမ်းရှောင်ခဲ့ရပြီး လက်ရှိမှာ ၃၀၀ ကျော်ခန့်က နေရပ်သို့ ပြန်သွားခဲ့ကြောင်း သိရသည်။

အဆိုပါ တိုက်ပွဲသည်လည်း စစ်ကောင်စီသည် PDF တပ်ဖွဲ့များရှိသည့်အထင်ဖြင့် နားလည်မှုလွှဲပြီး ပစ်ခတ်ခဲ့ကြောင်း ယမန်နေ့ (ဒီဇင်ဘာ ၁၇) ရက် တွင် ထုတ်ပြန်ခဲ့သည်။