မြေဖြူကိုင်တဲ့ လက်ဟာ လက်နက်ကိုင်ဆောင်ပြီး တော်လှန်ရေးထဲ ဝင်ရောက်လာရမယ်လို့ တကြိမ်တခါမှ ကိုအာကာ တယောက် စိတ်ကူးမယဥ်မိပါဘူး။
ဒါပေမယ့် ၂၀၂၁ ခုနှစ် ဖေဖော်ဝါရီ ၁ ရက် စစ်တပ် အာဏာသိမ်းမှုကြောင့် မထင်မှတ်တဲ့ စိတ်ကူးတောင် မယဥ်ခဲ့တဲ့ ကိစ္စဟာ ဖြစ်လာတော့တာပဲ။
ကိုအာကာ တယောက် က သျှမ်းပြည်တောင်ပိုင်း ရွာငံမြို့နယ်ရှိ ကျေးရွာတခုမှာ ကလေးငယ်တွေကို စာသင်တဲ့ သူ တစ်ဦး ဖြစ်ပြီး၊ ကလေးငယ်တွေရဲ့ အနာဂတ် နဲ့ ကျေးလက်ဒေသ ဖွံ့ဖြိုးရေးအတွက် စိတ်အားထက်သန်စွာ ကြိုးစားနေတဲ့သူ တစ်ဦးပါ။
“ကျနော်က ကလေးတွေကို စာသင်တဲ့သူလေ၊။ ဒီလို လက်နက်ကိုင်ပြီး တော်လှန်ရေး လောကထဲဝင်ရမယ် ဆိုတာ မထင်ထားဘူး။ ကလေးတွေရဲ့ စာဖတ်သံ ခေါင်းလောင်းသံတွေကိုတော့ သတိရတယ်” လို့ ကိုအာကာ တစ်ယောက် ဝမ်းနည်းစွာ ပြောပြပါတယ်။
စစ်ကောင်စီ ဟာ အခုနှစ် ဧပြီလ ၁၆ ရက်မှာ ကိုအာကာ နေထိုင်တဲ့ ရွာငံမြို့နယ် ပဲရင်းတောင်ကျေးရွာထဲက နိုင်ငံရေးအကြောင်း မသိတဲ့ ပြည်သူတွေ၊ ဘာအပြစ်မှ မရှိတဲ့ ပြည်သူ (၉) ဦးကို ပျူစောထီး အကူညီနဲ့ စစ်ကောင်စီက ရက်စက်စွာ သတ်ဖြတ်ခဲ့ပါတယ်။
အဲ့ဒီ သတ်ခံရတဲ့ သူတွေထဲမှာ ကိုအာကာရဲ့ ဆွေမျိုးတွေလည်း ပါဝင်ပါတယ်။
ဒါ့ကြောင့် ကိုအာဏာဟာ စစ်ကောင်စီကို မုန်းတီးတဲ့စိတ်၊ အာဏာရှင် ဆက်ရှိနေမယ်ဆိုရင် ရွာငံပြည်သူတွေဟာ အခုထက် ပိုဆိုးရွားလာနိုင်တဲ့ အတွက်ကြောင့် သျှမ်းပြည် ပြည်သူ့ကာကွယ်ရေး တပ်ဖွဲ့ထဲသို့ လက်နက်ကိုင် လမ်းစဥ်ကို ရွေးခဲ့တယ်လို့ အသက် ၂၂ နှစ် အရွယ်သာရှိသေးတဲ့ ကိုအာကာက ပြောပြပါတယ်။
“ကျနော်ရဲ့ ဆွေမျိုးအိမ်တွေလည်း မီးရှို့ခံလိုက်ရတယ်။ သတ်ခံရတဲ့ ထဲလည်း ကျနော်ရဲ့ ဆွေမျိုးတွေပါတယ် ” လို့ ကိုအာကာ တယောက် နာကျည်း စိတ်နာစွာနဲ့ ပြောပါတယ်။
ကိုအာကာ ရဲ့ ဆွေမျိုးအိမ် အပါအဝင် သျှမ်းပြည်နယ်အတွင်းမှာ နေအိမ် (၂၆၂) လုံးထိ စစ်ကောင်စီ မီးရှို့ဖျက်ဆီးခဲ့ကြောင်းကို ISP Myanmar ရဲ့ အစီရင်ခံစာအရ သိရပါတယ်။
ဒါ့ကြောင့် စစ်ကောင်စီရဲ့ လုပ်ရပ်တွေကို နာကျည်းပြီး ပြန်လည်ခုခံ တိုက်ခိုက်လိုတဲ့ စိတ်ကြောင့် အသက် ၂၂ အရွယ်ရှိ ကိုအာကာ တယောက် သျှမ်းပြည် ပြည်သူ့ကာကွယ်ရေးတပ်ဖွဲ့ထဲသို့ ဝင်ရောက်ပြီး စစ်ရေး လေ့ကျင့်နေပါတယ်။
“အစဆိုရင် အရမ်းပင်ပန်းတယ်။ စိတ်ပင်ပန်း၊ လူပင်ပန်းပါပဲ။ ဒီထဲလာတော့ မကြုံဖူးတဲ့ ပင်ပန်း ဆင်းရဲမှုကတော့ အကုန်လုံးပါပဲ။ ထမင်းဆိုလည်း တစ်ရက်ကို ၂ နပ်ပဲ စားရတယ်။ ပဲဟင်းနဲ့ တောထဲက ရှိတဲ့ အသီးရွက်တွေပဲရှာစားရတာ။ အသားဟင်းဆို ကြာကြာမှ တစ်ခါစားရတာ။ အများဆုံးတော့ တောထဲက ဟင်းပဲစားရတာပေါ့” လို့ ကိုအာကာ က တောထဲနေထိုင်ခဲ့ရပုံကို ပြောပါတယ်။
တချိန်တခါက ကိုအာကာ တယောက် ဟာ မြေဖြူကိုင်ပြီး ကလေးငယ်တွေကို စာသင်ပေးတာကိုသာ စိတ်ဝင်စားခဲ့သူဖြစ်သလို အနေအေးပြီး စိတ်ထားဖြူစင်တဲ့ လူငယ်တစ်ဦးဖြစ်ကြောင်းကိုလည်း ကိုအာကာရဲ့ သူငယ်ချင်း မနှင်း (အမည်လွှဲ) က ပြောပြပါတယ်။
“သူက ငြိမ်းငြိမ်းချမ်းချမ်းနေရတာကို ကြိုက်တာ။ ကလေးတွေကို စာသင်ပေးတာ ဝါသနာပါတယ်။ သူ့ကလေး တွေကို ပညာတတ် ဖြစ်စေချင်တယ်တဲ့။ အခုလို လက်နက်ကိုင်ပြီး တော်လှန်တာကိုလည်း ဂုဏ်ယူပါတယ်။ အဲ့ဒါက အိမ်ပြန်လမ်းမရှိတာမို့ သူ့ကိုတော့ စိတ်ပူ၊ စိုးရိမ်မိတာပေါ့” လို့ မနှင်း က စိတ်မကောင်းစွာနဲ့ ပြောပါတယ်။
ငြိမ်းချမ်းမှုကို ကြိုက်နှစ်သက်သူဖြစ်ပြီး ကိုယ့်နိုင်ငံက ကလေးတွေကို ပညာတတ် တွေ ဖြစ်စေချင်တဲ့ ကျောင်းဆရာ လူငယ် ကိုအာကာ တယောက် ဟာ စစ်အာဏာရှင်ကြောင့် လက်နက်ကိုင် လမ်းစဥ်ကို ရွေးချယ်တဲ့အပေါ် စိတ်မကောင်းခဲ့ပေမယ့် ဂုဏ်ယူကြောင်း မနှင်းက ဆိုပါတယ်။
စစ်ကောင်စီတွေဟာ လက်ရှိ အချိန်ထိ ရွာငံမြို့နယ်က ပြည်သူတွေရဲ့ နေအိမ်တွေကို မီးရှို့ဖျက်ဆီးမှုတွေ ဆက်လက် ပြုလုပ်နေဆဲပါ။
ကျေးရွာထဲမှာလည်း စစ်ကောင်စီ တပ်ဖွဲ့ဟာ တပ်စွဲနေထိုင်နေပြီး ပြည်သူတွေရဲ့ ကြက် ၊ ဝက်တွေကိုလည်း သတ်ဖြတ်စားသောက် ကြတယ်လို့ ဒေသခံပြည်သူတွေရဲ့ ပေးပို့လာတဲ့ သတင်းအချက်အလက်အရ သိရပါတယ်။
“ကျနော်တို့ ရွာမှာက လူတွေ သိပ်မနေတော့ဘူး။ အသက်ကြီးတဲ့ သူတွေပဲကျန်တယ်။ နေတဲ့သူ ၁၀ အိမ်ကျော်လောက်ပဲရှိတယ်။ ရွာပျက်လိုမျိုးပဲ ဖြစ်နေတာ။ ပြီးတော့ သူတို့တွေက ကျနော်တို့ ကြက်တွေ၊ ဝက်တွေကိုလည်း သတ်ပြီး ယူစားကြတာ” လို့ ကိုအာကာ က ပြောပါတယ်။
ပြီးခဲ့တဲ့ မေလမှာလည်း ရွာငံမြို့နယ်ထဲတွင် စစ်ကောင်စီက ပြည်သူ (၁၀) ဦးကို သတ်ဖြတ်ခဲ့ကြောင်း၊ နေအိမ် (၁၃) လုံးကို မီးရှို့ဖျက်ဆီးပြီး၊ ဒေသခံ ပြည်သူ (၂၅) ဦးကို ဖမ်းဆီးထားကြောင်း ရှမ်းလူ့အခွင့်အရေး မဏ္ဍိုင် (SHRF) ကထုတ်ပြန်ခဲ့ပါတယ်။
စစ်ကောင်စီက ပြည်သူတွေကို ကာကွယ်ပေးနေတဲ့ တပ် မဟုတ်သလို လူ့အခွင့်ရေးတွေကို အမြဲ ချိုးဖောက် နေတယ်လို့ ရှမ်းလူ့အခွင့်အရေး မဏ္ဍိုင် စိုင်းဟော်ရှဲန်က သျှမ်းသံတော်ဆင့်ကို မှတ်ချက်ပြု ပြောဆိုခဲ့ပါတယ်။
“ကျနော်တို့ ဒီစာကို ထုတ်ပြန်ရတဲ့ အကြောင်းရင်းက ဒီ စစ်အာဏာသိမ်း တစ်နှစ်ကြာ ပြီးနောက် ပြည်သူတွေ အပေါ်လုပ်ရပ်က လူ့အခွင့်ရေးတွေကိုပဲ ချိုးဖောက်နေတာမဟုတ်ဘူး။ သူက အကြမ်းဖက်မှုတွေ ဆက်တိုက်ဖြစ်နေတယ်။ ပြည်သူတွေ ကို ကာကွယ်ရမဲ့ အစား အခုက ပြည်သူ့ရန်သူကြီးဖြစ်နေတာ၊ ဒီလုပ်ရပ်ကို ကျနော်တို့ ကန့်ကွက်ပါတယ်” လို့ စိုင်းဟော်ရှဲန်က ပြောပါတယ်။
ပြီးခဲ့တဲ့ အောက်တိုဘာလမှာ အရပ်သားအချို့ နေရပ်ကို ပြန်သွားခဲ့ပေမဲ့ အများစုက အမျိုးသမီး နဲ့ အသက်ကြီးရွယ်အိုတွေ ဖြစ်ကြပြီး လူငယ် နဲ့ အမျိုးသား အများစုကတော့ နိုင်ငံခြား သို့မဟုတ် တစ်ခြား မြို့နယ်တွေမှာ ပြောင်းရွှေ့နေထိုင်ကြပြီး စားဝတ်နေရေး ဖြေရှင်းနေကြပါတယ်။
“တချို့ကတော့ ပြန်သွားပြီ။ သူငယ်ချင်း တစ်ချို့ကတော့ နိုင်ငံခြားထွက် ပိုက်ဆံရှာတာလည်း ရှိတာပေါ့။ ကျနော်စိတ်ဆန္ဒအရတော့ လက်နက်ကိုင်ခဲ့တာပါ။ စစ်အာဏာရှင် ကျဆုံးသွားတဲ့အထိ တော်လှန်သွားမယ်လို့ စိတ်ဆုံးဖြတ်ထားလိုက်ပြီ” လို့ ကိုအာကာ ကတော့ ပြောပါတယ်။
လက်ရှိအချိန်ထိ စစ်ကောင်စီတပ်ဟာ အရပ်သား ပြည်သူတွေကို အကြောင်းမဲ့ ဖမ်းဆီးတာတွေ ပြုလုပ် နေဆဲဖြစ်သဖြင့် စစ်အာဏာရှင် ဆက်ရှိနေသရွေ့တော့ ကိုအာကာဟာ လက်နက်ကိုင် လမ်းစဥ်ကိုသာ စွဲမြဲကိုင်ပြီး အာဏာရှင်ကို ဆက်လက် တိုက်ခိုက်သွားမယ်လို့ ပြောပါတယ်။
မြေဖြူကိုင်တဲ့ လက်ကို နေ့စဥ်တမ်းတနေပေမယ့်လည်း ကလေးငယ်တွေရဲ့ အနာဂတ် ကောင်းမွန်ဖို့အတွက် လက်နက်ကို စွဲကိုင်ကာ တော်လှန်သွားမယ်လို့လည်း ကိုအာကာက ပြောဆိုလိုက်ပါတယ်။
“ကလေးတွေရဲ့ စာအံသံ၊ မြေဖြူနဲ့ ကျောက်သင်ပုန်းကို သတိမရတဲ့ရက် မရှိဘူး။ တော်လှန်ရေး မပြီးမချင်းတော့ သေနတ်ကိုင်ရမယ်။ တော်လှန်ရေး ပြီးရင်တော့ မြေဖြူပြန်ကိုင်မယ်” လို့ ကိုအာကာ တယောက် ပြတ်သားစွာ ဆုံးဖြတ်ထားပါတယ်။
ဆောင်းပါးရှင် – စိုင်းဆိုင်လျန်
Leave a Comments