သျှမ်းပြည်တောင်ပိုင်း ရွာငံမြို့နယ်အတွင်းတွင် စစ်ကောင်စီတပ်ဖွဲ့ စစ်အင်အား တိုးချဲ့ချထားသည့် အပြင် စစ်ဆေးမေးမြန်းမှုများလည်း တင်းကြပ်နေကြောင်း သတင်းသိရသည်။
ပြီးခဲ့သည့် ဒီဇင်ဘာလ ပထမပတ်အတွင်းမှ စတင်ကာ ရွာငံမြို့နယ်အတွင်း မီတာခ မဆောင်သည့် အရပ်သား နေအိမ်များကို ကျည်ဆံတစ်တောင့်ဖြင့် မီတာဆောင်ရန် ခြိမ်းခြောက်ပြောဆိုပြီး ယနေ့အချိန်ထိ လုံခြုံရေး အင်အားတိုးကာ စစ်ဆေးမေးမြန်းမှုများ တင်းကြပ်နေကြောင်း သိရသည်။
“မီတာခ ဆောင်ဖို့ ပြောတာကို ကျည်ဆံနဲ့ စာပို့လာတယ်၊ ပြီးတော့ ၁၄ ရက်နေ့မှာလည်း နာဘန်းကြီးရွာ ရဲ့ အနောက်ဘက်တောင်ကြောမှာ ပျူစောထီး နဲ့ စစ်ကောင်စီနဲ့ ပေါင်းပြီး PDF တွေကို ဝင်ဖမ်းတာ၊ ပစ်ခတ်မှုတွေ ဖြစ်သေးတယ်၊ အဲ့ကတည်းက ဒီနေ့ အထိ ရွာထဲမှာ စစ်သားတွေ နေရာယူပြီး စစ်ဆေးမှုလုပ်နေတယ်” ဟု ရွာငံမြို့ နယ်မှ အမည်မဖော်လိုသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကောင်စီ တပ်သားတို့သည် စစ်ကား ၂ စီးဖြင့် နာဘန်းကြီး ကျေးရွာ တလျောက် ၌ ကင်းလှည့်နေလျက်ရှိပြီး ချိတ်ပိတ် သိမ်းဆည်းထားသော နေအိမ်များကိုလည်း ဖြိုချ ဖျက်ဆီးလိုက်ကြောင်း သိရသည်။
“PDF တွေက နေရာရွေ့ဖို့ လုပ်နေတဲ့အချိန် ဒလန်က သတင်းရလို့ စစ်ကောင်စီနဲ့ တိုက်ပွဲဖြစ်ပြီး အားလုံးက ဖမ်းဆီးခံလိုက်ရတယ်လို့ ပြောတယ်၊ နောက်တော့ အဲ့လူငယ်တွေကို ဘယ်ဖမ်းသွားလဲ မသိရဘူး၊ ချိတ်ပိတ်ထားတဲ့အိမ်တွေလည်း အဲ့နေ့မှာပဲ ဖျက်သွားတာ၊ စုစုပေါင်း ၇ အိမ်ပါ” ဟု အထက်ပါ အမျိုးသားက ဆက်ပြောသည်။
လက်ရှိတွင် စစ်ကောင်စီ တပ်သားတို့က ရွာငံမြို့ အဝင်အထွက်များကို တင်းကြပ်ပြီး စစ်ဆေးမေးမြန်းမှု များလည်း ကြမ်းတမ်းနေကြောင်း ဒေသခံများက ပြောသည်။
ရွာငံမြို့သည် စစ်တပ်အခြေစိုက် လှုပ်ရှားမှု မရှိသော်လည်း စစ်အာဏာသိမ်းပြီး နောက်ပိုင်းမှ ပြီးခဲ့တဲ့ ဧပြီလ အတွင်းမှ စတင်ကာ ဒေသခံများကို စစ်ကောင်စီတပ်ဖွဲ့မှ ဖမ်းဆီး သတ်ဖြတ်ခြင်း၊ နေအိမ် မီးရှို့ခြင်း နှင့် ဒေသခံများကို အကြောင်းမဲ့ ဖမ်းဆီးထားမှု ရှိနေကြောင်းလည်း သိရသည်။
