သျှမ်းပြည်မြောက်ပိုင်း ကျောက်မဲမြို့နယ် သျှမ်းစာပေ နှင့် ယဥ်ကျေးမှုရှိ စစ်ဘေးရှောင်များ နေရပ်ပြန်ရန်အတွက် ကျောက်မဲ သျှမ်း စာ/ယဥ်ကို ခြိမ်းခြောက်ပြောဆိုမှုများ ရှိသည့်အပြင် စစ်ရှောင်များကိုလည်း အတင်းဖိအားပေး ကြောင်း သတင်းသိရသည်။
ယမန်နေ့ (ဒီဇင်ဘာလ ၁၅) ရက် နံနက်ပိုင်းအချိန်တွင် အရပ်ဝတ်ဖြင့် မြို့နယ် ရဲမှူး၊ ဦးစီးမှူး နှင့် တခြား တာဝန်ရှိ သူ ၃ ဦးတို့မှ ကျောက်မဲ သျှမ်း စာ/ယဥ် ဝန်းသို့ ရောက်လာပြီး စစ်ရှောင်များ မဖြစ်မနေ နေရပ်ပြန်ကြရန် ဖိအားပေးခဲ့ကြောင်း သတင်း သိရသည်။
“မြို့နယ် ဦးစီးမှူး ဆိုတဲ့သူက စစ်ရှောင်တွေ နှစ်ကုန်တာ နဲ့ ကိုယ့်နေရပ်ကို ပြန်ကြရမယ်၊ မရ ရတဲ့နည်းနဲ့ ပြန်ကြ၊ ဒီနေရာမှာ စစ်ရှောင်ရှိနေတယ်ဆိုတာကို မကြားချင်တော့ဘူး၊ တကယ်လို့ သျှမ်း စာ/ယဥ်က ဆက်လက် လက်ခံ ထားမယ် ဆိုရင်လည်း အပြစ် ဖြစ်လိမ့်မယ်လို့ လာပြောသွားတယ်” ဟု ဖြစ်စဥ်ကို သိရှိရသည့် ကျောက်မဲဒေသခံ တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ မြို့နယ် ဦးစီးမှူး နှင့် အဖွဲ့သားများ စစ်ရှောင်စခန်းသို့ ရောက်လာပြီး ဖိအားပေး စေခိုင်းမှု ပြုလုပ်နေစဥ် စစ်ရှောင်များကို ရိက္ခာတချို့ လာရောက်ထာက်ပံ့ပေးနေသည့် အလှူရှင်များ ရှိနေချိန်လည်း ဖြစ်ရာ အလှူရှင်များ ကိုလည်း မြို့နယ် ဦးစီးမှူးအဖွဲ့များက ခြိမ်းခြောက်ပြောဆိုသွားကြောင်း အထက်ပါ ပုဂ္ဂိုလ်က ဆက်ပြောသည်။
“စစ်ရှောင်ကို လက်ခံပေးထားတဲ့ သျှမ်း စာ/ယဥ်ကိုလည်း ခြိမ်းခြောက်သွားတယ်၊ စစ်ရှောင်ကို ရိက္ခာလာထောက် ပံ့ကူညီပေးတဲ့ အလှူရှင်တွေကိုလည်း ခြိမ်းခြောက်သွားတယ်၊ အလှူရှင်တွေက သူတို့ တားမြစ်ထားတာကို လွန်ဆန်ပြီး စစ်ရှောင်ကို ကူညီနေတာ ဆိုပြီး ပြောသွားတယ်၊ အဲ့ကြောင့် အလှူရှင်တွေက ချက်ချင်း ပြန်သွားကြရတယ်” ဟု ၎င်းက ဆက်ပြောသည်။
ယင်းကဲ့သို့ ဖိအားပေး စေခိုင်းမှုကြောင့် သျှမ်း စာ/ယဥ် ရှိ စစ်ရှောင်များက နေရပ်ပြန်ရန် အဆင်မပြေသေးသည့် အတွက် စိုးရိမ်ပူဆွေးမှုများဖြင့် ငိုကြွေးနေရကြောင်းလည်း သိရသည်။
လက်ရှိတွင် စစ်ရှောင်များ နေရပ်ပြန်ရန်အတွက် နေရပ်ဇာတိမှ နေအိမ်များလည်း ပျက်စီးနေသည့်အပြင်၊ လုံခြုံရေးလည်း စိုးရိမ်ရသည့်အတွက် မြို့ပေါ် နေအိမ်ငှားရမ်းနေထိုင်ရန်လည်း အဆင်မပြေကြောင်း စစ်ရှောင်ကူညီသူများကပြောသည်။
“စစ်ရှောင်တွေက အခုလက်ရှိ နေ့စဥ် နေထိုင်စားသောက်ရေးတောင် အနိုင်နိုင်ဖြစ်နေတာ၊ အပြင်မှာ အိမ်ငှား နေထိုင်နိုင်ဖို့က ပိုပြီးတော့ ခက်ခဲတယ်၊ နေရပ် ပြန်ရမယ်ဆိုလည်း ကျန်ခဲ့တဲ့ အိမ်ယာတွေက ဘယ်လိုတောင် ပျက်စီး နေကြမလဲ၊ ဒါကြောင့် တချို့က ငိုကြွေး ပူဆွေးနေကြရတယ်” ဟု စစ်ရှောင်ကို ကူညီသူတစ်ဦးက ပြောသည်။
ကျောက်မဲ သျှမ်း စာ/ယဥ် သို့ ရောက်ရှိနေသော စစ်ရှောင်များသည် ဟူးဆွန်ကျေးရွာ၊ တွန်ဟိတ်ကျေးရွာ၊ ချုံးဟောင်း နှင့် နဲမ်းဆိုင်းရွာ တို့မှ ဒေသခံများဖြစ်ကြပြီး အိမ်ထောင်စု ၄၈ နှင့် လူဦးရေ ၂၀၀ နီးပါးရှိနေကြောင်း သိရသည်။
ပြီးခဲ့သည့် ၂၀၂၁ ခုနှစ်တွင် ဖြစ်ပွားသည့် မြောက်ပိုင်းမဟာမိတ် နှင့် သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တပ်ဖွဲ့တို့ တိုက်ပွဲကြောင့် ဒေသခံ ၂၈ ရွာမှ လူဦးရေ (၅,၀၀၀) ကျော်တို့သည် နေရပ်စွန့်ခွာပြီး စစ်ရှောင်ထွက်ပြေးလာခဲ့ရသည်။
ကျောက်မဲဘက်မှ တချို့သော စစ်ရှောင်များသည် သျှမ်းပြည်တောင်ပိုင်း တောင်ကြီးခရိုင် ဟိုပုံးမြို့နယ်သို့ ပြောင်းရွှေ့အခြေချသူများလည်း ရှိနေကြောင်း သတင်းသိရသည်။
