သျှမ်းပြည်မြောက်ပိုင်း နမ့်ဆန်မြို့နယ်အတွင်း ဖြစ်ပွားသည့် တိုက်ပွဲမှာ စစ်ကောင်စီသည် ဂျက်လေယာဥ်မှ ပစ်လိုက် သည့် လက်နက်ကြီးကြောင့် ပြည်သူ့နေအိမ် ၂ လုံး မီးလောင် ပျက်စီးခဲ့ကြောင်း သတင်းသိရသည်။
ယမန်နေ့ ဒီဇင်ဘာလ ၈ ရက်နေ့တွင် တအာင်း (ပလောင်) အမျိုးသားလွတ်မြောက်ရေး တပ်မတော်၏ အခြေချ တပ်စခန်းရှိရာ နမ့်ဆန်မြို့နယ်ကို စစ်ကောင်စီ တပ်ဖွဲ့က ဂျက်လေယာဥ် ၅ စီးဖြင့် တိုက်ခိုက်ခဲ့ရာ ကုန်းသာကျေးရွာမှ နေအိမ် ၂ လုံး လက်နက်ကြီး ထိမှန် ပျက်စီးခဲ့ရကြောင်း သတင်းသိရသည်။
“မြေပြင်မှာလည်း နှစ်ဖက်တပ်ဖွဲ့က အပြန်အလှန် ပစ်နေကြတယ်၊ စကစရဲ့ လေယာဥ်လည်း လာပြီးတော့ ဗုံးကြဲတာ၊ ရွာထဲကိုရော အနီးပတ်ဝန်းကျင်ကိုရော လက်နက်ကြီး ကျတယ်၊ အိမ်နှစ်လုံးလည်း မီးလောင်သွားတယ်၊ ရွာသားတစ်ဦးလည်း ထိခိုက်ဒဏ်ရာ ရတယ်လို့ပြောတယ်၊ အခြေအနေတော့ မသိရသေးဘူး” ဟု နမ့်ဆန်မြို့နယ် မှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် တိုက်ပွဲဖြစ်ပွားရာ အနီးပတ်ဝန်းကျင်ရှိ ကျေးရွာများသည် ကုန်းသာရွာ၊ မန်လုံရွာ နှင့် ဟူးမန်းရွာတို့မှ ဒေသခံများသည် နမ္မတူမြို့ သော်လည်းကောင်း၊ လားရှိုးသို့သော်လည်းကောင်း တချို့လည်း နမ့်ဆန်မြို့ပေါ်ရှိ အမျိုးများထံသို့ စစ်ရှောင်ထွက်ပြေး ရကြောင်း သတင်းသိရသည်။
မြေပြင်တိုက်ပွဲတွင် TNLA တပ်ဖွဲ့တို့နှင့် တိုက်ပွဲဖြစ်ပွားနေသော စစ်ကောင်စီ တပ်ဖွဲ့တို့သည် TNLA တပ်ဖွဲ့၏ ဝိုင်းပတ်ပိတ်ဆို့ထားခြင်း ခံရနေသည့်အတွက် လက်နက်ကြီး နှင့် လေယာဥ်စစ်ကူ အင်အားဖြင့် စစ်ကောင်စီက ထိုးစစ်ဆင်နေကြောင်းလည်း ဒေသခံများက ပြောသည်။
“TNLA က နယ်မြေကျွမ်းတော့ သူတို့ (စကစ) လူက စစ်မြေပြင်မှာ ပိတ်မိနေတယ်၊ဒါကြောင့် သူတို့ လေယာဥ်နဲ့ လာတိုက်ကူတာ၊ နမ့်ဆန်မြို့က စစ်ကောင်စီ စခန်းကလည်း လက်နက်ကြီးနဲ့ ပစ်ကူနေတယ်၊ ပြည်သူ တွေလည်း တိုက်ပွဲကြား ပိတ်မိနေတာရှိတယ်” ဟု နမ့်ဆန်မြို့နယ် ဒေသခံအမျိုးသားက ဆက်ပြောသည်။
ယနေ့ ဒီဇင်ဘာလ ၉ ရက်နေ့ မနက်ပိုင်း ၁၀ နာရီမှ ၁၀ နာရီခွဲသည်အထိ နမ့်ဆန်အခြေစိုက် စစ်တပ်မှ လက်နက်ကြီး ဖြင့် အဆက်မပြတ် ပစ်နေကြောင်းလည်း သိရသည်။
တိုက်ပွဲဖြစ်ပွားမှုနှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော်၏ ပြောရေးဆိုခွင့် ရှိသူ ဗိုလ်မှူးချုပ် တာဘုန်းကျော်ကို အကြိမ်ကြိမ် ဖုန်းဆက်မေးမြန်းသော်လည်း ဖုန်းလက်ခံ ဖြေကြားခြင်းမရှိပေ။
စစ်ကောင်စီ တပ်ဖွဲ့သည် နိုင်ငံတော် အာဏာသိမ်းယူပြီးနောက် ရက္ခိုင့်တပ်တော် AA နှင့် အပစ်ခတ်ရပ် ငြိမ်းချမ်းရေး ယူပြီး သျှမ်းပြည်မြောက်ပိုင်းရှိ တိုင်းရင်းသားလက်နက်ကိုင်တပ်ဖွဲ့များကို ထိုးစစ်ဆင်မှု ခပ်စိတ်စိတ် ပြုလုပ်လာကြောင်း ပြောဆိုသုံးသပ်မှုလည်း ထွက်လာသည်။
Leave a Comments