ထိုင်း – မြန်မာ နယ်စပ် ချင်းမိုင်ခရိုင် ဖှန်မြို့နယ် (သျှမ်းပြည်အရှေ့ပိုင်း မိုင်းတုံမြို့နယ် ပုံပါကျင်မြို့နယ်ခွဲနှင့်မျက်နှာချင်းဆိုင်) က ထိုင်းနယ်စပ် လုံခြုံရေးတပ် မွမ့်ပင်အုပ်စုဂိတ် (၁၂) တွင် စောင့်ကြပ်စစ်ဆေးနေစဉ် ယနေ့ ဒီဇင်ဘာ (၈) ရက် မနက်အစောပိုင်းက မူးယစ်မှောင်ခိုအဖွဲ့နှင့်ပစ်ခတ်မှုဖြစ်ပွါးရာ ၁၅ ဉီးထက်မနည်း သေဆုံးခဲ့ကြောင်း ထိုင်းလုံခြုံရေးတပ်က ထုတ်ပြန်ထားသည်။
အဆိုပါ မူးယစ်မှောင်ခိုအဖွဲ့သည် မြန်မာနိုင်ငံဘက်ခြမ်းမှ တောလမ်းမှ ဖြတ်လျှောက်ဝင်ရောက်လာသည့် အမျိုးသား (၂၀) ဦးထက်မနည်းရှိ အဖွဲ့ဖြစ်ကြောင်း၊ ထိုင်းလုံခြုံရေးဘက်မှ တားဆီးစဉ် မရပ်ပေးသည့်အပြင် သေနတ်ပစ်ခတ်သဖြင့် ၁၀ မိနစ်ခန့်အကြာ ပစ်ခတ်မှု ဖြစ်ပွါးခဲ့ကြောင်း ချင်းမိုင်နယူးစ် သတင်းကဖော်ပြထားသည်။
ပစ်ခတ်မှု ဖြစ်ပွားပြီးနောက် ထိုင်းလုံခြုံရေး တပ်ဖွဲ့က သွားရောက် စစ်ဆေးရာ အဆိုပါ အဖွဲ့မှ (၁၅) ဦး၏အလောင်းများတွေ့ရပြီး ၄င်းတို့နှင့်အတူ အိုက်စ်မူးယစ်ဆေး၊ လက်နက်ကြီး လက်နက်ငယ်များထည့်ထားသည့် ကျောပိုးအိတ် ၂၉ လုံးနှင့်အတူ တွေ့ရှိသိမ်းဆည်းရမိကြောင်း၊ လွှတ်မြောက်နေသူများရှိနေသည်ဟု ယုံကြည်သဖြင့် ထိုင်းလုံခြုံရေးတပ်ဖွဲ့က အင်အားဖြည့်တင်းကာ တောနင်းလိုက်ရှာမှုပြုနေကြောင်း Chiang Mai News သတင်းဌာနက ရေးသားဖော်ပြထားသည်။
Leave a Comments