ထိုင်း-မြန်မာနယ်စပ် ချင်းမိုင်ခရိုင် ဖန်မြို့နယ်တွင် မြန်မာနိုင်ငံဘက်မှ မူးယစ်ဆေးသယ်ဆောင်လာသည်ဟု ယူဆရသည့်အဖွဲ့နှင့် ထိုင်းနယ်ခြားစောင့် စစ်တပ်တို့ ယမန်နေ့ (အောက်တိုဘာလ ၂၇) ရက် နံနက်ပိုင်းက ပစ်ခတ်မှုဖြစ်ပွားပြီး ၆ ဦးအသေဖမ်းမိကြောင်း သတင်းသိရသည်။

တောင်တက်ကျောပိုးအိတ်ရှစ်လုံး ထဲတွင် မက်သာဖက်တမင်းဆေးပြား စုစုပေါင်း ၁,၂၀၀,၀၀၀ ခန့်နှင့် သေနတ်နှစ်လက်ကိုလည်း ထိုင်းအာဏာပိုင်များက သိမ်းဆည်းရမိကြောင်း Maesaipress သတင်းတွင် ဖော်ပြထားသည်။

ထိုင်းအာဏာပိုင်များသည် ထိုင်းနိုင်ငံ ချင်းမိုင်ခရိုင် ဖန်မြို့နယ် Mon Pin အတွင်းရှိ တောလမ်းတစ်နေရာတွင် သံသယဖြစ်ဖွယ် လူအုပ်စုတစ်စုကို တွေ့ရှိသဖြင့် စစ်ဆေးရန် ရပ်တန့်စေရာတွင် အပြန်အလှန်ပစ်ခတ်မှု ဖြစ်ပွားခဲ့သည်ဟု Maesaipress သတင်းကဆိုသည်။

ထို့နောက် ခင်းဖြစ်ပွားရာသို့ သွားရောက်စစ်ဆေးရာတွင် သေနတ်ထိမှန် သေဆုံးသွားသည့် အလောင်း ခြောက်လောင်း၊ သေနတ်နှစ်လက်နှင့် မူးယစ်ဆေးဝါးများကို သိမ်းဆည်းရမိကြောင်း၊ ၎င်းတို့သည် ထိုင်းနယ်စပ်ဒေသခံများ မဟုတ်သော တစ်ဖက်နိုင်ငံမှ နေထိုင်သူများ ဖြစ်နိုင်ကြောင်း တွေ့ရှိခဲ့သည်ဟု အဆိုပါသတင်းတွင် ဖော်ပြထားသည်။

သိမ်းဆည်းရမိသော မူးယစ်ဆေးဝါးတွင် Labubu သင်္ကေတနှင့် AAA အက္ခရာပါ စကာလုံးများကို တွေ့ရှိသဖြင့် ထိုင်းအာဏာပိုင်များက ဆေးပြားများရှိ ပါဝင်ပစ္စည်းများကို ထပ်မံစုံစမ်းစစ်ဆေးသွားမည်ဖြစ်ကြောင်း သိရသည်။