သျှမ်းပြည်မြောက်ပိုင်း နမ့်ခမ်းမြို့နယ် မိုင်းဝီးကျေးရွာတွင် မူးယစ်ဆေး အကြောင်းပြကာ ဖမ်းဆီးခံရသည့် ပြည်သူများကို တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) မှ ကောက်ရိတ်ရန် ခိုင်းစေကြောင်း သတင်းသိရသည်။
မိုင်းဝီးကျေးရွာအုပ်စု အတွင်းရှိ ဒေသခံပြည်သူ ၁၅ ဦးထက်မနည်းကို TNLA တပ်ဖွဲ့မှ ဖမ်းဆီးသွားပြီး မိုင်းခက် ရွာ ဘက်ရှိ TNLA တပ်ဖွဲ့ပိုင် လယ်များမှ စပါးများကို ကောက်ရိတ်ခိုင်းကြောင်း အသက် ၅၀ ဝန်းကျင် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မိုင်းဝီးဒေသက အမျိုးသားတွေကို လမ်းသွားတိုင်း တွေ့ရင် ဆီးခေါ်စစ်တာ၊ မူးယစ်ဆေးဝါးသုံးတာ ဟုတ်မဟုတ် ကျနော်တို့က မသိရပေမဲ့ သူတို့ (TNLA)က မူးယစ်သုံးတယ်လို့ ပြောရင် ဖမ်းခေါ်သွားခံရရော၊ ဖမ်းခံရတဲ့ သူတွေက မိုင်းခက်ရွာဘက်မှာ ကောက်ရိတ်ရတယ်” ဟု အသက် ၅၀ ဝန်းကျင် ဒေသခံအမျိုးသား တစ်ဦးက ပြောသည်။
မိုင်းဝီးကျေးရွာအုပ်စုအတွင်း မူးယစ်ဆေး အကြောင်းပြကာ ဖမ်းဆီးခေါ်ဆောင်ထားသည့် ဒေသခံရွာသားများ အနက် အများစုသည် သျှမ်းလူမျိုးများဖြစ်ကာ ကချင်လူမျိုး၊ တအာင်းလူမျိုးများလည်း ပါဝင်ကြောင်း ဒေသခံ များက ဆက်ပြောသည်။
ပြီးခဲ့သည့် ဇူလိုင်လတွင်လည်း တပ်သားအင်အား ၂၀ ကျော်ရှိသည့် TNLA တပ်ဖွဲ့သည် မိုင်းဝီးကျေးရွာအုပ်စုအတွင်းသို့ ဝင်ရောက်လာပြီး မူးယစ်ဆေးဝါး စစ်ဆေးတွေ့ရှိသည်ဟု စွပ်စွဲပြီး ဖမ်းဆီးခဲ့ရာ ထိုထဲတွင် သျှမ်းလူမျိုး ၂ ယောက်ပါရှိခဲ့သည်။
ဖမ်းဆီးသွားသည့်သူများကို မိုင်းခတ်ဘက်သို့ ပို့ခဲ့ကြောင်း ဒေသခံများထံမှ သိရသည်။
ယင်းကဲ့သို့ ကိစ္စဖြစ်စဥ်နှင့် ပတ်သက်ပြီး TNLA ၏ အုပ်ချုပ်ရေးမှူး အပိုင်း မူဆယ်ခရိုင်၏ ခရိုင်မှူးဖြစ်သူကို ဆက်သွယ်မေးမြန်းရာ ရွာသားများ ဖမ်းဆီးပြီး ကောက်ရိတ်သိမ်းရန် ခိုင်းစေခြင်း မရှိကြောင်း သျှမ်းသံတော်ဆင့် ကို ပြောသည်။
“ရွာသားတွေကို ဖမ်းပြီး ကောက်ရိတ်ခိုင်းတာ မရှိပါဘူး၊ အခုအချိန်ကလည်းအားလုံးက ကောက်ရိတ် စပါးသိမ်း ကုန်ကြပါပြီ၊ ကျနော်တို့က ပြည်သူလူထု သက်သာချောင်ချိရေး အဆင်ပြေရေးအတွက်ပဲ ဦးစားပေး လုပ်ဆောင်တာ၊ အဲ့လို ခိုင်းစေတာမျိုးတွေ မရှိဘူး” ဟု TNLA တပ်ဖွဲ့၏ ခရိုင်မှူးဖြစ်သူ က သျှမ်းသံတော်ဆင့်ကို ပြော သည်။
အဆိုပါ မူးယစ်ဆေး အကြောင်းပြချက်ဖြင့် ဖမ်းဆီးခံရသည့် မိုင်းဝီး ဒေသခံများသည် ယနေ့ အချိန်ထိ ပြန်လည် လွတ်မြောက်ခြင်း မရှိကြောင်းလည်း အထက်ပါ အသက် ၅၀ ဝန်းကျင် အမျိုးသားက ဆက်ပြောသည်။
“အခုထိ ပြန်မလွတ်လာသေးပါဘူး၊ မိသားစုဝင်တွေနဲ့လည်း အဆက်အသွယ်မရဘူး၊ ဖမ်းခံရတဲ့သူတချို့က သက်ကြီးပိုင်းတွေလည်း ပါလို့ စိတ်ပူတာပေါ့” ဟု ၎င်းက ပြောသည်။
မိုင်းဝီးဒေသအတွင်းတွင် TNLA တပ်ဖွဲ့ အပြင် အာဏာသိမ်း စစ်ကောင်စီ တပ်ဖွဲ့နှင့် ၎င်းလက်အောက်ခံ ပြည်သူ့စစ်တပ်ဖွဲ့၊ SSPP/ SSA တပ်ဖွဲ့၊ MNDAA တပ်ဖွဲ့ နှင့် KIA တပ်ဖွဲ့တို့ကလည်း သွားလာလှုပ်ရှားနေ လျက်ရှိသည်။
Leave a Comments