Sunday, February 5, 2023

သီပေါမြို့နယ် ကုန်းသာရွာအနီး စစ်သားများ ရှိနေဆဲ ရွာသားများ လယ်ဆင်းရန်ခက်ခဲ

Must read

သျှမ်းပြည်မြောက်ပိုင်း သီပေါမြို့နယ် ကုန်းသာကျေးရွာတွင် အာဏာသိမ်း စစ်ကောင်စီ တပ်သားများရှိနေသည့် အတွက် ရွာသားများက လယ်ဆင်းရန် ခက်ခဲနေကြောင်း သတင်းသိရသည်။

လက်နက်ကြီး

စစ်ကောင်စီ တပ်ဖွဲ့နှင့် ရှမ်းပြည်ပြန်လည်ထူထောင်ရေး ကောင်စီ၊ ရှမ်းပြည်တပ်မတော် SSPP/SSA တို့ တိုက်ပွဲ ဖြစ်ပွားရာ ကုန်းသာရွာတွင် ရွာသားများက ၄ ရက်ကြာ စစ်ဘေးတိမ်းရှောင်ခဲ့ပြီး နေရပ်သို့ ပြန်လာသော်လည်း ယနေ့အချိန်အထိ စစ်ကောင်စီ တပ်သားတို့က ရွာထဲနေရာယူထားကြောင်း ဒေသခံများက ပြောသည်။

“ကျမတို့ ရွာထဲပြန်ရောက်ပြီး ကိုယ့်အိမ်ကိုယ် နေနေရပေမဲ့ လယ်ယာတွေ မသွားရဲသေးဘူး၊ ဒီအချိန်က စပါးတွေ ၊ နှမ်းတွေ ယူရမဲ့ အချိန်ဖြစ်နေတယ်၊ စစ်သားတွေက ရွာပြင်မှာ ရှိနေလို့ အိမ်ဝန်းထဲမှာပဲ နေကြတယ်၊ လက်နက် တွေ ရမ်းပစ်မှာ၊ လာဖမ်းကြမှာ ကြောက်လို့” ဟု ကုန်းသာရွာခံ အသက် ၃၅ နှစ်ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ရွာသားများ အလုပ်ဆင်း တောင်ယာသွားလျှင် စိုးရိမ်ကြောက်လန့်သည့်အပြင် ကုန်းသာကျေးရွာရှိ အခြေခံပညာ အထက်တန်းကျောင်းလည်း တိုက်ပွဲဖြစ်ကတည်းက ယနေ့အထိ ပိတ်ထားရကြောင်း ဒေသခံများက ပြောသည်။

“စာသင်ကျောင်းက တိုက်ပွဲဖြစ်ကတည်းက ပိတ်ထားတယ် ဆိုပေမဲ့ ကလေးတွေ စစ်ရှောင်ပြီး ရွာပြန်ရောက်ပြီးလည်း စာသင်ကျောင်းက မဖွင့်ဖြစ်သေးဘူး၊ ဆရာမတွေလည်း သီပေါမြို့ပေါ်ကို ရှောင်ထွက်သွားပြီ၊ စစ်သား တွေက အဲ့နေရာတွေမှာ ရှိနေလို့ ရွာသားရော၊ ကလေးရော၊ ကြောက်နေကြတယ်” ဟု အသက် ၃၅နှစ် အရွယ် အမျိုးသမီးက ဆက်ပြောသည်။

နိုဝင်ဘာလ ၂၅ ရက်နေ့ မနက်ပိုင်းတွင် ကုန်းသာရွာအနီး တိုက်ပွဲဖြစ်ပွားမှုကြောင့် ကုန်းသာကျေးရွာ နှင့် အနီးပတ်ဝန်းကျင်မှ ရွာသားများ ၃၀၀ ကျော်ခန့်သည် သီပေါမြို့ပေါ်သို့ စစ်ရှောင်သွားရပြီး နိုဝင်ဘာလ ၂၈ ရက်နေ့တွင် နေရပ်ပြန်လာခြင်းဖြစ်သည်။

စစ်ရှောင်ပြည်သူများသည် နေရပ်ပြန်လာသော်လည်း တချို့အိမ်များက လက်နက်ကြီး ကျည်ထိမှန် ပျက်စီးခြင်း၊ စိုးရိမ်ကြောက်လန့်ခြင်းတို့ကြောင့် လယ်ယာသို့ မသွားရဲကြပဲ ရွာအတွင်းမှာပင် နေထိုင်ကြရပြီး စစ်သားများ ရွာအနီးပတ်ဝန်းကျင် လှုပ်ရှားမှု မရှိစေရန် တောင်းဆိုလိုကြောင်းလည်း ကုန်းသာရွာခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အခုလို စစ်သားတွေရှိနေပေမဲ့ ဘာလို့ရွာပြန်လဲဆိုရင် ကျနော်တို့ စစ်ရှောင်ရတာ အနေဆင်းရဲ အစားဆင်းရဲ ဖြစ်တယ်၊ စစ်ရှောင် ၃၀၀ အတွက် တစ်နေ့နှစ်နပ်စာကို ဆန်တစ်အိတ်ကုန်တယ်၊ ဟင်းတွေလည်း ဖြစ်သလိုပဲ၊ ဒါကြောင့် အရဲစွန့်ပြီး နေရပ်ပြန်တာ၊ စစ်သားတွေ ရွာနားမှာ မရှိရင်တော့ ကောင်းတာပေါ့၊ တောင်းလည်းတောင်းဆိုပါတယ်” ဟု ကုန်းသာရွာခံ အသက် ၄၀ အရွယ်ရှိ အမျိုးသားက သျှမ်းသံတော်ဆင့်ကို ပြောသည်။

ကုန်းသာရွာအတွင်းတွင် လက်နက်ကြီးနှင့် ကျည်ဆန်ထိမှန်သော ပြည်သူ့နေအိမ် ၁၄ လုံးထက်မနည်း ရှိနေပြီး ပြန်လည် ပြုပြန်ရန်အတွက် အကူအညီများလည် လိုအပ်ကြောင်း အထက်ပါ အမျိုးသားက ဆက်ပြောသည်။

သီပေါမြို့နယ်သည် အာဏာသိမ်း စစ်ကောင်စီအပြင် တိုင်းရင်းသား လက်နက်ကိုင် တပ်ဖွဲ့များဖြစ်ကြသည့် SSPP/SSA တပ်ဖွဲ့၊ TNLA တပ်ဖွဲ့တို့လည်း သွားလာလှုပ်ရှားသည့် နယ်မြေဖြစ်သည်။

Leave a Comments

- Advertisement -spot_img

Latest article