သျှမ်းပြည်တောင်ပိုင်း မိုးနဲမြို့နယ် ကတ်နောက်ကျေးရွာရှိ ရေထွက်ဦးကို လင်းခေးခရိုင် အမျိုးသားဒီမိုကရေစီအဖွဲ့ချုပ် ( NLD) အတွင်းရေးမှူး ဦးမောင်စိုးက လာရောက်မြေဖို့သည့်အတွက်ကြောင့် လယ်သမားများ ရေအလုံလောက်ရရှိဖို့အတွက် ခက်ခဲမှုရှိနေကြောင်း စုံစမ်းသိရှိရသည်။
ပြီးခဲ့သည့် နိုဝင်ဘာ ၂၈ ရက်တွင် ဦးမောင်စိုးသည် ခြံစိုက်ပျိုးရန်အတွက်ဟုဆိုကာ ထိုရေထွက်ဦးနေရာကို မြေလာဖို့လိုက်ပြီး လယ်ဧက ၃၀၀ ဝန်းကျင်အတွက် ရေအခက်ခဲရှိနိုင်ကြောင်း သိရသည်။
“ သူက ခြံစိုက်ဖို့လိုတယ်ဆိုပြီး ရေများလို့တဲ့ အဲ့နားလာပိတ်သွားတာ။ ကားကြီးတွေနဲ့ ရေထွက်နေရာကို လာမြှုပ်လိုက်တာ။ အဲ့ရေက မရှိတော့ရင် ကျနော်တို့ လယ်သမားတွေအတွက်က လယ်စိုက်ဖို့အတွက် ရေအခက်ခဲတွေ ရှိလာနိုင်တယ်။ လယ်ဧက ၃၀၀ လောက်က အဲ့ရေကို အားကိုးနေရတာ ” ဟု မိုးနဲမြို့ ဒေသခံ အမျိုးသားတစ်ဦးက ပြောသည်။
ဦးမောင်စိုးသည် လင်းခေးခရိုင် (NLD) အတွင်းရေးမှူးဖြစ်ပြီး ၎င်း၏ ဖခင်သည် စစ်ကောင်စီတပ်ဖွဲ့ဝင်တစ်ဦး ဖြစ်သည်။ မိုးနဲ ရေဦးထွက်ကို မြေဖို့ရခြင်းမှာ မြေကို အကွက်ရိုက်ပြီးရောင်းစားရန်ဖြစ်ကြောင်း ဒေသခံများက ပြောပြသည်။
အလားတူ ထိုနေရာသည် ပြည်သူများက ဘိုးဘွားစဉ်ဆက်က အသုံးပြုလာသည့်အတွက်ကြောင့် ပိုင်ဆိုင်ထားသူ မရှိထားကြောင်း သိရသည်။
“ အဲ့နေရာကို သူတို့ရောင်းစားဖို့အတွက်ပဲ လာလုပ်ချင်တာထင်တယ်။ အဲ့နေရာက လမ်းမကြီးနဲ့နီးတယ်လေ။ ပြီးတော့ ဈေးကြီးလည်းရတယ်။ အဲ့နားမှာတော့ ကျနော်တို့ ပြည်သူတွေ ဘိုးဘွားလက်ထက်ကတည်းက အဲ့ရေထွက်ကို အသုံးပြုလာရတာ။ တစ်ဦးပိုင်မျိုးတော့ မရှိထားဘူး” ဟု ကတ်နောက်ကျေးရွာ ဒေသခံက ပြောသည်။
အဆိုပါ ရေထွက်ဦးကို လယ်သမားများက နှစ်စဉ်လယ်စိုက်ပျိုးရန်အတွက် အသုံးပြုနေရပြီး ထိုရေမရှိပါက နောင်နှစ်တွေအတွက် လယ်သမားများက စပါးစိုက်ပျိုးရန်အတွက် ရေအလုံလောက်မရှိပဲ ခက်ခဲလာနိုင်ကြောင်း သိရသည်။
“ အဲ့ရေနဲ့ပဲ လယ်တွေစိုက်နေရတာလေ။ အများဆုံးတော့ လယ်စိုက်တဲ့ချိန်မှာပဲသုံးတာ။ အခု မြေမြှုပ်လိုက်ပေမဲ့ ရေတော့ထွက်နေသေးတယ်။ ရေမထွက်တော့ရင် နောက်နှစ်တွေမှာ စပါးစိုက်ပျိုးတဲ့ချိန်မှာ အခက်ခဲရှိနိုင်တယ်။ ရေတွေအလုံလောက်မရှိနိုင်တော့ဘူးပေါ့” ဟု လယ်သမားတစ်ဦးက ပြောသည်။
ကတ်နောက်ကျေးရွာတွင်းရှိ ရေထွက်ဦးကိုလည်း ၂၀၁၆ ခုနှစ်ကလည်းတစ်ကြိမ် မြေဖို့ရန်အတွက် ကြိုးစားခဲ့သည့်အတွက်ကြောင့် ပြည်သူများက ဆန္ဒပြ ကန့်ကွက်ခဲ့ဖူးကြောင်း သိရသည်။
ထိုရေထွက်ဦးသည် ၁၂ ရာသီပတ်လုံး ရေထွက်နေပြီး ပြည်သူများကလည်း စပါးစိုက်ပျိုးရန်၊ လယ်ကြက်သွန်ကို စိုက်ပျိုးရန်အတွက် အဓိက အားကိုးနေရသည့် ရေထွက်ဦးဖြစ်သည်။
