သျှမ်းပြည် မြောက်ပိုင်း လားရှိုးအကျဉ်းထောင်၌ ဖမ်းဆီး အကျဉ်းချခံထားရသည့် ပြည်သူ့လွှတ်တော် ဒု – ဥက္ကဌ ဦးထွန်းထွန်းဟိန်ကို စစ်ကောင်စီက ထောင်ဒဏ် နှစ် ၂၀ ထပ်မံချမှတ်လိုက်ကြောင်း သတင်းသိရသည်။
ယမန်နေ့ (နိုဝင်ဘာလ ၂၉) ရက်တွင် လားရှိုးအကျဉ်းထောင် တရားရုံးမှ ဦးထွန်းထွန်းဟိန်ကို ထောင်ဒဏ် နှစ် ၂၀ ထပ်မံချမှတ်ခြင်းဖြစ်ကြောင်း အမည်မဖော်လိုသူ ဒေသတွင်းမှ ရှေ့နေတစ်ဦးက သျှမ်းသံတော်ဆင့်ကို ပြောသည်။
“မနေ့က ထောင်ဒဏ် ၂၀ နှစ် ထပ်ချလိုက်တယ်၊ နိုင်ငံတော်ကို သစ္စာဖောက်မှုနဲ့ အမိန့်ချလိုက်တာ၊ အခုဆို ဒု-ဥက္ကဌ ကြီးက ထောင်ဒဏ်နှစ်ပေါင်း ၂၄ နှစ်ရှိနေပြီ” ဟု အထက်ပါ ရှေ့နေက ပြောသည်။
ပြီးခဲ့သည့် ၂၀၂၁ ခုနှစ်၊ ဒီဇင်ဘာလ ၂၂ ရက်တွင် ပုဒ်မ ၅၀၅ (က)၊(ခ) အမှုများအတွက် ထောင်ဒဏ် ၄ နှစ် ချမှတ်ခံ ထားရသဖြင့် ယခုတွင် ထောင်ဒဏ် ၂၄ နှစ်ရှိနေပြီဖြစ်ကြောင်း ရှေ့နေက ဆက်ပြောသည်။
စစ်တပ်မှ နိုင်ငံတော် အာဏာသိမ်းယူသည့် ၂၀၂၁ ခုနှစ်၊ ဖေဖော်ဝါရီလ ၁ ရက်တွင်ပင် ဖမ်းဆီးခံခဲ့ရပြီးနောက် ဖေဖော်ဝါရီလ ၇ ရက်တွင် ဦးထွန်းထွန်းဟိန် ကို စစ်ကောင်စီက ပြန်လွှတ်ပေးခဲ့သည်။
သို့သော် ဖေဖော်ဝါရီလ ၁ဝ ရက်တွင် ထပ်မံဖမ်းဆီးခြင်း ခံရပြီး ယနေ့အချိန်အထိ နှစ်ရှည်ထောင်ဒဏ်များ ချမှတ်ခံရခြင်း ဖြစ်ကြောင်း သိရသည်။
ဦးထွန်းထွန်းဟိန်သည် ၁၉၉၀ ခုနှစ်၊ ၂၀၁၅ ခုနှစ်နှင့် ၂၀၂၀ အထွေထွေ ရွေးကောက်ပွဲများတွင် NLD ပါတီ ကိုယ်စားပြုပြီး သျှမ်းပြည်မြောက်ပိုင်း နောင်ချိုမြို့နယ်မှ ပြည်သူ့လွှတ်တော် ကိုယ်စားလှယ်အဖြစ် ရွေးချယ် တင်မြှောက်ခံရသူ ဖြစ်ကြောင်း သိရသည်။
ထို့အပြင် ဦးထွန်းထွန်းဟိန်သည် NLD အစိုးရလက်ထက်တွင် ပြည်သူ့လွှတ်တော် ဒု – ဥက္ကဌ တာဝန်ထမ်းဆောင် သည့် အပြင် အမျိုးသား ဒီမိုကရေစီ အဖွဲ့ချုပ်၏ ဗဟိုအလုပ်အမှုဆောင် အဖွဲ့ဝင်လည်း ဖြစ်သည်။
Leave a Comments