သျှမ်းပြည်မြောက်ပိုင်း သီပေါမြို့သို့ စစ်ဘေးရှောင်ရောက်လာသည့် ကုန်းသာမှ စစ်ရှောင် မိခင် နှင့် ကလေးသည် ဆေးကုသရန်အတွက် အကူအညီများ လိုအပ်နေကြောင်း သတင်းသိရသည်။
ကုန်းသာကျေးရွာအုပ်စုမှ ရပ်ကွက် ၁ တွင် နေထိုင်သူ နေရပ်မပြန်ရသေးသည့် အသက် ၃၁နှစ်အရွယ်ရှိ စစ်ရှောင် နန်းခမ်းလူ နှင့် အသက် (၃)နှစ်အရွယ်ရှိ သမီး နန်းစံဟွမ် တို့ ဆေးကုသမှုခံယူရန် အကူအညီများ လိုအပ် နေကြောင်း စစ်ရှောင်ကူညီပေးနေသည့်သူများက သျှမ်းသံတော်ဆင့်ကို ပြောသည်။
“ကလေးက ချွဲကျပ်သလိပ်ကပ် ရောဂါဝေဒနာခံစားနေရတာပါ၊ သီပေါဆေးရုံမှာ တင်ထားပြီး မနေ့ကနေ ဒီနေ့ အထိ အောက်စီဂျင်ပေးထားရတယ်၊ နန်းခမ်းလူမှာ သားတစ်ယောက်နဲ့ သမီးတစ်ယောက်ရှိတယ်၊ သားဖြစ် သူကလည်း ဖျားနေတယ်၊ သားကိုအဖွားက ကြည့်ထိန်းပေးရတယ်၊ မိသားစုက မပြည့်စုံတော့ ဆေးကုသမှုတွေ ခက်ခဲနေတယ်” ဟု စစ်ရှောင်ကူညီပေးနေသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
နန်းခမ်းလူတို့မိသားစုသည် ကုန်းသာကျေးရွာအတွင်း SSPP/SSA နှင့် စစ်ကောင်စီတို့ တိုက်ပွဲကြောင့် စစ်ဘေး ရှောင် လာခဲ့ရသူများဖြစ်ကြပြီး လက်ရှိတွင် သီပေါမြို့ ဆေးရုံ၌ ဆေးကုသမှု ခံယူနေကြောင်း သိရသည်။
လက်ရှိတွင် ကုန်းသာနေရပ် မပြန်ရသေးသည့် ကုန်းသာကျေးရွာမှ ဒေသခံများ အိမ်ထောင်စု ၁၀ ကျော် ကျန်ရှိ နေသေးပြီး စားနပ်ရိက္ခာအကူအညီ နှင့် အနွေးထည်အကူအညီများ လိုအပ်နေသေးကြောင်း သိရသည်။
ယမန်နေ့ နိုဝင်ဘာလ ၂၈ ရက် တွင် သီပေါမြို့ ဘိုးတော်အောင်မင်္ဂလာ ကျောင်းတိုက်သို့ ရောက်ရှိလာသော ကုန်းသာကျေးရွာအုပ်စုမှ ဒေသခံ ၄၀၀ ကျော်တို့သည် စိုးရိမ်ကြောက်လန့်စိတ်ဖြင့် နေရပ်ပြန်သွားခဲ့သည်။
Leave a Comments