သျှမ်းသံပြည် အရှေ့ပိုင်း ကျိုင်းတုံမြို့ အကျဉ်းထောင်မှ အကျဥ်းကျနေသူများအနက် ၄၃ ဦးလွှတ်မြောက်လာ သော်လည်း ပထမဆုံး ဖမ်းဆီးခံရသည့် CDM ကျောင်းဆရာမ မီဆော မပါလာကြောင်း စုံစမ်းသိရသည်။
ယမန်နေ့ နိုဝင်ဘာလ ၁၇ ရက်နေ့တွင် ကျရောက်သော အမျိုးသားနေ့ အထိမ်းအမှတ်အဖြစ် နိုင်ငံရေးပုဒ်မ နှင့် တခြားသော ပုဒ်မများဖြင့် ပြစ်ဒဏ် ၂ နှစ်ထက် မပိုသော အကျဉ်းသားများကို စစ်ကောင်စီက လွတ်ငြိမ်းချမ်းသာခွင့်ပေးခဲ့သည်။
အဆိုပါ လွတ်ငြိမ်းချမ်းသာခွင့်ရရှိသူများ အနက် ကျိုင်းတုံအကျဥ်းထောင်က ၄၃ ဦးလွတ်လာသော်လည်း CDM ကျောင်းဆရာမ မီဆောက လွတ်မြောက်လာခြင်း မရှိသေးကြောင်း ဒေသခံအမျိုးသား တစ်ဦးက ပြောသည်။
“မနေ့က ကျိုင်းတုံမှာ စုစုပေါင်း ၄၃ ယောက်လွတ်ပေးတယ်၊ ဒါပေမဲ့ CDM ကျောင်းဆရာမ မီဆော ကတော့ မလွတ်လာသေးဘူး၊ ၂ နှစ်သမားတွေကို ဦးစားပေးလွတ်လို့ ဆရာမ မပါတာထင်တယ်၊ သူမက ၃ နှစ် ပြစ်ဒဏ်ချခံ ထားရတာ။” ဟု အသက် ၄၀ ဝန်းကျင် အထက်ပါ အမျိုးသားက သျှမ်းသံတော်ဆင့်ကို ပြောသည်။
ထို့အပြင် သျှမ်းပြည် တောင်ပိုင်း ညောင်ရွှေမြို့နယ်မှ တောင်လေးလုံး အကျဉ်းထောင်တွင် အကျဥ်းကျနေသူများ များအနက် အမျိုးသမီးများ ၂၉ ဦးပါဝင်သည့် အကျဥ်းသားများစုစုပေါင်း ၅၇ ဦး လွတ်မြောက်လာကြောင်း သတင်း သိရသည်။
အဆိုပါ လွတ်မြောက်လာသူများတွင် သံလွင်သွေးချင်း အယ်ဒီတာ မမြဝန်းရံ အပါအဝင် ၅၀၅ ပုဒ်မ နှင့် တခြား သော ပုဒ်မဖြင့် အကျဥ်းကျနေသူများလည်း ပါဝင်ကြောင်း ရှေ့နေများထံမှ သိရသည်။
“မနေ့က တောင်လေးလုံးမှာ အမျိုးသမီး ၂၉ ဦးကို အရင်လွတ်ပေးပြီး၊ နောက် အမျိုးသားတွေကိုလည်း ထပ်လွတ် ပေးတယ်၊ စုစုပေါင်း ၅၇ ဦးဖြစ်တယ်၊ သျှမ်းမြောက်လားရှိုး ထောင်ကလည်း ၁၀ ဦးထက် မနည်းလွတ်လာ တယ်” ဟု အမည်မဖော်လိုသူ ရှေ့နေ တစ်ဦးက သျှမ်းသံတော်ဆင့်ကို ပြောသည်။
ယမန်နေ့ နိုဝင်ဘာလ ၁၇ ရက်နေ့တွင် သျှမ်းပြည် မြောက်ပိုင်း လားရှိုးမြို့ ရှိ ပြည်နယ် အကျဥ်းထောင်မှလည်း အကျဥ်းသား ၁၃ ဦးထက်မနည်း ထွက်လာကြောင်းနီးစပ်သည့် ဒေသခံများထံမှ သိရသည်။
လက်ရှိတွင် သျှမ်းပြည် အတွင်းရှိ အကျဥ်းထောင်များမှ ၂ နှစ်ထက်မပိုသည့် ပစ်ဒဏ်ကျခံရသူများ စုစုပေါင်း ၁၀၀ ကျော် ပြန်လွတ်မြောက်လာသော်လည်း နိုင်ငံရေးအကျဥ်းသား အနည်းစုသာပါဝင်ပြီး အများစုမှာ ခိုး၊ ဆိုး၊ လုယက်သူများ ဖြစ်သဖြင့် ပြည်သူများအနေဖြင့် လုံခြုံရေးသတိထားကြရန်လည်း ရှေ့နေများက ပြောဆိုသည်။
Leave a Comments