မြန်မာ – တရုတ်နယ်စပ် မူဆယ်မြို့နယ် ကျင်ဆန်ကျော့ နှင့် ဟိုနောင်ကျေးရွာကြားတွင် စစ်ကောင်စီကား မိုင်းထောင်ဖောက်ခွဲခံရပြီး အရပ်သား ၂ ဦး ထိခိုက်ဒဏ်ရာရရှိပြီး သေဆုံးသွားကြောင်း သတင်းရရှိသည်။
ယမန်နေ့ နိုဝင်ဘာ ၁၆ နေ့လည် ၁ နာရီဝန်းကျင်တွင် စစ်ကောင်စီကားက မုံးကိုးမှ မူဆယ်မြို့ (၁၀၅) မိုင်သို့ လာချိန်တွင် ကျင်ဆန်ကျော့ နှင့် ဟိုနောင်ကျေးရွာကြားတွင် ခလုတ်နှိပ်မိုင်း (၃) လုံး တိုက်ခိုက်ခံရပြီး ထိုမိုင်းကြောင့် လမ်းတွင်ပျက်နေသည့် ကားကိုပြင်နေသည့် ကားဝပ်ရှော့ဆရာ (၂) ဦးသေဆုံးခဲ့သည်။
ထို့ပြင် မိုင်းကြောင့် အိမ်စီးကား ၂စီး ပျက်စီးခဲ့ပြီး စစ်ကောင်စီကားဘီးပေါက်သွားကာ စစ်ကောင်စီတပ်သား ထိခိုက်ဒဏ်ရာ ရရှိမှုမရှိကြောင်းလည်း မူဆယ်မြို့ဒေသခံများ သတင်းပေးပို့ချက်အရသိရသည်။
“ အဲနားပျက်နေတဲ့ကုန် တင်ကို ကားကို ကားဝပ်ရှော့ (၂) ယောက်က သွားပြင်ပေးနေတာ။ ဗုံးပေါက်ကွဲတော့ ၁ ယောက်ကတော့ လမ်းမှာသေတာတဲ့။ ၁ ယောက်ကတော့ မူဆယ်ဆေးရုံမှာလာသေတာ။ ပြည်သူတွေရဲ့ကား ၂ စီးပျက်စီးတယ်။ စစ်ကောင်စီကားတော့ ဘီးပေါက်တယ်။ ထိခိုက်ဒဏ်ရာရရှိတာတော့ မရှိဘူး” ဟု မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါသေဆုံးသွားသည့်ကားဝပ်ရှော့ဆရာတစ်ဦးသည် အသက် (၃၀)ဝန်းကျင်ရှိပြီး၊ ကျန်တစ်ဦးမှာ အသက် (၂၀)ဝန်းကျင်သာရှိကြောင်း လည်း ၎င်းအမျိုးသားက ပြောသည်။
ထိုခလုတ်မိုင်း (၃)လုံးပေါက်ကွဲပြီးနောက်ပိုင်းမှာလည်း စစ်ကောင်စီတပ်သားများက တဖတ်သတ် ပစ်ခတ်မှုရှိခဲ့သည်။
စစ်ကောင်စီကား ဘီးပေါက်သည့်နေရာကိုလည်း ပြည်သူ့စစ်များက လုံခြုံရေးလာရောက်ယူပေးကာ စစ်ဆေးတင်းကြပ်မှုများလည်း ရှိကြောင်း သိရသည်။
စစ်ကောင်စီတပ်ကား ကို ခလုတ်နှိပ်မိုင်းဖြင့် တိုက်ခိုက်သည့်အဖွဲ့သည် မူဆယ်မြို့နယ် ပြည်သူ့ကာကွယ်ရေးတပ်ဖွဲ့ ဘက်တိုက်ခိုက်ခဲ့ပြီး ထိုPDF ထဲမှ တစ်ဦးဖမ်းဆီးခံရကြောင်းလည်း ဒေသခံများပြောပြချက်အရသိရသည်။“ စစ်ကောင်စီရဲ့အတွင်းသတင်းကနေသိရတာ။ သူတို့ မိုင်းကိုဖောက်ခွဲတဲ့သူ ၁ ဦး ဖမ်းမိထားတယ်လို့ပြောတယ်။ ကျန်တဲ့သူက ထွက်ပြေးသွားနိုင်တယ်တဲ့။ အခုလည်း အဲစစ်ကောင်စီကားတွေက မူဆယ် ၁၀၅ မိုင်မှာရှိနေတယ်။ တပ်ရင်း ခလရ ၁၅ တဲ့ ” ဟု မူဆယ်မြို့ ဒေသခံတစ်ဦးက ပြောသည်။
ယမန်နေ့ (နိုဝင်ဘာ ၁၆)ရက် မူဆယ်မြို့နယ် ကျင်ဆန်ကျော့ နယ်စပ်ဂိတ်တွင်ဖြစ်ပွားသည့်ကိစ္စကို သျှမ်းသံတော်ဆင့် အနေဖြင့် မူဆယ် ပြည်သူ့ကာကွယ်ရေးတပ်ဖွဲ့ကို အတည်ပြုရန်ကြိုးစားခဲ့သော်လည်း မရရှိခဲ့ပေ။
ယခုလ နိုဝင်ဘာ ၁၄ ရက်မနက် ၁၁ နာရီဝန်းကျင်တွင် မူဆယ်မြို့ ကောင်းမူးတုံရပ်ကွက် မင်္ဂလာမူဆယ် လမ်းမကြီးဘေးရှိ Top One မိုတယ်ရှေ့တွင် ဗုံးပေါက်ကွဲမှုဖြစ်ပွားခဲ့ပြီး ပြည်သူ ၁၁ ဦးထိခိုက်ဒဏ်ရာရရှိခဲ့ရာ ထိုထဲတွင် အသက် (၅)နှစ်အရွယ် ကလေး ၁ဦးနှင့် အမျိုးသမီး (၃)ဦး ပါဝင်ကြောင်း သိရသည်။
မူဆယ်မြို့နယ်အတွင်း ဖြစ်ပွားသည့် ပစ်ခတ်မှု ၊ မိုင်းပေါက်ကွဲမှုနှင့်ပတ်သက်ပြီး ပြည်သူများသွားလာလှုပ်ရှားသည့်အချိန်နှင့် အလုပ်လုပ်သည့်အချိန်တွင် ရှောင်ရှားပေးရန်လည်း မူဆယ်ဒေသခံများက တောင်းဆိုလိုက်သည်။
ထိုအပြင် ပြည်သူများအနေဖြင့်လည်း စစ်ကောင်စီ နှင့် ပြည်သူ့စစ်များ၏ ကင်းပုံးနေရာ၊ စခန်းများ ၊ စီးပွားရေးနေရာများတွင် ရှောင်ရှားပြီး သွားလာကြပါရန် ပြည်သူ့လုံခြုံရေး နှင့် ကာကွယ်ရေးအဖွဲ့ PSDF ယမန်နေ့ (နိုဝင်ဘာ ၁၆)ရက်တွင် ထုတ်ပြန်ချက်တွင်ရေးသားထားသည်။
Leave a Comments