သျှမ်းပြည်မြောက်ပိုင်း နမ္မတူမြို့ ရပ်ကွက် ၈ တွင်နေထိုင်သူ အမျိုးသားတစ်ဦးသည် ၆ ရက်မြောက်ကြာ အဆက်သွယ်ပြတ်ပြီး ပျောက်ဆုံးနေကြောင်း စုံစမ်းသိရသည်။
အဆိုပါပျောက်ဆုံးသွားသူသည် အသက် (၃၅)နှစ်အရွယ်ရှိ စိုင်းလှသိန်းဖြစ်သည် နိုဝင်ဘာ ၅ရက် မနက် (၉)နာရီခွဲတွင် ဆိုင်ကယ် အနီရောင်ဖြင့် နမ္မတူမြို့ နေအိမ်မှ လားရှိုးနေအိမ်သို့ ပြန်သွားသည့် လမ်းတွင် အဆက်အသွယ်ပြတ်ပြီး ယနေ့(နိုဝင်ဘာ ၁၁)ရက် ထိ ပျောက်ဆုံးနေကြောင်း ၎င်း၏ ညီဖြစ်သူက သျှမ်းသံတော်ဆင့်ကို ပြောသည်။
“ နမ္မတူအိမ်ကနေ လားရှိုးအိမ်ကို ပြန်သွားရင်း လမ်းမှာပျောက်သွားတယ်။ ဓာတ်ဆီသွားဖြည့်ပြီးတာနဲ့ လာရှိုးကိုတစ်ခါတည်း ပြန်မယ်လို့ပြောပြီး လာရှိုးကိုမရောက်ဘူး။ အစ်ကိုက လားရှိုးမှာနေပြီး ပန်းရံအလုပ် လိုက်နေတယ်” ဟု ပျောက်ဆုံးသွားသူ၏ ညီက ပြောသည်။
လက်ရှိမှာ ပျောက်ဆုံးသွားသည့် စိုင်းလှသိန်းနှင့် ပတ်သက်ပြီး ရဲစခန်းသို့ အကြောင်းကြားထားပြီးဖြစ်ကြောင်း၊ နယ်မြေရှိ တိုင်းရင်းသားလက်နက်ကိုင်တပ်ဖွဲ့များကိုလည်း အသိပေးထားကြောင်း သိရသည်။
“ ဒီလိုနိုင်ငံရေးမကောင်းတဲ့အချိန် နောက်ဒီနယ်မြေက လက်နက်ကိုင်ပေါင်းစုံရှိတော့ ဘယ်သူတွေက ခေါ်သွားလဲ။ ဘာဖြစ်နေလဲဆိုတာကိုတော့ စိတ်ပူနေရတယ်” လို့ စိုင်းလှသိန်း၏ ဆွေမျိုးတော်ဆက်သူတစ်ဦးက ဆိုသည်။
စိုင်းလှသိန်းသည် သာမာန်အရပ်သားတစ်ဦးဖြစ်ပြီး၊ မူးယစ်ဆေးဝါးသုံးစွဲမှုမရှိကြောင်းလည်းသိရသည်။
ထိုပျောက်ဆုံးသွားသည့် နမ္မတူ-လားရှိုးလမ်းကြားတွင် တိုင်ရင်းသားလက်နက်ကိုင် တပ်ဖွဲ့များဖြစ်သည့် သျှမ်းပြည်တိုးတက်ရေးပါတီ (SSPP)၊ ကချင်အမျိုးသားလွှတ်လပ်ရေး တပ်မတော် (KIA)၊ တအောင်း (ပလောင်) အမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီ တပ်ဖွဲ့တို့ လှုပ်ရှားသော နယ်မြေတစ်ခု ဖြစ်ကြောင်း သိရသည်။
အလားတူ နိုဝင်ဘာလ ၅ ရက်တွင် သီပေါမြို့မှ အသက် (၂၂) နှစ်အရွယ် မဆောင်းဟေမာန်ငြိမ်းကိုလည်း ကားအမည်းရောင် တစ်စီးနဲ့ အမည်မသိအမျိုးသား (၃) တို့က ဖမ်းဆီခေါ်ဆောင်သွားကာ လက်ရှိအချိန်ထိ ပျောက်ဆုံး နေကြောင်း သိရသည်။
