စစ်ကောင်စီမှ အာဏာသိမ်းပြီးနောက်ပိုင်း မူးယစ်ဆေးဝါး နှင့်လောင်းကစားဝိုင်း များပြားလာသောကြောင့် ပြန်ပေးဆွဲမှု ပိုမိုများပြားလာနိုင်ကြောင်း ဒေသခံများထံ စုံစမ်း သိရှိရသည်။
လောင်းကစားဝိုင်းများကို စစ်ကောင်စီသည် ပြည်သူ့စစ် နှင့် ပူးပေါင်းပြီး လွတ်လပ်စွာ ဖွင့်ခွင့်ပေးထားသောကြောင့် သူခိုး၊ ဓားပြ နှင့် ပြန်ပေးဆွဲမှု ပိုများပြားလာနိုင်ကြောင်း မူဆယ်မြို့ ဒေသခံ အမျိုးသားတစ်ဦးက ပြောသည်။
“မူဆယ်မြို့မှာလည်း ပြန်ပေးဆွဲမှုတွေ ရှိလာနေပြီ။ စစ်တပ်က အာဏာသိမ်းပြီးတော့ လောင်းကစားဝိုင်းတွေကို ပြည်သူ့စစ်တွေ နဲ့ ပေါင်းပြီးတော့ ဖွင့်လာခဲ့တယ်။ လွတ်လွတ်လပ်လပ် ဖွင့်ခွင့်ပေးနေတာ။ အဲ့ကြောင့် သူခိုးတွေ၊ ဓားပြတွေလည်း များလာကြတယ်။ နောက်ကျရင်လည်း ပြန်ပေးဆွဲမှုက ပိုများလာနိုင်တယ် ” ဟု မူဆယ်မြို့ ဒေသခံက ပြောသည်။
အဆိုပါ သူခိုး၊ ဓားပြတိုက်မှု၊ ပြန်ပေးဆွဲမှု များပြားလာခြင်းသည် နိုင်ငံရေး ၊ ကိုဗစ် – ၁၉ ရောဂါ နှင့် စားဝတ်နေရေး ခက်ခဲလာသောကြောင့် တစ်နေ့ထက်တစ်နေ့ လုံခြုံမှု မရှိတော့ကြောင်း သိရသည်။
“လုံခြုံမှုကတော့ မရှိတော့ဘူး။ အခုလို ဖြစ်လာတာလည်း နိုင်ငံရေး အခြေနေကြောင့်၊ ကိုဗစ် အခြေနေကြောင့် နဲ့ စားဝတ်နေရေး အခြေနေကြောင့် လုံခြုံရေးအတွက်က လူတိုင်းမှာ စိုးရိမ်နေရတယ်။ လုံခြုံရေးကတော့ အာဏာသိမ်းပြီးကတည်းက မရှိတော့ဘူး” ဟု သီပေါမြို့ ဒေသခံ အမျိူးသမီးက ပြောသည်။
ပြန်ပေးဆွဲမှု၊ သူခိုး နှင့် ဓားပြများကိုလည်း လက်ရှိ တာဝန်ရှိသူများလည်း ဖမ်းဆီးပေးခြင်း မရှိကြောင်း သိရသည်။
“အဓိကတော့ ငွေကြေးတွေကြောင့်ပဲ သူခိုးတွေ၊ ဓားပြတွေများလာတာ။ ပြန်ပေးဆွဲတာလည်း ငွေကြေးကြောင့်ပဲ။ အဲ့လိုများလာလည်း သူတို့က မဖမ်းဘူး။ အရေးမလုပ်ဘူး။ အလုပ်ကို ထိထိရောက်ရောက်လုပ်တာလည်းမရှိဘူး။ ဖမ်းပြီးရင်လည်း ပြန်လွတ်တာပဲ” ဟု မူဆယ်မြို့ ဒေသခံ က ပြောသည်။
ထို့အပြင် ညအချိန်များတွင်လည်း အပြင်သွားလာပါက လုံခြုံရေးမရှိသည့်အပြင် လက်ရှိမှာ မည်သည့် ဥပဒေမှ မရှိကြောင်း အထက်ပါ သီပေါမြို့ အမျိုးသမီးက ပြောသည်။
“တစ်နေ့တစ်နေ့ ကိုယ့်အသက် လုံခြုံအောင် ကြည့်ပြီးတော့ နေကြရတာပေါ့။ ဥပဒေ အရဆိုလည်း ဘယ်သူကို အားကိုးရမလဲ မသိဘူး။ ဘယ်သူကို အကူညီတောင်းရမလဲ ခေတ်ကာလကြီး ဖြစ်နေတာပေါ့။ ညအချိန်ဆိုရင်လည်း အပြင်တွေ မသွားရဲကြတော့ဘူး။ ညမှောင်တာ နဲ့ တံခါးတွေ ပိတ်ပြီးနေရတော့တယ်။ အရင်လိုမျိုး မဟုတ်တော့ဘူး” ဟု ပြောသည်။
အလားတူ ပြီးခဲ့သည့် အောက်တိုဘာလအတွင်း သျှမ်းမြောက် မူဆယ်မြို့ ကလေးငယ်တစ်ဦး နှင့် သျှမ်းတောင် ပင်လုံမြို့ ဓာတ်ဆီဆိုင် ပိုင်ရှင် အမျိုးသမီးတစ်ဦးတို့သည် ငွေကြေးကြောင့် ပြန်ပေးဆွဲခံရပြီး ပင်လုံမြို့ ဓာတ်ဆီဆိုင်ပိုင်ရှင် သတ်ဖြတ်ခံရကြောင်း သိရသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်အတွင်း လောင်းကစားဝိုင်း ၊ မူးယစ်ဆေးဝါး၊ သူခိုးများ ပိုများလာသည့် အပြင် ပြန်ပေးဆွဲမှုများလည်း တစ်နေ့ထက် တစ်နေ့ ပိုများပြားလာသည်။
