Saturday, December 3, 2022

မိုင်းဆတ်မြို့ မူးယစ်သုံးသူတစ်ဦး အရပ်သားကို ကိုယ်ထိလက်ရောက်ကျူးလွန်

Must read

သျှမ်းပြည် အရှေ့ပိုင်း မိုင်းဆတ်မြို့နယ်ရှိ မူးယစ်ဆေးဝါး သုံးစွဲသူများသည် အရပ်သား ပြည်သူများကို ကိုယ်ထိလက်ရောက်ကျူးလွန်မှုအထိ သောင်းကျန်းမှု ရှိနေကြောင်း သတင်းသိရသည်။

ပြီးခဲ့သည့် အောက်တိုဘာလ ၁၈ ရက်တွင် မိုင်းဆတ်မြို့ ကမ္မဌာန်းကျောင်းတိုက်အတွင်းသို့ ပစ္စည်းဝင်ခိုးသည့် ယာမဆေးစွဲသူ အမျိုးသားတစ်ဦးသည် ကျောင်းဒကာ အရပ်သား တစ်ဦးကို ဓားဖြင့်ထိုးရန် ကြိုးစားသည့် ဖြစ်စဥ် ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“ကမ္မဌာန်းကျောင်းတိုက်ထဲ ဝင်ခိုးတဲ့အချိန် ကျောင်းထိုင်ဘုန်းကြီးက မိသွားတာ၊ သူခိုးကိုယ်တိုင်က ယာမသုံး တယ်လို့ ဘုန်းကြီးဆီ ဝန်ခံတယ်၊ ဘုန်းကြီးက ကျောင်းဒကာကို ဖုန်းဆက်ခေါ်ပြီး အဲ့သူခိုးကို အပ်လိုက်တဲ့ အချိန်မှာ ကျောင်းဒကာကို ဓါးနဲ့ ထိုးသတ်ဖို့ ကြိုးစားတာ၊ အရှောင်မြန်သွားလို့ လူကိုတော့ မထိခိုက်ဘူး” ဟု မိုင်းဆတ် ဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။

ယာမသုံးစွဲသူ

အဆိုပါ ယာမသုံးစွဲသူ အမျိုးသားသည် မိုင်းဆတ်ဒေသခံ အသက် (၂၅) နှစ်ဝန်းကျင် အမျိုးသား ဖြစ်ကြောင်း သိရသည်။

ကျောင်းဒကာကို ဓားဖြင့် ထိုးသတ်ရန် ကြိုးစားပြီးသည့်နောက် ထွက်ပြေးသွားသဖြင့် ရပ်ကွက်လူကြီးများနှင့် သက်ဆိုင်ရာ တာဝန်ရှိသူများက နေအိမ်အထိ လိုက်သွားပြီး လက်ရှိတွင် ရဲစခန်း၌ ဖမ်းဆီးထိန်းသိမ်း ထားကြောင်း သတင်းသိရသည်။

“သူကလည်း မိုင်းဆတ်ဒေသခံပဲဆိုတော့ ကျနော်တို့သိတယ်လေ၊ ဒါကြောင့် သက်ဆိုင်ရာ တာဝန်ရှိသူတွေကို ခေါ်ပြီး သူ့အိမ်ကိုသွားပြီး သူ့ကို ရဲစခန်းမှာ ဖမ်းဆီးထိန်းသိမ်းထားတယ်၊ မိုင်းဆတ်မှာ မူးယစ်ဆေးသားကောင်တွေ သောင်းကျန်းနေတာ အခုလိုမျိုး ပြည်သူတွေကို ဒုက္ခပေးတဲ့အထိ တစ်နေ့တစ်ခြားများလာပေမဲ့ သက်ဆိုင်ရာ နှိမ်နှင်းမှုက ထိရောက်မှု မရှိဘူး” ဟု အထက်ပါ အမျိုးသားက ဆက်ပြောသည်။

ထို့အပြင် မိုင်းဆတ်မြို့ မြို့မရဲစခန်းအနီး မြို့သစ်ရပ်ကွက်အနီးတွင် မူးယစ်ဆေးဝါးများ ပေါ်ပေါ်ထင်ထင် ရောင်းဝယ် သုံးစွဲနေသော်လည်း အာဏာပိုင်များက ဖမ်းဆီးအရေးယူ နှိမ်နင်းခြင်းမရှိကြောင်းလည်း ဒေသခံများက ပြောသည်။

မိုင်းဆတ်မြို့နယ်အတွင်း၌ မူးယစ်ဆေးစွဲသူများ၊ အိမ်ယာမဲ့များကို နေ့စဉ် မြင်တွေ့နေရပြီး ခိုးဆိုးလုနှိုက်မှုများ လည်း ပေါများလာသည့်အတွက် နေ့စဥ်ဘဝ နေထိုင်ရေးက မလုံခြုံကြောင်း ဒေသခံများက ပြောဆိုနေကြသည်။

Leave a Comments

- Advertisement -spot_img

Latest article