သျှမ်းပြည်အရှေ့ပိုင်း ကျိုင်းတုံမြို့တွင် အရပ်ဝတ် နှင့် လူတစ်စုက ရဲဖြစ်သည်ဟု ပြောဆိုပြီး လမ်းသွားလမ်းလာ ပြည်သူများကို စစ်ဆေးမေးမြန်းခြင်းများ ပြုလုပ်သည့်အပြင် အမျိုးသား တစ်ဦးကိုပါ ရိုက်နှက်လိုက်ကြောင်း သတင်းသိရသည်။
ပြီးခဲ့သည့် အောက်တိုဘာလ ၂၇ ရက်နေ့က ကျိုင်းတုံမြို့နယ် ယန်းလောကျေးရွာအုပ်စု ယန်းလောရွာရှိ ယန်းလော – ကတ်ထိုက် လမ်းဆုံအနီး ဆိုင်ကယ် ၆ စီးနဲ့ လူ ၁၀ ဦးခန့်က သွားလာနေသည့် လမ်းသွားလမ်းလာများကို တားမြစ်စစ်ဆေးပြီး ရဲများဖြစ်သည်ဟု ပြောဆိုကြောင်း ဒေသခံများက ပြောသည်။
“ဆိုင်ကယ် ၆ စီးနဲ့ ယန်းလောနဲ့ ကတ်ထိုက် လမ်းဆုံမှာ လာစောင့်နေကြတာ၊ လမ်းသွားလမ်းလာတွေကို တားပြီး ဘယ်ကလာလဲ ဘယ်ကိုသွားမလဲဆိုတာတွေကိုမေးပြီး လွတ်ပေးလိုက်တယ်၊ ဒါပေမဲ့ ဆိုင်ကယ် တစ်စီး နဲ့ လာတဲ့ အမျိုးသားတစ်ဦးကိုတော့ အဲ့လို မလွတ်ပေးပဲ ဝိုင်းရိုက်ကြတာ၊ ဘာကြောင့်ရိုက်လဲ ဆိုတာတော့ မသိရဘူး” ဟု ဖြစ်စဥ်ကို သိရသည့် အသက် ၄၀ ကျော် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ရိုက်နှက်ခံရသည့် အမျိုးသားသည် အများနည်းတူ စစ်ဆေးခံပြီး ဆိုင်ကယ်တူးပေါက်များလည်း စစ်ဆေးခံရပြီးနောက် ရဲဟု ပြောဆိုသည့် လူတစ်စု၏ ရာဘာတုတ်ဖြင့် ရိုက်နှက်ခြင်းကို ခံရကြောင်း ဒေသခံ အမျိုးသား က ပြောသည်။
“သူတို့ ကိုယ်သူတို့ ရဲလို့ပြောကြပေမဲ့ ရဲနဲ့လည်း မတူပါဘူး၊ အားလုံးက အရပ်ဝတ်တွေပဲ၊ ရိုက်ခံရတဲ့ အမျိုးသားက အသက် ၃၀ ဝန်းကျင် လောက်ရှိမယ်၊ ရိုက်ပြီး ပြန်လွတ်ပေးတော့ သူ့ဆိုင်ကယ်သူ ပြန်မောင်း သွားတယ်၊ ဒီကိစ္စကို ရဲတွေလည်း မတိုင်ရဲကြသေးဘူး” ဟု အထက်ပါ အမျိုးသားက ဆက်ပြောသည်။
လက်ရှိတွင် ရိုက်နှက်ခံရသည့် အမျိုးသားမှာ ဦးခေါင်း၊ တင်ပါးနှင့် ခြေထောက်တို့တွင် မစိုးရိမ်ရ ညိုမဲဒဏ်ရာများရရှိခဲ့ပြီး ငွေကြေး အခက်အခဲ နှင့် ကြောက်လန့်မှုကြောင့် ရဲစခန်းသို့လည်း မတိုင်ရဲကြောင်း သိရသည်။
စစ်တပ်မှ နိုင်ငံတော် အာဏာသိမ်းပြီး နောက်ပိုင်း ကျိုင်းတုံမြို့ အပါအဝင် နိုင်ငံ နှင့် တဝှမ်းလုံး တရားဥပဒေ စိုးမိုးမှုကင်းမဲ့လာပြီး ဒေသခံပြည်သူများ၏ နေ့စဥ်ဘဝသည် လုံခြုံမှု မရှိကြောင်း ဒေသခံများက ပြောဆိုကြသည်။
