သျှမ်းပြည်မြောက်ပိုင်း မူဆယ် – လားရှိုး ပြည်ထောင်စု လမ်းမပေါ် ရှိ ခရီးသွား ပြည်သူများထံ မှတ်ပုံတင် နှင့် ရပ်ကွက် ထောက်ခံစာ ဆောင်ထားခြင်း မရှိလျှင် စစ်ကောင်စီ လက်အောက်ခံ ဝန်ထမ်းများက ငွေကြေးတောင်းယူမှု ပြုလုပ်နေကြောင်း စုံစမ်းသိရှိရသည်။
စစ်အာဏာသိမ်းပြီး ၂ နှစ်နီးပါး ကာလမှာ မူဆယ် – လားရှိုး ပြည်ထောင်စု လမ်းမပေါ်ရှိ စစ်ကောင်စီ ဂိတ် (၅) ခုထက်မနည်း မှတ်ပုံတင် နှင့် ထောက်ခံစာများ စစ်ဆေးမေးမြန်းမှုရှိနေကြောင်း လားရှိုး ယာဥ်မောင်း တစ်ဦးက သျှမ်းသံတော်ဆင့် ကိုပြောသည်။
မူဆယ် – လားရှိုး ပြည်ထောင်စု ကားလမ်းမပေါ်တလျောက်တွင် နမ့်ခိုက်ဂိတ်၊ နမ့်ပေါ်တံတားဂိတ်၊ ရေပူဂိတ်၊ လားရှိုးမြို့ ရှိ မြို့ရှောင်လမ်း ဂိတ် နှင့် လားရှိုးမြို့ ဝင်ဂိတ်များ ဖြစ်ကြောင်း သိရှိရသည်။
“စစ်အာဏာ သိမ်းပြီး နောက်ပိုင်း စစ်ကောင်စီ စစ်ဆေးရေး ဂိတ်တွေ အရမ်းများလာတယ်။ မူဆယ် နဲ့ လားရှိုးကြားဆို ဂိတ် ၄ ခု လောက်ရှိတယ်။ မှတ်ပုံတင် မပါရင် သူတို့ ငွေတောင်းတယ်။ တိုင်းရင်းသား လူမျိုး တွေဆိုရင် တစ်ယောက်ကို ကျပ်ငွေ ၃ သောင်း ၊ တရုတ် လူမျိုးဆိုရင်ကျပ်ငွေ ၈ သောင်း ကနေ ၁ သိန်း ထိတောင်းတယ်။ ဂိတ်တိုင်းကို စစ်ဆေးမေးမြန်းတယ်။ သူတို့ နဲ့ စကားပြောတတ်ရင်တော့ တစ်ယောက်ကို ကျပ်ငွေ ၅ ထောင် လောက်ပဲ ပေးရတယ် “ ဟု ၎င်း ယာဉ်မောင်းသမားတစ်ဦးက ပြောသည်။
ယခင် စစ်အာဏာ မသိမ်းခင်ကာလတွင် ယခုလို စစ်ဆေးရေးဂိတ်ထားရှိခြင်း မရှိပဲ စစ်အာဏာသိမ်းပြီးနောက်ပိုင်းမှ စစ်ဆေးမေးမြန်းမှု ရှိလာပြီး ငွေကြေးတောင်းခံမှု ပြုလုပ်နေကြောင်း သိရှိရသည်။
ထို့အပြင် စစ်ကောင်စီ၏ စစ်ဆေးရေးဂိတ်တွင် မှတ်ပုံတင် နှင့် ရပ်ကွက်ထောက်ခံစာ များ စစ်ဆေးမေးမြန်းမှုကြောင့် ခရီးသွားပြည်သူများက သွားလာရန် ခက်ခဲမှုရှိနေကြောင်း ခရီးသွား ပြည်သူတစ်ဦးက ပြောသည်။
“အခု ဘယ်သွားသွား မှတ်ပုံတင် နဲ့ ကိုယ်နေတဲ့ ရပ်ကွက် ထောက်ခံစာပါမှ ရတယ်။ အဓိကတော့ မှတ်ပုံတင်တော့ ပါကို ပါမှရတယ်။ သူတို့ခေတ်မှာ သူတို့လုပ်စားလို့ရတော့ လုပ်စားကြနေတာ။ ပြည်သူတွေတော့ ဒုက္ခရောက်တာပေါ့ “ ဟု ၎င်း ဒေသခံတစ်ဦးက ပြောသည်။
ပြီးခဲ့သည့် အောက်တိုဘာ ၁၈ ရက်တွင် မူဆယ် – မန္တလေး ကားလမ်းမပေါ် ခရီးသွားပြည်သူများထံ တိုင်းရင်းသားလက်နက်ကိုင်တပ်ဖွဲ့မှ ကုန်တင်ကား တစ်စီးလျှင် ကားဘီး အရေအတွက်ဖြင့် တစ်ဘီးကို ကျပ်ငွေ (တစ်သိန်း မှ နှစ်သိန်း) အထိ ကောက်ခံနေကြောင်း သိရသည်။
