သျှမ်းပြည်တောင်ပိုင်း တောင်ကြီးမြို့ရှိ စစ်ကောင်စီ လက်အောက်ခံ ရာအိမ်မှူးများ နှင့် ရဲများက ဧည့်စာရင်း မတိုင်သူများထံ ပိုက်ဆံတောင်းယူမှု ပြုလုပ်နေကြောင်း စုံစမ်း သိရှိရသည်။
ပြီးခဲ့သည့် အောက်တိုဘာ ပထမပတ်မှာ သစ်တော ရပ်ကွက်ရှိ နေအိမ်တစ်လုံးထဲတွင် လူငယ်စုံတွဲနှစ်ဦး အတူတူနေထိုင်ရာ ဧည့်စာရင်း တိုင်ကြားထားခြင်း မရှိသောကြောင့် ရဲများက လာရောက် စစ်ဆေးမေးမြန်းပြီးနောက် မှတ်ပုံတင်ကတ်ပြား ကို သိမ်းယူသွားကြောင်း စုံစမ်း သိရှိရသည်။
အဆိုပါ မှတ်ပုံတင် ကတ်ပြားကို ရဲစခန်းတွင် ကျပ်ငွေ (သုံးသောင်းခွဲ) ဖြင့် ပြန်ရွေးယူခဲ့ရကြောင်း နီးစပ်သူ အသိုင်းအဝိုင်း က သျှမ်းသံတော်ဆင့် ကိုပြောသည်။
“ သူတို့အိမ်မှာ သူတို့လာနေတာကို ဧည့်စာရင်း မတိုင်လို့ဆိုပြီး ငွေလာညစ်တာ။ သူတို့နှစ်ယောက်က လက်မထပ် ကြသေးပေမယ့် အတူနေထိုင်ပြီး အလုပ်လုပ်ကြတယ်။ အိမ်ထောင်စု ဇယားထဲမှာ သူ့ကောင်လေး နာမည်မပါလို့ဆိုပြီး ရဲက မှတ်ပုံတင် သိမ်းသွားတယ်။ နောက်နေ့တော့ ရဲစခန်းမှာကျပ်ငွေ (၃သောင်း) နဲ့ သွားရွေးရတယ် “ ဟု နီးစပ်သူ အမျိုးသား တစ်ဦး က ပြောသည်။
အလားတူ မိမိနေထိုင်သော ရပ်ကွက် နှင့် နေထိုင်ကြောင်း ထောက်ခံစာ ရှိထားရမည်ဖြစ်ကြောင်း စုံစမ်းသိရှိရသည်။
လက်ရှိတွင် တောင်ကြီးမြို့ရှိ ရွှေတောင်ရပ်ကွက်၊ ညောင်ပင်သာရပ်ကွက်၊ စဝ်စံထွန်းရပ်ကွက်၊ သစ်တောရပ်ကွက် နှင့် ဦးကြီးခမ်းရပ်ကွက် စသည်ဖြင့် ရဲများက ဧည့်စာရင်းစစ်ခြင်းကို အကြောင်းပြပြီး ပိုက်ဆံကောက်ခံ နေကြောင်း တောင်ကြီးဒေသခံ အမျိုးသားတစ်ဦးက ပြောသည်။
“ အခုက သူတို့ ရပ်ကွက်တိုင်း လိုလိုကို လုပ်နေတယ်။ ဧည့်စာရင်း စစ်တယ်ဆိုပြီး ငွေတောင်းခံတယ်။ ရပ်ကွက်တိုင်းတော့ သူတို့ငွေတောင်းခြင်း မတူဘူး။ တချို့ မှတ်ပုံတင်ထဲကတမျိုး အိမ်ထောင်စု ဇယားထဲ တမျိုးဆိုရင် ပိုက်ဆံပိုကုန်တယ်။ တာဝန်ယူတယ်ဆိုတဲ့ဟာကို အခွင့်အရေးယူပြီး လုပ်စားနေကြတာ“ ဟု ၎င်းဒေသခံတစ်ဦးက ပြောသည်။
ထို့အပြင် တောင်ကြီးမြို့သို့ ရွှေ့ပြောင်းလာပြီး အလုပ်လုပ်နေသော တခြားမြို့နယ် ဒေသခံများကလည်း ဧည့်စာရင်းတိုင်ကြားမှုနှင့် ပတ်သက်ပြီး ခက်ခဲများစွာ ရင်ဆိုင်နေရကြောင်း ရပ်ကွက်ရုံးထံတွင် နေထိုင်ကြောင်း ထောက်ခံစာတစ်ခုကို ကျပ်ငွေ (ငါးထောင်) ကျပ် တောင်းခံနေကြောင်း သိရသည်။
Leave a Comments