သျှမ်းပြည်တောင်ပိုင်း ကျေးသီးမြို့နယ်အတွင်း ဆိုင်ကယ်များကို လိုက်လံခိုးယူနေသည့် သူခိုးအဖွဲ့ကို ဒေသခံများနှင့် ဒေသတွင်း အာဏာပိုင်များ ပူးပေါင်းပြီး ဖမ်းဆီးရမိခြင်းဖြစ်ကြောင်း သတင်းသိရသည်။
ပြီးခဲ့သည့် အောက်တိုဘာလ ၂ ရက်တွင် ကျေးသီးမြို့နယ် မြို့မဈေးသို့ ဆိုင်ကယ်ခိုးယူသွားသည့် ဆိုင်ကယ် သူခိုးအဖွဲ့သည် ယင်းနေ့တွင်ပင် ပြည်သူ့ဆေးရုံအတွင်းမှ ဝန်ထမ်းတစ်ဦး၏ ဆိုင်ကယ်ကိုလည်း ခိုးယူခဲ့ကြောင်း ဒေသခံများထံမှ သိရသည်။
“သူခိုးအဖွဲ့က အားလုံး အမျိုးသား လူငယ်တွေ ဖြစ်တယ်၊ သျှမ်းမြောက် နမ့်ဆန်ဘက်ကနေ ဒီ ကျေးသီးဘက် ကို ရောက်လာကြတာတဲ့ တည်းခိုခန်းမှာ တည်းကြတာ၊ ၂ ရက်နေ့မှာ ဈေးထဲမှာရော ဆေးရုံဝန်းထဲမှာရော ဆိုင်ကယ်တွေကို ဝင်ခိုးပြီး မိုင်းကိုင်ဘက် ထွက်ပြေးကြချိန်မှာ ပြည်သူ နဲ့ တာဝန်ရှိသူတွေ ဝိုင်းဖမ်းကြတာ” ဟု ကျေးသီးမြို့ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဆိုင်ကယ်ခိုးသူ အဖွဲ့သားများသည် စုစုပေါင်း (၆) ယောက်ဖြစ်ကြပြီး သျှမ်းမြောက် နမ့်ဆန်မြို့မှ လူငယ်များ ဖြစ်ကြကြောင်း သတင်းသိရသည်။
၎င်းတို့ကို ဆေးရုံဝန်းမှ ဆိုင်ကယ်ခိုးပြီး ထွက်ပြေးစဥ်တွင် ကျေးသီး – မိုင်းကိုင် လမ်း၌ ဖမ်းဆီးမိခြင်းဖြစ်ပြီး လက်ရှိတွင် ရဲလက်သို့ အပ်နှံလိုက်ပြီဖြစ်ကြောင်းလည်း သူခိုးဖမ်းဆီးမှုတွင် ပါဝင်သည့် အမျိုးသားတစ်ဦးက ပြောသည်။
“ဈေးထဲခိုးလာတဲ့ ဆိုင်ကယ်ကို ကောင်းလန်းဘက်သွားတဲ့ တောလမ်းထဲမှာ လျှို့ဝှက်ထားတာတဲ့၊ ပြည်သူရယ်၊ ရဲရယ်ပေါင်းပြီး လိုက်ဖမ်းတာ၊ အဲ့လမ်းမှာ ရှိတဲ့ SSPP/SSA က သူတို့ဂိတ်ကနေ တားပေးလို့ ဖမ်းမိသွားတယ်၊ အားလုံးကို ရဲလက်အပ်လိုက်ပါပြီ၊ အခု ရဲစခန်းအချုပ်မှာပါ” ဟုအထက်ပါ ပုဂ္ဂိုလ်က ပြောသည်။
ခိုးယူသွားသည့် ဆိုင်ကယ်နှစ်စီးနှင့်အတူ ဖမ်းဆီးရမိခြင်းဖြစ်ပြီး လက်ရှိတွင် အမှုကိစ္စများကို ကျေးသီးမြို့မ ရဲစခန်းမှ ကိုင်တွယ်လုပ်ဆောင်နေကြောင်း ဒေသခံများက ပြောသည်။
ပြီးခဲ့သည့် တစ်ပတ်တွင်လည်း ကျေးသီးမြို့အတွင်းတွင် ကားဝယ်မည်ဟု ပြောဆိုပြီး ကားကို မောင်းယူသွားသည့် ဖြစ်စဥ် ဖြစ်ပွားခဲ့ကြောင်း သတင်းသိရသည်။
စစ်တပ် အာဏာသိမ်းပြီးနောက်ပိုင်း ကျေးသီးမြို့ အပါအဝင် သျှမ်းပြည်တွင်းရှိ မြို့နယ်များတွင်လည်း လောင်းကစားဝိုင်းများ၊ မူးယစ်ဆေးသုံးစွဲသူများ များပြားလာသဖြင့် ခိုးယူ လုယက်မှုများ မကြာခဏ ဖြစ်ပွားခဲ့သည်။