သျှမ်းပြည်တောင်ပိုင်း နမ့်စန်မြို့ ဧည့်စုတည်းခိုခန်းတွင် ယနေ့ (အောက်တိုဘာ ၃)ရက် ညနေပိုင်း၌ ပစ်ခတ်မှုဖြစ်ပွားခဲ့ပြီး လက်နက်များစွာလည်း ဖမ်းဆီးရမိကြောင်း သတင်းသိရသည်။

ယနေ့ (အောက်တိုဘာ ၃) ရက် ညနေ ၅ နာရီခွဲဝန်းကျင် တွင် နမ့်စန်မြို့ ဧည့်စုတည်းခိုခန်း၌ အမည်မသိလက်နက်အုပ်စုနှစ်ဖွဲ့မှ အချင်းချင်းပစ်ခတ်မှုဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“အိမ်စီးကားတွေနဲ့ လာကြတာ အင်အားတော်တော်များတယ်၊ ဧည့်စုတည်းခိုခန်းထဲမှာလည်း အရပ်ဝတ်နဲ့ အခြားလက်နက်ကိုင်တစ်ဖွဲ့ရှိတယ်၊ ကားနဲ့လာကြတဲ့အဖွဲ့က စပစ်တာ၊ သူတို့အချင်းချင်းပစ်ခတ်ကြတာ၊ ၁၀ ချက်လောက်ပဲ၊ တည်းခိုခန်းထဲကအဖွဲ့က ငါးယောက်လောက်အဖမ်းခံရတာတွေ့တယ်၊ လက်နက်တွေလည်း သယ်ထုတ်လာ ကြတာတွေ့ရတယ်” ဟု ဖြစ်စဥ်ကိုသိသည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

ဧည့်စုတည်းခိုခန်းအတွင်းရောက်နေသည့် လက်နက်ကိုင်အဖွဲ့မှ အမျိုးသား ၅ ဦးခန့် ဖမ်းဆီးခံရကြောင်းနှင့် ၎င်းတို့လက်နက်များကို ကားနှင့်လာသည့်အဖွဲ့မှ သယ်ထုတ်သွားကြောင်း ဒေသခံများက ပြောသည်။

လက်ရှိတွင် အဆိုပါ ပစ်ခတ်မှုသည် မည်သည့်အကြောင်းကြောင့် ဖြစ်ရခြင်းနှင့် မည်သည့်လက်နက်ကိုင် တပ်ဖွဲ့များ ဖြစ်ကြသည်ကို သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေး။

ယင်းကိစ္စဖြစ်စဥ်များအတွက် ဧည့်စုတည်းခိုခန်းထံ ဖုန်းဖြင့် ဆက်သွယ်သော်လည်း ဖုန်းလက်ခံ ဖြေကြားခြင်း မရှိခဲ့ပေ။

နမ့်စန်မြို့သည် စစ်ကောင်စီ တပ်၊ တိုင်းရင်းသား လက်နက်ကိုင်ပေါင်းစုံရှိသည့်အပြင် ပြည်သူ့စစ်များ လှုပ်ရှားသည့် ဒေသတစ်ခုဖြစ်သည်။