သျှမ်းပြည်အရှေ့ပိုင်း မိုင်းတုံမြို့နယ်တွင် ‘ဝ’ ပြည်သွေးစည်းညီညွတ်ရေးတပ်မတော် (UWSA) နှင့် စစ်ကောင်စီလက်အောက်ခံ လားဟူပြည်သူ့စစ်တို့အကြား ပစ်ခတ်မှုဖြစ်ပွားခဲ့ပြီးနောက် ဒေသတွင်း စစ်ရေးတင်းမာမှုများ ဆက်လက်မြင့်တက်နေကြောင်း သတင်းရရှိသည်။
ပြီးခဲ့သည့် (ဖေဖော်ဝါရီလ ၁၄ ရက်) နံနက်ပိုင်းက မိုင်းတုံမြို့နယ်အတွင်းရှိ စစ်ဆေးရေးဂိတ်တစ်ခုတွင် UWSA တပ်ဖွဲ့ဝင်များက လားဟူပြည်သူ့စစ်အဖွဲ့၏ ယာဉ်တစ်စီးကို တားဆီးစစ်ဆေးရာမှ နှစ်ဖက်အငြင်းပွားပြီး၊ လားဟူပြည်သူ့စစ်ဘက်မှ စတင်ပစ်ခတ်ခဲ့ကြောင်း အဆိုပါဖြစ်စဉ်ကိုသိရှိသူ ပုံပါကျင်ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုပစ်ခတ်မှုကြောင့် ‘ဝ’ တပ်ဖွဲ့ဝင် (၃) ဦးသေဆုံးသည့်အထိဖြစ်ပွားကာ ၎င်းတို့၏ အလောင်းများကို နားကောင်းမူးဘက်သို့ ပို့ဆောင်ခဲ့ကြောင်း ဆိုသည်။
“အဲ့စစ်ဆေးရေးဂိတ်မှာ အငြင်းပွားရာကနေ လားဟူပြည်သူ့စစ်ဘက်က သေနတ်နဲ့ စပစ်တယ်လို့ သိရတယ်။ ‘ဝ’တပ်ဖွဲ့ဝင် အရာရှိလည်း သေတယ် ပြောတယ်၊ တချို့ကလည်း သုံးဦးလောက်သေတယ် ပြောတယ်။ သေချာတော့ မသိရသေးဘူး။ အလောင်းကိုတော့ နားကောင်းမူးက နားကျောင်းလုံဘက်မှာ ရှိတယ်” ဟု ပုံပါကျင်ဒေသခံ အမျိုးသားတစ်ဦးက ပြောပြသည်။
ဒေသခံအချို့၏ ပြောပြချက်အရ လောင်းကစားရာမှ နှစ်ဖက်ရန်ဖြစ်စကားများကြပြီး သေနတ်ဖြင့် ပစ်ခတ်ခဲ့ခြင်း ဖြစ်ကြောင်း ဆိုသည်။
အဆိုပါဖြစ်စဉ်အတွင်း UWSA ဘက်မှ အရာရှိတစ်ဦးအပါအဝင် တပ်ဖွဲ့ဝင်အချို့ သေဆုံးဒဏ်ရာရမှုရှိသည်ဟု ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြားအတည်မပြုနိုင်ခြင်း မရှိသေးပေ။
လက်ရှိတွင် UWSA တပ်ဖွဲ့သည် ပုံပါကျင်၊ ပါချီးနှင့် ဝမ်မိုင်ကျေးရွာများအဝင်ရှိ လမ်းကြောင်းတစ်လျှောက်တွင် စစ်ဆေးရေးဂိတ်များ ထပ်မံတိုးမြှင့်ထားပြီး လုံခြုံရေးတင်းကြပ်ထားကြောင်း အထက်ပါ အမျိုးသားတစ်ဦးက ပြောသည်။
ထို့ပြင် ပစ်ခတ်မှုဖြစ်ပွားခဲ့သည့် နေရာတစ်ဝိုက်ရှိ UWSA တပ်ဖွဲ့များကို ၇ ရက်အတွင်း တပ်ဆုတ်ပေးရန် စစ်ကောင်စီဘက်က တောင်းဆိုထားကြောင်းလည်း ဒေသခံများထံမှ သိရသည်။
“ပါချီးရွာ ဘုန်းကြီးကျောင်းထဲမှာ ဝတပ်ဖွဲ့ဝင်တွေ အခုထိ ရှိနေတုန်းပဲ။ လားဟူပြည်သူ့စစ်တွေကတော့ ပါချီးနဲ့ မိုင်းဟန်ရွာတွေမှာ ရှိတယ်။ စစ်တပ်ဘက်ကတော့ လားဟူအဖွဲ့ကို မပစ်ဖို့ ပြောထားတယ်လို့ သတင်းထွက်နေတယ်။ အခု ဝတပ်ဖွဲ့က အင်အားတွေတိုးထားတယ်။ လမ်းတစ်လျှောက်မှာရှိတဲ့ ဝတပ်ဖွဲ့တွေကို ၇ ရက်အတွင်း တပ်ဆုတ်ပေးဖို့ စစ်တပ်ဘက်က ပြောနေတယ်” ဟု အမည်မဖော်လိုသူ နားကောင်းမူးကျေးရွာ ဒေသခံတစ်ဦးက ပြောသည်။
မိုင်းတုံမြို့နယ်သည် UWSA ၏ တောင်ပိုင်း (၁၇၁) စစ်ဒေသတွင် ပါဝင်သည့် အရေးပါသော နယ်မြေတစ်ခုဖြစ်ပြီး ယခုကဲ့သို့ စစ်ရေးတင်းမာမှုများကြောင့် ဒေသခံရွာသားများမှာ တိုက်ပွဲများ ထပ်မံဖြစ်ပွားလာမည်ကို စိုးရိမ်လျက်ရှိကြသည်။
အဆိုပါဖြစ်စဉ်နှင့် ပတ်သက်၍ နှစ်ဖက်အဖွဲ့အစည်းများထံမှ တရားဝင် ထုတ်ပြန်ချက်တစ်စုံတစ်ရာ ထွက်ပေါ်လာခြင်း မရှိသေးပေ။
တိုင်းရင်းသားလက်နက်ကိုင်များအနက် အင်အားအကြီးဆုံး ဖြစ်သည့် ဝပြည်သွေးစည်းညီညွတ်ရေးတပ်မတော် (UWSA)၏ ဌာနချုပ်တည်ရှိရာ ‘ဝ’မြောက်ပိုင်းအပြင် မြန်မာ-ထိုင်းနယ်စပ်ရှိ တာချီလိတ်မြို့နယ်၊ မိုင်းဆတ်မြို့နယ်၊ မိုင်းတုံမြို့နယ်၊ ဟွေအော်နှင့် ပုံပါကျင်ဒေသတို့ အပါအဝင် မြို့နယ် ၇ မြို့နယ်ကို ဝတောင်ပိုင်းဒေသ (သို့မဟုတ်) ၁၇၁ စစ်ဒေသဟု သတ်မှတ်ထားသည်။
Leave a Comments