သျှမ်းပြည်မြောက်ပိုင်း တန့်ယန်းမြို့တွင် ဆိုလာဘက်ထရီ ရှော့ခ်ဖြစ်ရာမှ နေအိမ်တစ်လုံး မီးလောင်ပြာကျသွားကြောင်း သတင်းသိရသည်။
ယနေ့ အောက်တိုဘာ ၃ ရက် နေ့လည်ပိုင်း ၁၂ နာရီဝန်းကျင်တွင် တန့်ယန်းမြို့၊ တပ်ဦးကျောင်း အောက်ဘက်နားရှိ ရပ်ကွက် ၈၊ အုပ်စု ၇ အတွင်းမှ နေအိမ်တစ်လုံး မီးလောင်ပြာကျသွားကြောင်း သွားရောက်ကူညီခဲ့သူ မီးသတ်ဝန်ထမ်းတစ်ဦးမှ သျှမ်းသံတော်ဆင့်ကို ပြောသည်။
“အားသွင်းထားတဲ့ ဆိုလာ ဘက်ထရီ အပူလွန်ကဲပြီး ရှောခ့်ဖြစ်လို့ မီးလောင်တာလို့ သိရတယ်၊ အိမ်ရှင်တွေ အားလုံးက အပြင်ရောက်နေချိန် ဘယ်သူမှ အိမ်မှာမရှိတဲ့အချိန်ဆိုတော့ မီးတောက်မှ ပတ်ဝန်းကျင်က ကျနော်တို့ဆီကို ဖုန်းဆက်အကူညီတောင်းလာလို့ သွားငြိမ်းခဲ့ရတယ်” ဟု အထက်ပါ ပုဂ္ဂိုလ် ကပြောသည်။
မီးလောင်မှု ဖြစ်သွားသည့် အိမ်သည် သွပ်မိုးထရံကာအိမ် တစ်ထပ်အိမ် ဖြစ်ပြီး ပစ္စည်းတော်တော်များများ မီးထဲ ပါသွားကြောင်းလည်းသိရသည်။
မြန်မာနိုင်ငံအတွင်းသို့ တင်သွင်းလာသည့် ဆိုလာဘက်ထရီများသည် တရုတ်နိုင်ငံထုတ် ပစ္စည်းများဖြစ်ပြီး၊ မြန်မာပြည်မှ ပြည်သူအများစုသည် ဆိုလာဘက်ထရီ အသုံးပြုပုံကို နားမလည်ကြောင်းလည်း တန့်ယန်းမြို့တွင် နေထိုင်သည့် ဒေသခံ အမျိုးသားတစ်ဦးက ပြောသည်။
“ဆိုလာ ဘက်ထရီတွေကို လျှပ်စစ်မီး မလာလို့ သုံးတာရှိသလို တချို့ က လျှပ်စစ်မီး မရလို့ သုံးစွဲကြတယ်။ နည်းစနစ်ကျကျ သုံးတတ်လားဆိုတော့ မသုံးတတ်ကြဘူး။ အားသွင်းတာကစပေါ့။ သေချာမသုံးတတ်ရင်တော့ လူတွေ အတွက် ဘေးအန္တရာယ် ကြီးတယ်” ဟု တန့်ယန်းမြို့မှ ဒေသခံအမျိုးသား က ဆိုသည်။
တန့်ယန်းမြို့တွင် မတ် ၃ ရက်နေ့ နေအိမ် ၃ လုံး မီးလောင်မှုဖြစ်ပွားခဲ့ပြီး၊ အမျိုးသမီး တစ်ဦးသေဆုံးခဲ့သည်။ သျှမ်းပြည်အတွင်း ဆိုလာပြား အားသွင်းရာမှ မီးလောင်မှု မကြာခဏဖြစ်ပွားခဲ့ပြီး နေအိမ်ပြာကျသည့်အထိ မီးလောင်မှုဖြစ်ခဲ့သည်။
Leave a Comments