သျှမ်းပြည်မြောက်ပိုင်း နမ္မတူမြို့နယ်မှ စစ်ကောင်စီတပ်ဘက်မှ လက်နက်ကြီး ရမ်းသမ်းပစ်ခတ်မှုကြောင့် လူနေအိမ်တစ်လုံး ပျက်စီးသွားကြောင်း သတင်း သိရသည်။

ပြီးခဲ့သည့် စက်ဘာလ ၂၉ ရက်တွင် နမ္မတူမြို့နယ် နှင့် ကပ်လျက် မန်တုံမြို့နယ် ဘက်ရှိ စစ်ကောင်စီတပ်ဖွဲ့ နှင့် ကချင်လွတ်မြောက်ရေးတပ်မတော် KIA ၊ PDF တို့ ပူးပေါင်းပြီး ကုန်းကယားကျေးရွာအနီး တိုက်ပွဲဖြစ်ပွားပြီးနောက် စစ်ကောင်စီဘက်မှ လက်နက်ကြီးများဖြင့် ရမ်းသမ်းပစ်ခတ် ခြောက်လန့်ကြောင်း ဒေသခံများ ကပြောသည်။

“KIA/ PDF တို့ရဲ့ တပ်စခန်းနေရာကို အင်အား ၁၀၀ နီးပါးရှိတဲ့ စကစ တပ်က ခလရ ၁၃၀ တို့က ဝင်တိုက်တာ အဲ့တိုက်ပွဲက တစ်နာရီ နီးပါးကြာတယ်၊ နောက်တော့ KIA/PDF တွေ နမ္မတူမြို့ထဲ ဝင်လာမှာကြောက်လို့လား မသိဘူး ၊ ခမယ ၃၂၄ က လက်နက်ကြီး နဲ့ ရမ်းပစ်လို့ နမ့်ခုမ်လုံရွာက နေအိမ်တစ်လုံး လက်နက်ကြီးထိ ပျက်စီးသွားရတယ်” ဟု နမ္မတူမြို့နယ်မှ အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

KIA/PDF နှင့် စစ်ကောင်စီ တပ်ဖွဲ့တို့ တိုက်ပွဲဖြစ်ပွားသည့် နေရာသည် နမ္မတူမြို့ နှင့် ၁၄ မိုင်ခန့် ကွာဝေးသည်။

KIA/PDF တို့ မြို့ထဲ ဝင်လာမည်ကို စိုးရိမ်မှုဖြင့် စစ်ကောင်စီဘက်မှ လက်နက်ကြီး ရမ်းသမ်းပစ်ခတ်ခြင်း ဖြစ်ကြောင်း ဒေသခံများက ပြောသည်။

ယင်းကဲ့သို့ တိုက်ပွဲဖြစ်ပွားမှုသည် စစ်ကောင်စီ မှ လက်နက်ကြီး ရမ်းသမ်း ပစ်ခတ်မှုတွေကြောင့် နမ်ခုမ်လုံကျေးရွာ၊ ဆင်လီကျေးရွာ၊ ကုန်းကယားကျေးရွာတို့မှ ဒေသခံများ စုစုပေါင်း ၃၀၀ ကျော်သည် နမ္မတူမြို့ပေါ်ရှိ ဗုဗ္ပာရုံကျောင်း ဘုန်းကြီးကျောင်း နှင့် မြို့လယ်ကျောင်းတို့တွင် စစ်ရှောင် ခိုလှုံနေကြောင်း သိရသည်။

“နမ့်ခုံလုံရွာကို လက်နက်ကြီးကျတုန်းက အိမ်ရှင် နဲ့ ရွာသားတွေ ထွက်ပြေးတိမ်းရှောင်နေကြတဲ့အချိန်မို့ လူထိခိုက်မှု မရှိဘူး၊ အိမ်ကြီးကတော့ ပြိုကျသွားတယ်၊ သွပ်မိုး ပျဉ်ထောင်အိမ်ပါ၊ အခု ရွာထဲမှာတော့ တော်တော်များက အိမ်စောင့်တစ်ယောက်ထားပြီး ထွက်ပြေးကြတာများတယ်” ဟု ဒေသခံ အမျိုးသမီးတစ်ဦးက သျှမ်းသံတော်ဆင့် ကိုပြောသည်။

လက်ရှိ ဒေသအတွင်း စစ်ရေးတင်းမာမှု ရှိနေသေးသည့်အပြင် စစ်ကောင်စီဘက်မှ လက်နက်ကြီးဖြင့် ရမ်းသမ်းပစ်ခတ်မှုကို ကြောက်နေရသဖြင့် ဘုန်းကြီးကျောင်းတို့တွင် စစ်ဘေးရှောင်နေကြရသည့် စစ်ရှောင်ပြည်သူများ အနေဖြင့်လည်း နေအိမ်မပြန်နိုင်သေးကြောင်း သိရသည်။

ထို့အပြင် စစ်ရှောင်ပြည်သူများအတွက် စားနပ်ရိက္ခာ အကူအညီများလည်း လိုအပ်နေကြောင်း သိရသည်။