သျှမ်းပြည်တောင်ပိုင်း လဲချားမြို့နယ်တွင် အာဏာသိမ်းစစ်ကောင်စီနှင့် ငြိမ်းချမ်းရေးတွေ့ဆုံဆွေးနွေးခဲ့သည့် တိုင်းရင်းသားလက်နက်ကိုင်တပ်ဖွဲ့အချင်းချင်း တိုက်ပွဲဖြစ်ပွားသောကြောင့် စစ်ရှောင်များ ထွက်ပြေးတိမ်းရှောင်ခဲ့ရကြောင်း စုံစမ်းသိရသည်။

ယမန်နေ့ စက်တင်ဘာ (၂၈) ရက် ညပိုင်းအချိန်မှာ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ လဲချားမြို့ နှင့် (၂) မိုင်ခန့် ဝေးသည့် မက်လန်းကျေးရွာအနီးမှာ တိုက်ပွဲဖြစ်ပွားသောကြောင့် ဒေသခံများ ထွက်ပြေးတိမ်းရှောင်ခဲ့ရကြောင်း သိရှိရသည်။

“သူတို့ (၂) ဖွဲ့ တိုက်ပွဲဖြစ်တာက ဒေသခံတွေ တောင်ယာကနေ ပြန်လာတဲ့ အချိန်ဖြစ်တယ်။ အဲ့နီးနားက ကျေးရွာ ဒေသခံ (၃၃) ဦး ကား (၃) စီးလောက် လဲချားမြို့ထဲကို စစ်ဘေးတိမ်းရှောင် ထွက်ပြေးလာခဲ့တယ်။ ဒီနေ့ တိုက်ပွဲငြိမ်တော့ ပြန်သွားကြပြီ” ဟု လဲချားဒေသခံ တစ်ဦး က သျှမ်းသံတော်ဆင့် ကိုပြောသည်။

စစ်ဘေးတိမ်းရှောင်လာသည့် စစ်ရှောင် (၃၃) ဦးသည် လဲချားမြို့ ရှိ ဝါဆိုဘုန်းကြီးကျောင်း နှင့် ဟိုဖိုင်ဘုန်းကြီးကျောင်းတွင် တစ်ညတာ လာရောက် ခိုလှုံခဲ့ပြီး ယနေ့ (စက်တင်ဘာ ၂၉)ရက် နံနက်ပိုင်း တွင် နေရပ်ပြန်သွားကြောင်းသိရသည်။

“မနေ့က ပစ်ခတ်သံ က မက်လန်းကျေးရွာဘက်အနီးမှာ (၁) နေရာ ကြားရတယ်။ သူတို့ ဒီလို တိုက်ပွဲဖြစ်ရင် ဒေသခံ ရွာသားတွေပဲ ဒုက္ခရောက်တယ်။ သျှမ်းအချင်းချင်း ဒီလို ပြန်တိုက်တော့ ကျနော်တို့ ပြည်သူတွေပဲ ဒုက္ခဆင်းရဲရောက်တာ” ဟု လဲချားဒေသခံ တစ်ဦး ကပြောသည်။

တိုက်ပွဲဖြစ်ပွားမှု နှင့် ပတ်သက်ပြီး လက်နက်ကိုင် (၂) ဘက်မှ ထိခိုက်ဒဏ်ရာ ရရှိသူများ စာရင်း မသိရှိရသေးပေ။

ပြီးခဲ့သည့် စက်တင်ဘာ (၂၁) ရက်နေ့က ကျေးသီးမြို့နယ် မိုင်းရဲကျေးရွာအုပ်စု ပန်ဟိုက် ကျေးရွာ နှင့် ခိုနမ့်တောင်းကြားမှာ SSPP နှင့် RCSS တို့ နှစ်ဖက်တပ်ဖွဲ့ ထိပ်တိုက်ရင်ဆိုင်ရပြီး တိုက်ပွဲဖြစ်ပွားခဲ့ရကြောင်း သိရသည်။