သျှမ်းပြည်တောင်ပိုင်း တောင်ကြီးခရိုင်အတွင်းရှိ မြို့နယ်တချို့တွင် စစ်ကောင်စီက စစ်ကြောင်း ၅ ကြောင်း နှင့် ပတ်သက်ပြီး ပြည်သူများကို လိုက်လံစည်းရုံးကာ ဟောပြောပွဲ မတက်ရောက်သူများကို ပိုက်ဆံကောက်ခံနေကြောင်း စုံစမ်းသိရှိရသည်။
စက်တင်ဘာ ၂ ရက် မှစပြီး ယခုလကုန်ပိုင်းထိ စစ်ကောင်စီ လက်အောက်ခံ မြို့နယ်ဦးစီးဌာနများ နှင့် ရဲတပ်ဖွဲ့များ က လုံခြုံရေး၊ တရားဉပဒေ စိုးမိုးရေး၊ ရပ်ရွာအေးချမ်းသာယာရေး နှင့် ဒေသဖွံ့ ဖြိုးရေးလုပ်ငန်းဟူ၍ ခေါင်းစဉ် တပ်ပြီး ရွာငံ၊ ပင်းတယ၊ ညောင်ရွှေ၊ ရပ်စောက် စသည့် မြို့နယ်၏ ကျေးရွာဒေသများမှာ စစ်ကောင်စီကို ထောက်ခံပေးရန် လိုက်လံဟောပြောပွဲ စည်းရုံးခဲ့ကြောင်း သိရသည်။
ဟောပြောပွဲကို တစ်အိမ် တယောက် တက်ရောက်ရပြီး မတက်ရောက်နိုင်သူများရှိပါက ပိုက်ဆံ ကျပ်ငွေ (၅,၀၀၀) အထက်ကို လူအစားထိုးအဖြစ်ကောက်ခံကြောင်း အဆိုပါ ဟောပြောပွဲကိုလည်း စစ်ကောင်စီမှ အတင်းကြပ်ပြုလုပ် နေကြောင်း ရွာငံဒေသခံ အမည်မဖော်လိုသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အခုက သူတို့ မြို့နယ်အလိုက် တောက်လျောက်လုပ်နေတာ။ ဟောပြောပွဲ တစ်အိမ်တစ်ယောက် တက်ရမယ်၊ မတက်နိုင်တဲ့သူကို လူအစား ပိုက်ဆံပေးရတယ်။ ဒါက မဖြစ်သင့်တဲ့ကိစ္စကို အတင်းကြပ် လုပ်ယူပြီး၊ ပြည်သူရဲ့ စိတ်သဘောဆန္ဒလည်းမပါဘူး “ ဟု ၎င်း အမျိုးသမီးတစ်ဦးက ပြောသည်။
စစ်ကြောင်း ၅ ကြောင်းနှင့် ပတ်သက်ပြီး ဉပဒေ စိုးမိုးရေးအတွက် လာမည့် (၂၀၂၃) ခုနှစ် ရွေးကောက်ပွဲတွင် စစ်ကောင်စီတပ်ဖွဲ့ကို ထောက်ခံရန် လိုက်လံဟောပြောစည်းရုံးနေကြောင်း သိရသည်။
