သျှမ်းပြည်တောင်ပိုင်း ကျေးသီးမြို့ထဲရှိ ပြည်သူပိုင်မြေယာများကို ကြံ့ခိုင်ရေးပါတီ နှင့် သစ်တောဦးစီးတို့က အဓမ္မသိမ်းယူလိုက်ကြောင်း စုံစမ်းသိရသည်။
ထိုမြေယာကို ၂၀၀၆ ခုနှစ်ကတည်းက ကြက်ဆူပင် စီမံကိန်းဟုဆိုပြီး ကြံ့ခိုင်ရေးပါတီက လာရောက် သိမ်းယူထားပြီး လက်ရှိအချိန်အထိ ပြည်သူများထံ ပြန်လည်ပေးအပ်ခဲ့ခြင်းမရှိကြောင်း မြေယာသိမ်းခံရသူတစ်ဦးက သျှမ်းသံတော်ဆင့် ကိုပြောသည်။
“သူတို့ ၂၀၀၆ ခုနှစ်ကနေ ၂၀၀၈ အထိ ၃ နှစ် ကြက်ဆူပင်စီမံကိန်းနဲ့ လာသိမ်းသွားတာ။ ကြက်ဆူပင်တွေ စိုက်ပြီးတော့ ကျနော်တို့ကို မြေယာက ပြန်မပေးဘူး။ အခုချိန်ထိ သိမ်းထားလိုက်တာ။ ကျနော်တို့လည်း သွားလုပ်စားလို့မရဘူး” ဟု ၎င်းက ပြောသည်။
၂၀၁၇ ခုနှစ်တွင်လည်း NLD အစိုးရလက်ထက်တွင် ထိုမြေယာများကို ပြည်သူများထံ ပြန်ပေးအပ်မည်ဟု ပြောဆိုခဲ့သော်လည်း ပြန်ပေးခဲ့ခြင်းမရှိပေ။
ထိုအပြင် ပြည်သူများကို ပေးအပ်ခဲ့ခြင်းမရှိပဲ ကြံ့ခိုင်ရေးပါတီ နှင့် သစ်တောဦးစီးတို့က ၎င်းတို့ဝန်ထမ်းများနှင့် ပုံစံ (၇) ပုံစံ (၁၀၅) လုပ်ယူပြီး မြေယာကို အပိုင်သိမ်းယူသွားခဲ့ကြောင်း ဒေသခံများ ပြောပြချက်အရ သိရသည်။
မြေယာသိမ်းယူပြီး နောက်ပိုင်းတွင်လည်း ကြံ့ခိုင်ရေးပါတီမှ မည်သည့်တစုံတရာ လုပ်ဆောင်ခြင်းမရှိဘဲ ပြည်သူများက စိုက်ပျိုးရေး သွားလုပ်သောအခါလည်း လုပ်ကိုင်ခွင့် မပေးကြောင်း သိရသည်။
“၂၀၁၇ မှာ စွန့်လွတ်မြေဆိုပြီး ကြက်ဆူစိုက်ထားတဲ့ မြေတွေကို အကုန်ပေးပါတယ်။ ကျနော်တို့ ကျေးသီးမြို့တစ်ခု ပဲ ပြန်မရတာ။ တစ်ချို့မြို့နယ်တွေက အကုန်ပြန်ရတယ်။ အခုက သူတို့ မြေယာဆိုပြီးတော့ ပုံစံ (၇) တွေလုပ် ပြီးတော့ သိမ်းယူသွားလိုက်တာ။ ကျနော်တို့က ဘာမှ မသိတော့ ပေးသွားလိုက်ရတယ်” ဟု ဒေသခံ အမျိုးသားတစ်ဦးကပြောသည်။
ထိုမြေယာအတွက် ပြည်သူများက ၂၀၂၁ ခုနှစ် ဖေဖော်ဝါရီလ ကတည်းက ကျေးသီးမြို့ ထွေအုပ်ရုံးထဲတွင် စာတင်ထားသော်လည်း လက်ရှိအချိန် ပြန်လည်ဖြေကြားပေးခြင်းမရှိကြောင်း သိရသည်။
“ကျနော်တို့ အရင်နှစ်က ထွေအုပ်ရုံးကို စာတင်ထားတယ်။ အခုချိန်ထိ ဘာမှ အကြောင်းကြားထားတာမရှိဘူး။ ဘာမှလည်းပြန်မပြောလာဘူး။ ဒီတိုင်းပဲ ထားထားတာ။ ကျနော်တို့က ကျနော်တို့ မြေကွက်ကို ပြန်လိုချင်တယ်” ဟု အထက်ပါ အမျိုးသားက ပြောသည်။
ထိုမြေယာများကို ကြံ့ခိုင်ရေးပါတီ စိုင်းကျော်ခိုင် နှင့် သစ်တောဦးစီး ဝင်းနိုင်တို့က ပေါင်းပြီးသိမ်းထားကြောင်း သိရသည်။
သိမ်းခံရသည့် မြေကွက် စုစုပေါင်း (၂၂) ဧက ရှိပြီး၊ လက်ရှိအချိန်ထိလည်း ထိုမြေယာများကို တစ်ခြားသုံးယူမှုမရှိဘဲ ၎င်းတို့ ကိုယ့်ကျိုးအတွက် သုံးဖို့ ယူသွားကြောင်း သိရသည်။
ပြည်သူများက စိုက်ပျိုးရေးပြန်လုပ်ရန်အတွက် ၎င်းတို့ မြေယာကို ပြန်လိုချင်ကြောင်း၊ လက်ရှိ ကာလမှာ စားဝတ်နေရေး ခက်ခဲနေချိန်ဖြစ်ကာ မြေယာများတွင် ပြန်အလုပ်လုပ်လိုကြောင်းလည်း အသက် (၅၆) နှစ်အရွယ် အမျိုးသား တစ်ဦးက သျှမ်းသံတော်ဆင့်ကို ပြောသည်။
“သူတို့ အဲ့မြေကွက်ကိုလည်းဘာမှ သုံးတာမဟုတ်ဘူး။ သူတို့ကိုယ်ကျိုးအတွက်ပဲ သုံးနေတာ။ ပြန်ရောင်းစား နေကြတာ။ ကျနော်တို့က ကိုယ့်မြေကွက်ကို ပြန်လိုချင်တယ်။ စိုက်ပျိုးရေးတွေ လုပ်ကိုင်ဖို့လိုတယ်။ ကျနော်တို့ စားဝတ်နေရေးအတွက်က ခက်ခဲတယ်” ဟု ၎င်းက ဆိုသည်။ ။
ထိုမြေယာများကိုလည်း ၁၉၇၈ ဘိုးဘွားအစဉ်လာ ပြည်သူများက လုပ်ကိုင်စားသောက်ခဲ့ကြောင်းသိရသည်။ ထိုအပြင် ကြံ့ခိုင်ရေးပါတီ နှင့် သစ်တောဦးစီးများက ပြည်သူများ မြေယာဥပဒေအကြောင်း နားမလည် သောကြောင့် အတင်းအဓမ္မသိမ်းယူလိုက်ကြောင်း သိရသည်။
