Thursday, December 1, 2022

Kpayအကောင့် မှ တစ်ဆင့် ငွေလိမ်လည်မှုများရှိနေ

Must read

စစ်အာဏာသိမ်းပြီး ၁နှစ်ကျော်ကာလ မှာ သျှမ်းပြည်အတွင်း Kpay အကောင့်မှတဆင့် ငွေလိမ်လည်မှုရှိနေကြောင်း စုံစမ်းသိရသည်။

Kpay

ယခုနောက်ပိုင်း နည်းမျိုးစုံ ငွေလိမ်လည်မှုရှိလာပြီး၊ ဖုန်းမှ တဆင့် ငွေလွှဲခိုင်းခြင်း၊ Kpay မှ တဆင့် ငွေကိုလိမ်ညာ ထုတ်ယူမှုများ ရှိလာကြောင်း သိရသည်။

စက်တင်ဘာ တတိယပတ်အတွင်းတွင် သျှမ်းပြည် တောင်ပိုင်း ပင်လုံမြို့ထဲတွင် ရင်းနှီးသည့်သူအချင်းချင်းဖုန်းဆက်ပြီး Kpay မှ တဆင့် ငွေလွှဲခိုင်းကြောင်း ကြုံတွေ့ရသူ အမျိုးသမီးတစ်ဦး က သျှမ်းသံတော်ဆင့်ကို ပြောသည်။

“ ကျမ ဆီကို သူစိမ်းတယောက်က ဖုန်းဆက်လာတယ်။ သူ့က ကျမရဲ့ သူငယ်ချင်းနဲ့ရင်းနှီးတယ်လို့ပြောပြီး သူ့ရဲ့ Kpay အကောင့်ထဲ ပိုက်ဆံလွှဲခိုင်းတယ်။ ကျမလည်း အလုပ်ရှုပ်နေတော့ ကျမရဲ့ သူငယ်ချင်းဆီပဲလွှဲပေးလိုက်တယ်” ဟု ပင်လုံဒေသခံ ကြုံတွေ့ရသည့် အမျိုးသမီးက ဆိုသည်။

ထို့အပြင် မိုင်းရှုးမြို့တွင် Kpay အကောင့်ဟက်ခံရပြီး ငွေများကို ခိုးထုတ်သွားသည့် ဖြစ်စဥ်လည်း ရှိခဲ့ကြောင်း သတင်းရရှိသည်။

“ ကျမ Kpay အကောင့်က ဟက်ခံထားရတာလားမသိဘူး။ ကျမဘာမှ မသုံးရဘူး။ ပိုက်ဆံ ၆ သိန်းလောက်က ထွက်သွားတယ်။ Call center ကို ဖုန်းဆက်မေးကြည့်တော့ အွန်လိုင်းဂိမ်းက လိမ်သွားတယ်လို့ပြောတယ်။ သူတို့ဘက်ကလည်း တာဝန်ယူပေးတာမရှိဘူး” ဟု မိုင်းရှုးမြို့ ဒေသခံ အမျိုးသမီးက ပြောသည်။

Pay

လက်ရှိမှာ Kpay အကောင့် သုံးစွဲရန် လုံခြုံမှုမရှိတော့ကြောင်း၊ ကမ္ဘာဇဘဏ်ဘက်မှလည်း တာဝန်ယူဖြေရှင်းပေးခြင်း လည်းမရှိကြောင်း မိုင်းရှူးမှ အမျိုးသမီးက ပြောသည်။

“ အခုကလည်း ကျမတို့ Kpay အကောင့်ကို အသုံးပြုရတာမလုံခြုံဘူး။ ပိုက်ဆံတွေကိုလည်း ဘဏ်အကောင့်ထဲ လွှဲထည့်ထားရတာ။ Kpay ထည့် ထားပြီးရင် ထုတ်လို့မရတော့တာလည်းဖြစ်တယ်။ သုံးရတာလည်း အဆင်မပြေတော့ဘူး” ဟု ပင်လုံမြို့ ဒေသခံ အမျိုးသားတစ်ဦးက ပြောသည်။

အလားတူ စစ်ကောင်စီကလည်း Kpay အကောင့်များကို အဆင့် (၂) အထိ မမြှင့်ထားသည့် အကောင့်များကို ပိတ်သိမ်းမည်ဖြစ်ကြောင်း၊ မှတ်ပုံတင်၊ ဖုန်းနံပါတ်နှင့် မကိုက်ညီတဲ့ နံပါတ်များကိုလည်း အကောင့်ပိတ်သွားမည် ဟု ထုတ်ပြန်ထားသည်။

ထိုသို့ထုတ်ပြန်သွားပြီးနောက်ပိုင်းတွင် Kpay အကောင့်သုံးသူတစ်ချို့က ပိတ်ခံရပြီး တစ်ချို့က ငွေလိမ်လည်ခံရကြောင်းသိရသည်။

Leave a Comments

- Advertisement -spot_img

Latest article