သျှမ်းပြည်မြောက်ပိုင်း မိုးမိတ်မြို့နယ်မှာ စစ်ရေးတင်းမာမှု အကြောင်းပြပြီး ပြည်သူ့ကာကွယ်ရေးတပ်ဖွဲ့ PDF မှ ပိတ်ခိုင်းထားသည့် စာသင်ကျောင်းများသည် သုံးလကျော်ကြာသည်အထိ ပြန်မဖွင့်နိုင်သေးကြောင်း သတင်းသိရသည်။
မိုးမိတ်မြို့နယ်ရှိ အထက်ညောင်နီရွာ၊ အောက်ညောင်နီရွာ၊ သရက်ချိုရွာ၊ စင့်ကင်ကျေးရွာ၊ ပန်ဆားကျေးရွာတို့မှ စာသင်ကျောင်းများသည် ပြီးခဲ့သည့် ဇူလိုင်လအတွင်းမှ စတင်ပိတ်ခဲ့ရပြီး ယနေ့ အချိန်ထိ ပြန်လည်ဖွင့်နိုင်ခြင်း မရှိကြောင်း မိုးမိတ်မြို့မှ အမည်မဖော်လိုသည့် အမျိုးသမီးတစ်ဦးက သျှမ်းသံတော်ဆင့် ကိုပြောသည်။
“ဒီကျေးရွာက စာသင်ကျောင်းတွေကို PDF တွေက ပိတ်ထားခိုင်းတယ်၊ စစ်ရေးရှိနေလို့ မလုံခြုံမှာဆိုးလို့ ဆိုပြီး ကလေးတွေကို ကျောင်းနားခိုင်းတာပေါ့၊ သရက်ချိုရွာက အလယ်တန်းကျောင်းဖြစ်တယ်၊ ကျန်တဲ့ရွာတွေ ကျတော့ မူလတန်းကျောင်းတွေပဲ” ဟု ၎င်း အမျိုးသမီးက ပြောသည်။
ပြီးခဲ့သည့် ဇွန်လ အတွင်း စတင်ခဲ့သည့် အာဏာသိမ်း စစ်ကောင်စီ နှင့် ပြည်သူ့ကာကွယ်ရေးပူးပေါင်းတပ်ဖွဲ့ KIA၊ PDF ကြား စစ်ရေးပြင်းထန်မှု ရှိခဲ့ပြီးနောက် PDF များက စာသင်ကျောင်းများ ပိတ်သိမ်းရန် ညွှန်ကြားခဲ့ကြောင်း သိရသည်။
“ကလေးတွေက ကျောင်းပိတ်ထားတော့ ရပ်ရွာထဲမှာ ဒီလိုပဲ နေထိုင်သွားလာနေကြတယ်၊ တချို့လည်း လယ်ယာသွား ကျွဲ ၊ နွား တွေကျောင်း လုပ်ကြရတာပေါ့၊ ကလေးတွေရဲ့ ပညာရေးကို ထိခိုက်ကြမှန်း သိကြပေမဲ့ လုံခြုံရေးလည်း ရှိနေတော့ ပြောလို့မရဘူးလေ” ဟု အထက်ပါ အမျိုးသမီးက ဆက်ပြောသည်။
လက်ရှိတွင် စစ်ကောင်စီတပ်ဖွဲ့ နှင့် KIA ၊ PDF ကြား တိုက်ပွဲငြိမ်သက်သော်လည်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် ထိတွေ့တိုက်ပွဲများရှိနေကြောင်း သတင်းသိရသည်။
Leave a Comments