Thursday, May 30, 2024

သျှမ်းတောင် စစ်ရှောင်များ နေရပ်ပြန်ပို့ရန် စစ်ကောင်စီ ညွှန်ကြား

Must read

သျှမ်းပြည်တောင်ပိုင်း အတွင်းရောက် စစ်ရှောင်များကို မိုးရာသီအကုန် (အောက်တိုဘာလ) တွင် နေရပ်ပြန်ပို့ရမည်ဟု နိုင်ငံတော် ဝန်ကြီးချုပ်၊ နိုင်ငံတော်စီမံအုပ်ချုပ်ရေး ကောင်စီဉက္ကဌ၏ ညွန်ကြားချက်အရ သိရသည်။

သျှမ်းတောင်ရောက် စစ်ရှောင်များ

“ နေရပ်ကိုပြန်ပို့မယ့်ကိစ္စက သျှမ်းပြည်တောင်ပိုင်းက စစ်ရှောင်တွေလည်းပါတယ်လို့ ပြောတယ်။ နောက်လာမယ့် (၁၀) လပိုင်းကုန်ရင် နေရပ်ကို ပြန်ပို့မယ်လို့တော့ ကြားတယ်။ သေချာတဲ့ ရက်စွဲတော့ မသိရသေးဘူး “ ဟု သျှမ်းပြည်တောင်ပိုင်းရှိ စစ်ရှောင်ကော်မတီ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကရင်နီပြည် ဒီးမော့ဆိုမြို့နယ်၊ သျှမ်းပြည်တောင်ပိုင်း ဖယ်ခုံ၊ မိုးဗြဲ စသည့်ကျေးရွာများမှ သျှမ်းပြည် ပင်လောင်း၊ ဆီဆိုင်မြို့နယ်အတွင်းရောက် ရှိနေသည့် စစ်ရှောင်များသည် နေရပ်သို့ပြန်ချင်သော်လည်း ပဋိပက္ခတိုက်ပွဲများ မကြာခဏ ဖြစ်ပွားနေသောကြောင့် နေရပ်ကိုမပြန်ရဲသေးကြောင်း သျှမ်းတောင်ဒေသခံ စစ်ရှောင်တစ်ဦးက သျှမ်းသံတော်ဆင့်ကို ပြောသည်။

သျှမ်းတောင် စစ်ရှောင်များနေထိုင်သည့်နေရာ

“ အခုချိန်က နေရပ်ပြန်ဖို့ခက်ခဲတယ်။ ကိုယ့်ရွာမှာလည်း ပြန်နေလို့လည်းမရဘူး။ တိုက်ပွဲတွေ၊ မြေမြှုပ်မိုင်း တွေကြောင့် ကျနော်တို့လည်း အဝတ်တစ်ထည် ကိုယ်တစ်ထည်နဲ့ ထွက်ပြေးလာရတာ။ အခုနေရပ်ကို ပြန်ပို့မယ်ဆိုရင် ကျနော်တို့ဒီထက် ပိုဒုက္ခရောက်သွားမယ်။ အခုအခြေနေနဲ့ ဘယ်သူမှ နေရပ်ကိုမပြန်ချင်သေးကြပါဘူး “ ဟု ၎င်းအမျိုးသား တစ်ဦးက ပြောသည်။

ထို့အပြင် နေရပ်သို့ပြန်လည်ပို့ဆောင်မည်ဆိုသောကြောင့် ယခုလက်ရှိ မြို့နယ်စာသင်ကျောင်းမှ ကျောင်းတက် နေသော စစ်ရှောင်ကလေးများ၏ ပညာရေးပိုင်းမှာ ထိခိုက်နစ်နာမှု ရှိလာနိုင်ကြောင်း သျှမ်းတောင် ဒေသခံ စစ်ရှောင် အမျိုးသမီး တစ်ဦးကပြောသည်။

သျှမ်းတောင် စစ်ရှောင်များနေထိုင်သည့်နေရာ

“ စစ်ရှောင်လာတာ (၁) နှစ်ကျော်နေပြီလေ။ နေရပ်ကိုပြန်ပို့မယ်ဆိုရင်တော့ ကျောင်းတက်နေတဲ့ကလေးကို ကျောင်းခေါ်ထုတ်ရမှာလေ။ ကလေးပညာရေးအပိုင်း ထိခိုက်တယ်။ ပြီးရင် နေရပ်ကိုပြန်ပို့မယ်ဆိုတာလည်း ဘယ်နေရာကို ပြန်ပို့မယ်ဆိုလည်း မသိရဘူး “ ဟု ၎င်းအမျိုးသမီးတစ်ဦးက ပြောသည်။

သျှမ်းပြည်တောင်ပိုင်း မြို့နယ်ဒေသတစ်ခုရှိ စစ်ရှောင်ဦးရေမှာ (၆,၀၀၀) ဝန်းကျင်ရှိနေပြီး အများအားဖြင့် အမျိုးသမီးနှင့် ကလေးများဖြစ်ကြပြီး နေရပ်ပြန်ပို့မည်ဆိုသည့် သတင်းကြောင့် စိုးရိမ်သောက ရောက်နေကြောင်းသိရသည်.

လက်ရှိ မိုးတွင်းရာသီ ကာလအတွင်း စစ်ရှောင်များသည် ရာသီတုပ်ကွေးရောဂါများ ဖြစ်ပွားနေကြ ကြောင်း သိရသည်။

Leave a Comments

- Advertisement -spot_img

Latest article