သျှမ်းပြည်တောင်ပိုင်း နမ့်စန်- ခိုလမ် လမ်းပိုင်းတွင် လက်နက်ကိုင်တပ်ဖွဲ့တစ်ခုမှ လိုင်းကားများကို လမ်းအခွန် ပိုမိုကောက်ခံနေကြောင်း စုံစမ်းသိရှိရသည်။
ယခု ကာလတွင် စက်သုံးဆီ အဆမတန် မြင့်တက်နေသဖြင့် လိုင်းကားပြေးဆွဲသော ကားသမားများသည် စက်သုံးဆီကုန်ကျစရိတ်မှာ ယခင်ကထက် ပိုကုန်ကျလာကြောင်း နမ့်စန်-ခိုလမ်ကြားရှိ လက်နက်ကိုင်တပ်ဖွဲ့ တစ်ခုက လမ်းအခွန်များကို ပိုမိုကောက်ခံနေသဖြင့် လိုင်းကားပြေးဆွဲသူများအတွက် ခက်ခဲနေကြောင်း သိရသည်။
“တောင်ကြီးမှာ ဓာတ်ဆီတစ်လီတာ (၃,၀၀၀) ကျော်တယ်။ အခု တောင်ကြီး – တာချီလိတ် အသွားအပြန် တစ်ခေါက်ကို စက်သုံးဆီစားရိတ် (၁၂) သိန်းကျော်အထိကုန်တယ်။ အခုက နမ့်စန် နဲ့ ခိုလမ်ကြားမှာ အခွန်ကောက်တာလည်း သိန်းဂဏန်းထိကောက်နေတယ်။ လိုင်းကားပြေးဆွဲရတာ အဆင်မပြေတော့ဘူး“ ဟု ယာဥ်ငယ်လိုင်းကားပြေးဆွဲနေသည့် အမျိုးသားတစ်ဦးက ပြောသည်။
ယခင်တွင် တောင်ကြီး – တာချီလိတ် လိုင်းကားပြေးဆွဲရာ အသွားအပြန် တစ်ခေါက်တွင် စက်သုံးဆီကုန်ကျစရိတ် မှာ ကျပ်ငွေ (၉) သိန်းကျော်အထိသာ ကုန်ကျပြီး ယခုကာလတွင် စက်သုံးဆီဈေးနှုန်း မြင့်တက်လာသဖြင့် စက်သုံးဆီ ကုန်ကျစရိတ်မှာ (၁၂) သိန်းကျော် အထိကုန်ကျနေကြောင်း သိရသည်။
အဆိုပါ ယာဉ် လိုင်းကား ပြေးဆွဲသူများသည် ဈေးနှုန်းမြင့်တက်မှု နှင့် အခွန်များကို ပိုမိုပေးဆောင်ရသဖြင့် လိုင်းကားများ ရပ်တန့်ရမည့် အနေအခြေရောက်ရှိနိုင်ကြောင်း ၎င်းအထက်ပုဂ္ဂိုလ်တစ်ဦးက ထပ်လောင်း ပြောသည်။
“ဆီဈေးနှုန်း မြင့်တက်လို့ လိုင်းကား တော်တော်များများက နားသွားပြီ။ အခု ဆီဈေးနှုန်း မြင့်တက်တာရယ်၊ အခွန်ဆောင်ရတာရယ် နောက်ဆိုရင် ကျနော်တို့ လိုင်းကားတွေလည်း ရပ်တန့်ရမယ့်အနေအထား ရောက်သွားနိုင်တယ်“ ဟု ယာဥ်မောင်းတစ်ဦးက ဆိုပြန်သည်။
ထို့အပြင် စစ်အာဏာသိမ်းပြီးနောက်ပိုင်း မြို့အဝင်ဂိတ်တွင် စစ်ကောင်စီတပ်များလည်း ပိုက်ဆံကောက်ခံနေကြောင်း သိရသည်။
