Thursday, December 1, 2022

နမ့်ခမ်းမြို့ရှိ စက်သုံးဆီဆိုင်ကြီး (၇) ဆိုင်အနက် (၃) ဆိုင်သာ စျေးနှုန်းပုံမှန်ဖြင့် ရောင်းချ

Must read

သျှမ်းပြည်မြောက်ပိုင်း နမ့်ခမ်းမြို့ရှိ စက်သုံးဆီဆိုင် ပန့်ဆိုင် (၇) ဆိုင်ရှိသည့်အနက် (၃) ဆိုင်သာ ဆီစျေးများ ပုံမှန်ရောင်းပေးနေသဖြင့် ပြည်သူများ သွားရောက် တန်းစီ ဝယ်နေကြောင်း စုံစမ်းသိရှိရသည်။

ကျန်ရှိသည့် ပန့်ဆီဆိုင် (၄) ဆိုင်သည် တစ်လီတာလျှင် (၄,၅၀၀) ကျပ် မှ (၅,၀၀၀) ကျပ်အထိ စျေးတင်ရောင်းသဖြင့် ပြည်သူများ စျေးနှုန်း ပုံမှန်ရောင်းပေးသည့် ပန့်ဆီဆိုင်များကိုသာ သွားရောက် တန်းစီ ဝယ်ယူကြောင်း နမ့်ခမ်းဒေသခံ တစ်ဦး ကပြောသည်။

“စျေးနှုန်းပုံမှန် ရောင်းပေးတဲ့ (၃) ဆိုင်က သူတို့ ဆီ ရောက်လာတာနဲ့ (၁) ရက် (၂) ရက်ဆို ကုန်ပြီ။ အဲ့ကြောင့် ပြည်သူတွေက သူတို့ ဆီရောင်းပေးတာနဲ့ သွားတန်းစီ ပြီး စောင့်ဝယ်ကြတာ” ဟု နမ့်ခမ်း ဒေသခံ တစ်ဦး ကပြောသည်။

နမ့်ခမ်းမြို့ရှိ စက်သုံးဆီများကို ပုံမှန်စျေးနှုန်းဖြင့် ရောင်းပေးသော ဆိုင်များသည် နမ့်ခမ်း ပန့်ဆီဆိုင်၊ နမ့်မော(ဝ်) ဆိုင် ၊ ငွေချယ်ရီ ပန့်ဆီဆိုင် တို့သည် စက်သုံးဆီ တစ်လီတာလျှင် (၃,၄၀၀) ကျပ်မှ (၃,၅၀၀) ကျပ် အထိသာ စျေးတင်ရောင်းပေးခြင်း ဖြစ်ကြောင်း သိရှိရသည်။

“ကျန်တဲ့ (၄) ဆိုင်ကိုလည်း စျေးနှုန်း ပုံမှန်နဲ့ ပြည်သူတွေကို ရောင်းပေးစေချင်တယ်။ ဒီနေ့ ကျနော်တို့လည်း စက်သုံးဆီတွေ ရဖို့အတွက် သွားတန်းစီပြီး စောင့်ရတယ်။ ကျန်တဲ့ (၄) ဆိုင်လည်း စျေးနှုန်းတွေ ပုံမှန်ရောင်းပေးရင် ဒီလို ဒေသခံတွေ ဒီလို သွားပြီး တန်းစီဝယ်စရာ မလိုဘူး” ဟု ဆီသွားထည့်ရန်အတွက် သွားရောက်တန်းစီသည့် ပြည်သူ တစ်ဦး ကပြောသည်။

ယနေ့ သြဂုတ် (၃၀) ရက် နေ့လည်ပိုင်းက စတင်ပြီး နမ့်ခမ်းဒေသခံများ စက်သုံးဆီ ထည့်ရန်အတွက် သွားရောက်တန်းစီနေကြကြောင်း သိရှိရသည်။

စျေးနှုန်းတင်ရောင်းသော ဆီဆိုင်များသည် ယုံးလီ ပန့်ဆီဆိုင်၊ ဧမာနွေလ ပန့်ဆီဆိုင်၊ အောင်သပြေ ပန့်ဆီဆိုင် နှင့် ရွှေတောင် (လွယ်ခမ်း) ပန့်ဆီဆိုင် တို့ ဖြစ်သည်။

စစ်တပ်အာဏာ သိမ်းပြီးနောက်ပိုင်း ပြည်သူများ စက်သုံးဆီအခက်ခဲများစွာ ရင်ဆိုင်နေရပြီး စက်သုံးဆီ မှောင်ခိုစျေးကွက်လည်း များစွာ ရှိလာသည်။

Leave a Comments

- Advertisement -spot_img

Latest article