သျှမ်းပြည်မြောက်ပိုင်း လားရှိုးမြို့တွင် မိုးအဆက်မပြတ် ရွာသွန်းမှုကြောင့် အနိမ့်ပိုင်းရှိ ရပ်ကွက်များ ရေကြီးရေလျှံဖြစ်ပွားခဲ့ရကြောင်း စုံစမ်းသိရှိရသည်။
ပြီးခဲ့သည့် သြဂုတ် (၂၆) ရက် ညနေပိုင်းတွင် မိုးများအဆက်မပြတ် ရွာသွန်းမှုကြောင့် ရပ်ကွက် (၁)မှ ရပ်ကွက်(၉) ထိစီးဆင်းနေသော ရေနုတ်မြောင်းရေများက ရေလျှံထွက်ပြီး အနိမ့်ပိုင်းရှိရပ်ကွက်များသည် သြဂုတ် (၂၇) ရက်နေ့တွင် ရေကြီးရေလျှံဖြစ်ပွားခဲ့ကြောင်း လားရှိုးပရဟိတ အသင်းထံမှ သိရသည်။
“ တောင်ကျချောင်းရေများရင်တော့ ရပ်ကွက် (၁) က လမ်းနဲ့ မန္တလေး-လားရှိုးလမ်းမှာ ရေတက်တယ်။ အဲ့တစ်ညရေတက် တာတော့ မြို့တွင်းက မြောင်းရေလျှံပြီး ရေတက်တာ “ ဟု ၎င်းပရဟိတအသင်းထံမှ သိရသည်။
ရေကြီးရေလျှံမှုကြောင့် လားရှိုးအနိမ့်ပိုင်းရှိ ရပ်ကွက် (၇)၊ ရပ်ကွက် (၈)၊ ရပ်ကွက် (၉) နှင့် ရပ်ကွက် (၁၂) နေအိမ်များတွင် မိုးရေများသည် ခါးလောက်ထိ မြင့်တက်ခဲ့ကြောင်း သိရသည်။
တစ်ညအတွင်း မိုးများအဆက်မပြတ် ရွာသွန်းလိုက်မှုကြောင့် ရေကြီးရေလျှံဖြစ်ပွားခဲ့သဖြင့် ရက်ကြာမိုးများရွာသွန်းလျှင် ဒီထက်မက ရေကြီးရေလျှံဖြစ်ပွားမှုကို စိုးရိမ်နေကြောင်း ၎င်းက ထပ်လောင်း ပြောသည်။
“ အခုလက်ရှိ ရေမြောင်းတွေက ဒီထက်ပိုကောင်းရင်တော့ ကောင်းတယ်ပေါ့ဗျာ။ ညပိုင်းမှာ မိုးကြီးတယ်။ နောက်တနေ့မှာတောင် မိုးကသိပ်ပြီးမရွာတော့ဘူး။ တစ်ညနဲ့တစ်ရက် ရွာလိုက်တဲ့မိုးသည် ရေကအတော်ကို ကြီးသွားတယ်။ (၄-၅) ရက်လောက် မိုးရွာရင်တော့ ဒီထက်ပိုပြီး စိုးရိမ်စရာ တစ်ခုတော့ရှိတာပေါ့” ဟု လားရှိုးဒေသခံတစ်ဦးက ပြောသည်။
ထို့အပြင် သျှမ်းပြည်အရှေ့ပိုင်း ပုံပါကျင်မြို့ရှိ တာကွမ်ကျေးရွာတွင် ပြီးခဲ့သည့် သြဂုတ် (၁၂) ရက်တွင် ရေကြီးရေလျှံဖြစ်ပွားပြီး နေအိမ် (၉၁) လုံး ရေကြီးဒဏ်ကို ခံစားနေရကြောင်း ထိုထဲမှ နေအိမ် (၁၀) လုံးခန့်မှာ ပျက်စီးဆုံးရှုံးမှုများကြောင်း သတင်းသိရသည်။
