သျှမ်းပြည်တောင်ပိုင်း ပုံးအင်းဒေသတွင် စပါးခင်း လယ်ယာဧကပေါင်း ၂ သောင်း ဝန်းကျင်သည် ရေနစ်မြှုပ်သွားကြောင်း ပုံးအင်းမြေစာရင်း ပြုစုသူထံမှ စုံစမ်းသိရှိရသည်။
ပုံးအင်းဒေသအတွင်း လယ်ဧကပေါင်း ၃ သောင်းကျော်ရှိရာ ၂ သောင်းကျော် ရေနစ်မြှုပ်ခဲ့ကြောင်း သိရသည်။
ထို ရေနစ်မြှုပ်ခံရသော ပုံးအင်းဒေသမှ စပါးများသည် တောင်ကြီးမြို့နယ် ဟိုပုံးမြို့နယ် နှင့် ဆီဆိုင်မြို့နယ်တို့ဖြစ်ပြီး ရေလွှမ်းမိုးမှု ခံရသဖြင့် ပျက်စီးဆုံးရှုံးသွားကြောင်း သိရသည်။
အဆိုပါ ရေလွှမ်းမိုး၍ ပျက်စီးဆုံးရှုံးသွားသော စပါး ဧကပေါင်း ၂ သောင်း ဝန်းကျင်ကို ပြန်လည်ရိတ်သိမ်း၍ မရသောကြောင့် ယခုနှစ် ပုံးအင်းလယ်သမားများ အရှုံးပေါ်ခဲ့ရပြီး လက်ရှိ စားဝတ်နေရေးအတွက် အခက်အခဲကြုံတွေ့နေရကြောင်း ပုံးအင်းလယ်သမားဒေသခံ အသက် (၄၀) ကျော် အမျိုးသားတစ်ဦးက ပြောသည်။
“စပါးပင်တွေ ရေအောက်ရောက်ကုန်ပြီ။ ပုံးအင်းတဘက်ချောင်းတလျှောက်ရယ် ကုန်းကျိုင်း၊ နောင်မွန်၊ ပုံးအင်း၊ ဘန်းယဥ်၊ ကက္ကူ ၊ နားဟီး ၊ အသုံးတော် ဒီကျေးရွာအုပ်စုတွေထဲက စပါးခင်းတွေ ရေလွှမ်းကုန်ပြီ။ အခုထိ ရေကနည်းနည်းပဲ ကျသေးတယ်။ ပြန်ရိတ်လို့လည်းမရတော့ ရှေ့ဆက် လူထုတွေ လုပ်ကိုင် စားသောက်ဖို့ အရမ်းခက်နေပြီ“ ဟု ပုံးအင်းလယ်သမား တစ်ဦးက ပြောသည်။
ပုံးအင်းလယ်သမားများသည် တစ်နှစ်လျှင် လယ်ယာလုပ်ကိုင်ရန် ကုန်ကျစရိတ်သည် တစ်ဧကလျှင် ကျပ်သိန်း (၁၀) ကျော်အထိ ကုန်ကျကြောင်း သတင်းသိရသည်။
ပြီးခဲ့သည့် သြဂုတ် ၁၇ ရက်နေ့တွင် မြို့နယ်အလျောက်၊ မြို့နယ်ဦးစီးမှူးများက ရေနစ်မြှုပ်သွားသော ပုံးအင်းဒေသရှိ စပါး ဧကများကို လာရောက်စစ်ဆေးပြီး မြေစာရင်းများ နှင့် ဆည်မြောင်း ဖောက်လုပ်ရေးအတွက် လာရောက်ဆွေးနွေးခဲ့ကြောင်းလည်း ၎င်းက ဆက်ပြောသည်။
ထို့အပြင် လက်ရှိကာလတွင် ကုန်ပစ္စည်းများ အဆမတန်မြင့်တက်နေချိန် ပုံးအင်းလယ်သမား တချို့က ဘုန်းကြီးကျောင်းရှိ ဆန်များကိုပြန်လည် ဝယ်ယူနေရကြောင်း ပုံးအင်းဒေသရှိ အိမ်ရှင်မ တစ်ဦးက သျှမ်းသံတော်ဆင့်ကို ပြောသည်။
“ဆန်ဈေးက အရမ်းတက်နေပြီ။ စပါးရောင်းဖို့က ဘယ်သူ့မှမဝယ်ဘူး။ တချို့ဆို ဘုန်းကြီးကျောင်းမှာ သွားပြီးတော့ တောင်းဝယ်ရတာ ရှိတယ်။ ဆန်စက်ရုံက ဆန်တွေ ပြတ်နေပြီ။ (၂) တင်းအိတ်ကြီး တစ်အိတ်ကို (၁) သိန်းနဲ့ (၅)ထောင် ပေးရတယ် “ ဟု အိမ်ရှင်မတစ်ဦးက ပြောသည်။
အလားတူ ပုံးအင်းစပါးများကို ဝယ်ယူသိုလှောင်ထားသော ပွဲစားများက ယခုနှစ် ပုံးအင်းထွက် စပါးများကို ဝယ်ယူရန်အတွက် ခက်ခဲနေကြောင်း ပုံးအင်းစပါးဝယ်ယူသူ ပွဲစားတစ်ဦးက ပြောသည်။
“ကျနော်တို့လည်း ပိုက်ဆံတွေအများကြီး မပေးထားချင်တော့ဘူး။ ပိုက်ဆံကို အရင်ပေးထားပြီး စပါးကိုအိမ်ထိ သွားယူပါတယ်။ စပါးဈေးက မရမှာကို စိုးရိမ်ရတယ်။ ကျနော်တို့ကလည်း ကြည့်ပြီး ဝယ်နေရတာကိုးဗျ။ ရွေးစပါးကို ကျနော်တို့က ၄ တင်းဆို (၃၇,၀၀၀) ကျပ်၊ ရွှေအပ်စပါးကိုတော့ ၄ တင်းဆို (၄၂,၀၀၀) ကျပ်ထိပဲ ပေးရတယ် “ ဟု ၎င်းကဆိုသည်။
ပုံးအင်းဒေသသည် နှစ်စဉ်နှစ်တိုင်း ရေကြီးရေလျှံမှုကို ကြုံတွေ့နေရသော်လည်း ယခုနှစ်တွင် အဆမတန် ရေကြီးရေလျှံ ဖြစ်ပွားမှုကြောင့် ပုံးအင်းစပါးများ ဝယ်ယူသူနည်းပါးပြီး ပုံးအင်းလယ်သမားများမှာ ဆန်ဈေးကို ဈေးကြီးကြီးဖြင့် ဝယ်ယူ စားသုံးနေရကြောင်း သိရသည်။
Leave a Comments