သျှမ်းပြည်အရှေ့ပိုင်း ကျိုင်းတုံမြို့နယ်အတွင်းတွင် ရေဘေးကြုံနေရသည့်ပြည်သူများ အခက်အခဲရှိနေကြောင်း သတင်းသိရသည်။
စစ်တပ်မှ နိုင်ငံတော်အာဏာသိမ်းမှု နောက်ဆက်တွဲမှုကြောင့် ကိုဗစ်ကာလအလွန် နိုင်ငံရေးရိုက်ခတ်မှု နှင့် စီးပွားရေးအကြပ်အတည်းများဖြစ်လာပြီး ဒေသခံ ပြည်သူများ၊ အစိုးရဝန်ထမ်းများ၊ ပုဂ္ဂလိကဝန်ထမ်းများ၊ အခြေခံလူတန်းစားများ အခက်အခဲများစွာ ကြုံတွေ့နေရ ကြောင်းသိရှိရသည်။
“ကျနော်တို့မြို့ (ကျိုင်းတုံ) က တခြားမြို့နဲ့ ယှဥ်လိုက်ရင်လည်း နဂိုကတည်းက ကုန်စျေးနှုန်းတွေ ပိုမိုမြင့်မားခဲ့တာ၊ အခုဆိုရင် အခြေခံစားသောက်ကုန်စျေးနှုန်းတွေက အစ စက်သုံးဆီတွေရော၊ ရွှေစျေးနှုန်း ငွေလဲလှယ်နှုန်းတွေရော ဈေးနှုန်းတွေက သိသိသာသာကို တက်လာတော့ ကျနော်တို့လို လခစားတွေက ခက်ခဲရတာပေါ့၊ အရာရာကို ချွေတာသုံးစွဲနေရတယ်” ဟု ကျိုင်တုံဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
၂၀၂၂ ခုနှစ် ဖေဖော်ဝါရီလ မှ သြဂုတ်လအထိ ကျိုင်းတုံမြို့ ငွေလဲလှယ်မှုနှုန်းမှာ ယခင် ထိုင်းဘတ်ငွေ (၁) ဘတ် လျှင် ၅၈ ကျပ် မှ ယခု ၈၀ ကျပ် ၊ တရုတ် ယွမ်ငွေ ( ၁) ယွမ်လျှင် ၃၁၀ ကျပ် မှ ယခု ၄၁၀ ကျပ်သို့ ရောက်ရှိလာသဖြင့် ထိုင်းဘတ်ငွေ အသုံးပြုသော တာချီလိတ်မြို့ရှိ ဝန်ထမ်းများ၊ အခြေခံလူတန်းစားများက စားဝတ်နေရေးအတွက် အခက်အခဲများ ဖြစ်ပေါ်နေကြောင်း ၎င်းက ပြောသည်။
ထို့အပြင် စက်သုံးဆီဈေးနှုန်းများ မြင့်တက်လာမှု နှင့် ဝယ်ယူရခက်ခဲမှုတို့ကြောင့် ဒေသအတွင်း သွားရေးလာရေး များလည်း ကြပ်တည်းလာပြီး ဝမ်းစာရှာဖွေရေးအတွက်ပါ ထိခိုက်လာကြောင်း ၎င်းက ဆက်လက်ပြောသည်။
“အခုဆို ဆီတွေကလည်း အရင်က ဈေးနှုန်းနဲ့ သုံးဆလေးဆလောက်တက်လာတယ်၊ လိုသလောက်မရတော့ ဘယ်ကိုသွားလို့ရမလဲ၊ ပန်းရံတွေ လက်သမားတွေဆို ဆိုင်ကယ်မရှိလို့ စက်ဘီးနဲ့ အလုပ်သွားရတာ၊ တချို့ဆို အလုပ်နားရတဲ့အထိပဲ၊ အဲ့လိုခါကျတော့ ဝမ်းရေးတွေ ထိခိုက်လာတယ်” ဟု ပြောသည်။
ဆန်၊ ဆီ၊ ဆား စသည့် အခြေခံ စားသောက်ကုန်များအပြင် လူသုံးကုန်အမျိုးမျိုး၊ အိမ်ဆောက်ပစ္စည်း အမျိုးမျိုး မှာလည်း စျေးနှုန်းများမြင့်တက်လျှက်ရှိသဖြင့် ကျေးရွာနေဒေသခံတိုင်းရင်းသားများ နှင့် အခြေခံလူတန်းစားများမှ ကုန်စျေးနှုန်းများ တည်ငြိမ်ကျဆင်းရေး လိုလားလျှက်ရှိကြောင်း သိရသည်။
စစ်ကောင်စီ အာဏာသိမ်းပြီး တစ်နှစ်အကြာတွင် စက်သုံးဆီဈေးနှုန်းမြင့်တက်လာမှုကြောင့် ဒေသခံပြည်သူများစွာ အလုပ်အကိုင် အခွင့်အလမ်းနည်းပါးလာသည့်အပြင် ပြည်ပသို့ အလုပ်သွားရောက် လုပ်ကိုင်မှုများလည်း နေ့စဉ်နှင့်အမျှ ရှိလာနေကြောင်း သတင်းသိရသည်။
