သျှမ်းပြည်မြောက်ပိုင်း လားရှိုးမြို့နယ်မှ CDM ပြုလုပ်ပြီး အာဏာသိမ်း စစ်ကောင်စီကို တော်လှန်တိုက်ခိုက်နေသည့် CDM များကို စစ်ကောင်စီတို့မှ ပြင်းပြင်းထန်ထန်ရှာဖွေ ဖမ်းဆီးနေကြောင်း သတင်းသိရသည်။

စစ်အာဏာသိမ်းမှု တစ်နှစ်ကျော်လာပြီးသည့်နောက် လက်ရှိကာလအချိန်အထိ လားရှိုးမြို့နယ်အတွင်းမှ ကျေးရွာ ရပ်ကွက်များရှိ CDM သမားများကို စစ်ကောင်စီတပ်ဖွဲ့မှ လိုက်လံရှာဖွေ ဖမ်းဆီးခြင်း ထောက်လှမ်းခြင်းများ ခံနေရကြောင်း CDM အမျိုးသားတစ်ဦးက သျှမ်းသံတော်ဆင့်ကို ပြောသည်။

“CDM လုပ်ပြီး တောခိုသွားတဲ့သူတွေ၊ PDF နဲ့ ဆက်စပ်နေတဲ့သူတွေကို အဓိက လိုက်ရှာပြီး ဖမ်းနေတာပေါ့၊ တချို့ ရှောင်ထွက်သွားတဲ့ CDM တွေက အိမ်ကို တိတ်တိတ်ပြန်လာရင်တောင် စစ်ကောင်စီတွေ သတင်းရရင် ဖမ်းဆီးခံ ရတယ်၊ အခုဆို ဖမ်းဆီးခံထားရတဲ့ CDM သမားတွေက ၁၀ ဦး ထက်မနည်းရှိနေပြီ” ဟု အထက်ပါ CDM ပြုလုပ်သည့်သူ က ပြောသည်။

လက်ရှိ လားရှိုးမြို့နယ်အတွင်းတွင် သိရှိရသည့် ဖမ်းဆီးခံ CDM သမားများ ၁၀ ဦး ထက်မနည်းရှိနေပြီး သိရှိရ သည့် စာရင်းထက် ဦးရေပိုမိုများပြားနိုင်ကြောင်းလည်း အထက်ပါ ပုဂ္ဂိုလ်က ဆက်လက်ပြောဆိုထားသည်။

စစ်ကောင်စီ တပ်သားများမှ ယင်းကဲ့သို့ ရှာဖွေ ဖမ်းဆီးမှုများ ပြုလုပ်နေမှုကြောင့် လားရှိုးမြို့ပေါ် CDM သမားများ သတိကြီးစွာဖြင့် နေထိုင်စားသောက်နေရကြောင်းလည်း လားရှိုးဒေသခံလူငယ် တစ်ဦးက ပြောသည်။

“ကျနော်တို့လည်း CDM လုပ်နေတဲ့အလျောက် အိမ်မှာနေနေရပေမဲ့ ကောင်းကောင်းမနေရပါဘူး၊ CDM လုပ်ပြီး သူတို့ကို ဆဲရင်တော့ ချက်ချင်းလာဖမ်းပြီပဲ၊ စစ်ကောင်စီတွေက အရမ်းလည်တယ် ဖမ်းသွားတဲ့ CDM တွေရဲ့ သတင်းက လုံးဝမထွက်လာဘူးဖြစ်နေတယ်၊ စကစတွေကြောက်တာက CDM သမားတွေတောခိုပြီး PDF လုပ်မှာ ကိုပဲ” ဟု ၎င်းက ပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက် တစ်နိုင်ငံလုံးရှိ ပြည်သူ့ဝန်ထမ်းတချို့သည် သက်ဆိုင်ရာ ကိုယ့်ဌာနအလိုက် CDM လုပ်ဆောင်ပြီး အကြမ်းမဖက် အနုနည်းဖြင့် စစ်ကောင်စီကို တော်လှန်ပုန်ကန် နေကြသည်။

ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက် ဘဏ်ဝန်ထမ်းများ၊ အစိုးရဝန်ထမ်းများ အာဏာဖီဆန်ရေး CDM တွင် ပါဝင်လှုပ်ရှားလာသောကြောင့် စီးပွားရေးများ၊ နိုင်ငံတော် ယန္တယားများ ကောင်းမွန်စွာ လှည့်ပတ်နိုင်ခြင်း မရှိတော့ကြောင်းလည်း သတင်းသိရသည်။